O le ā e Tupu pe a Tatou Feoti?
Le Tali a le Tusi Paia
Ua faapea mai le Tusi Paia: “Auā o ē ua ola ua latou iloa e oti i latou; a o ē ua oti, latou te lē iloa se mea.” (Failauga 9:5; Salamo 146:4) O lea, pe a tatou feoti ua tatou lē o toe feola. O le tagata ua oti e lē mafai ona toe mafaufau, gaoioi, pe lagonaina se mea.
“E te toe foʻi atu lava i le efuefu”
Na faamatala mai e le Atua le mea e tupu pe a tatou feoti, ina ua ia fetalai atu i le uluaʻi tagata o Atamu. Talu ai na lē usiusitaʻi Atamu, ua fetalai atu le Atua iā te ia: “Auā o le efuefu oe, e te toe foʻi atu lava i le efuefu.” (Kenese 3:19) A o leʻi faia e le Atua Atamu “mai i le efuefu o le eleele,” e leʻi iai se Atamu. (Kenese 2:7) I se tulaga tutusa, ina ua oti Atamu na ia toe foʻi atu i le efuefu ma e leʻi toe ola.
E faapena foʻi le tulaga e oo iā i latou ua maliliu i le taimi lenei. Pe a talanoa e uiga i tagata ma manu, ua faapea mai le Tusi Paia: “O i latou uma e mai i le efuefu, e toe foʻi atu i latou uma i le efuefu.”—Failauga 3:19, 20.
O le oti e lē o le iʻuga lea o mea uma
E masani ona faatusa e le Tusi Paia le oti i le moe. (Salamo 13:3; Ioane 11:11-14; Galuega 7:60) O se tagata o loo moegase e na te leiloa mea o loo tutupu i ona autafa. I se tulaga tutusa, o le tagata ua oti e na te leiloa se mea. Ioe, ua aʻoaʻo mai e le Tusi Paia, e mafai e le Atua ona ia toe fafaguina mai le tagata oti e pei lava o loo moe ma toe avatu iai le ola. (Iopu 14:13-15) Mo i latou o le a toe faatutūina mai e le Atua, o le oti e lē o le iʻuga lea o mea uma.