Fesootaʻiga e Ala i Tusi

UA FAALELEIA e tusi soifuaga ma amioga a le faitau miliona o tagata. O le tele o tusi o Tusi Paia Kerisiano Eleni sa tusia muamua o ni tusi. I aso nei e mafai ona tatou tusia ni tusi ina ia faalaeiauina ai tagata talitonu fou, fesootaʻi ai ma uō, faalaeiau ai uso ma tuafāfine o ē o loo faatinoina ni tiute tauave faapitoa, faamalosia ai i latou o loo fesagaʻia faigatā, ma e faaoo atu ai faamatalaga manaʻomia mo le tausia o gaoioiga i le faapotopotoga.—1 Tesa. 1:1-7; 5:27; 2 Pete. 3:1, 2.

O le tusia o tusi o se auala lelei foʻi lea mo le molimau atu. I nisi vaipanoa, atonu e iai ni nuu ma nisi nofoaga e lē o saʻoloto ona fai ai la tatou galuega talaʻi. O nisi e lē iai i aiga i le tele o taimi, tatou te misia la i latou pe a tatou molimau atu mai lea fale i lea fale. O nisi e nonofo i vaipanoa e lē faigofie ona oo atu i ai.

O maʻi, leaga o le tau, ia po o se vavao e lē mafai ai i nisi taimi ona e alu ese ma lou fale. Faamata e mafai ona e tusia se tusi e avatu ai se isi molimau atili i se tauaiga po o se isi sa e talanoa lē fuafuaina i ai? Po ua iai se isi o au suʻesuʻega faale-Tusi Paia ua siitia atu i se isi nofoaga? Atonu o se tusi mai iā te oe o le mea tonu lava lenā o loo ia manaʻomia ina ia faaolaola ai pea lona fiafia faaleagaga. Ia pe atonu foʻi e mafai ona e faasoa atu ni faamatalaga talafeagai faale-Tusi Paia i nisi atonu faatoʻā uma lava ona faaipoipo, nisi ua avea ma mātua, ia po ua motusia foʻi le mafutaga ma sē e pele i le maliu.

Molimau Atu e Ala i Tusi

Pe afai o le a e tusi e molimau atu i se tasi e te leʻi feiloaʻi lava i ai, ia muamua lava faailoa atu oe. E te ono faapea atu o loo e auai i se galuega tauofo o loo faia i atunuu eseese o le lalolagi. Afai e foliga mai e talafeagai ona fai, taʻu i ai o oe o se tasi o Molimau a Ieova. Taʻu atu i le tagata le māfuaaga ua e tusi atu ai na i lo lou asiasi totino atu. Ia tusi atu e pei lava o loo lua talanoa faafesagaʻi ma le tagata. Peitaʻi, ina ia talafeagai ma le faatonuga ia “outou atamamai pei o gata, a ia fifilemu e pei o lupe,” ia matuā faaeteete lava e faatatau i le tele o faamatalaga e tatau ona e faailoa atu e uiga iā te oe.—Mata. 10:16.

Ia aofia ai i le tusi le mea e te ono fai atu ai i le tagata pe ana e asiasi totino atu i ai. E te ono fetuunaʻi se faatomuaga mai i le tusi o le Reasoning pe faaaogā se taulimaga faale-Tusi Paia mai i se lomiga talu ai nei o La Tatou Faiva o le Malo. E te ono lāgā se fesili ma faalaeiau le tagata e manatunatu i ai. O nisi tagata talaʻi e na ona fai atu lava o loo iai la tatou polokalame e lē totogia mo le taliina o fesili faale-Tusi Paia, ona faasino atu lea o nisi o matua o mataupu mai i se tasi o a tatou lomiga mo suʻesuʻega. O se ata faataʻitaʻi o se tusi na tusia e avatu ai se molimau o loo i le itulau e 73. E ono avatu ai iā te oe ni nai fesoasoani, peitaʻi e lelei pe a fesuisuiaʻi mea e tusia ai i totonu. Auā a lē faia, e ono maua faalua e le tagata le tusi lava lea e tasi.

O nisi tagata e faatalatū e faitau se tusi umī mai i se tagata e lē masani ai. Atonu la o se auala atamai le taumafai e faapuupuu lau tusi. Afai o le a umi lau tusi e ono fiu le tagata i le lauina. E lelei foʻi pe a avatu ai ma se pepa o loo lomia ai se valaaulia i sauniga i le Maota o le Malo. E mafai ona e avatu ai se sāvali, se polosiua, po o se mataupu o Le Olomatamata po o le Ala Mai! ma taʻu atu i ai e mafai ona maua atu mea nei i se tulaga faifai pea pe afai e manaʻo i ai. Ia pe e te fai atu foʻi i ai pe e manaʻo e te asiasi atu i lona aiga ina ia lua talatalanoa atili i le mataupu e pei ona talanoaina.

Se Fautuaga Puupuu e Faatatau i Foliga ma le Faatulagaga o le Tusi

Seʻi tagaʻi ane nei loa i le tusi faataʻitaʻi. Ia mātau tulaga nei: (1) E foliga mamā, e lē maanuminumi. (2) E tusa lava pe e tuu sesē le teutusi, o le a maua lava e le tagata o lafo i ai le tusi le igoa ma le tuatusi i le meli o lē na avatu ai. (3) O loo taʻua faapuupuu ma tuusaʻo le fuafuaga o le tusi i le palakalafa muamua. (4) O loo talanoaina manatu autū taʻitasi i palakalafa eseese. (5) Pe a manatu atu i le fuafuaga o le tusi, e lē o matuā faamamalu naʻuā pe soona faatalalē foʻi i ai.

O se tusi e sili ona aloaʻia, e pei o se tusi e ono lafo atu e le failautusi o le faapotopotoga i le ofisa o le lālā, e ao ona aofia ai le igoa o le faapotopotoga, faapena foʻi ma le suafa o le failautusi lava ia, o lona tuatusi i le meli, ma le aso. E ao foʻi ona iai le suafa ma le tuatusi o le tagata po o le faalapotopotoga lea o loo lafo atu i ai le tusi. Ia ona sosoo atu ai lea ma se faafeiloaʻiga talafeagai. Ina ia faauma le tusi, i nisi gagana o se faaupuga e pei o le “O lou faamaoni” ia pe “Ma le faamaoni lava” e tusia i luga aʻe o le saini. E oo foʻi i le saini e tatau ona tusia lava e oe.

I so o se tusi lava, ia uaʻi atu ina ia saʻo le sipelaina o upu, le kalama, faaʻiloga ma manatua ia mamā. O le faia faapea e aloaʻia ai lau tusi atoa ma le feʻau o loo aofia ai.

I le pito i tua o le teutusi, aua neʻi galo ona tusi ai le tuatusi e lafo mai i ai le tali—e manaia lou lava tuatusi i le meli. Afai e te manatu e lē o se faiga atamai le taʻu atu o lou tuatusi pe a e molimau atu e ala i se tusi i tagata e te lē masani ai, fesili atu i toeaina pe latou te faamaonia maia lou faaaogāina o le tuatusi o lo outou Maota o le Malo. E lē tatau lava ona faaaogāina le tuatusi o le Watch Tower Society i le fuafuaga lenei, auā e ono manatu sesē ai faapea o lau tusi na lafo mai i ofisa o le Sosaiete ma e ono tupu ai se fenumiaʻi. Afai e lē aofia ai se tuatusi e lafo mai i ai se tali ae o loo avatu ai ma se lomiga, e ono faasesēina ai foʻi faapea o le Sosaiete na lafo atu ai.

Ia faamautinoa ua e faapipii i ai le faailoga saʻo mo le mamafa o lau tusi e lafo ai, aemaise lava pe afai o fafao ai i totonu ma ni lomiga. Afai e lē lava le tau na lafo ai, e ono totogi e le tagata o loo lafo i ai, le tupe o loo manaʻomia, ma ono lē uaʻi lelei mai ai i lau feʻau na e tusi atu ai. Manatua o le tele o atunuu afai e fafao atu ai se polosiua po o se mekasini i le tusi, ona sii lea i luga o le tau e lafo ai na i lo le tau e masani ona lafo ai le tusi.

Ia Talafeagai Faaupuga

Afai loa ua māʻea lau tusi, ia faitau i ai ina ia iloilo manatu ua tusia. E faapeʻī le tulaga o loo faaupuina ai? Pe e faaleuō ma faautauta? E aofia ai le alofa ma le agalelei i uiga ia o loo tatou taumafai malosi ina ia faaalia i a tatou feutanaʻiga ma isi. (Kala. 5:22, 23) Afai e te mātauina ai ni manatu e lē logo lelei ma lē talafeagai, ia toe fetuunaʻi le faiga o faaupuga.

E mafai e se tusi ona oo i nofoaga e lē mafai ona e oo i ai. Ua lava lenei mea moni e avea ai le tusi o se meafaigaluega e aogā tele mo le faiva. Talu ai o loo avea lau tusi ma sui o oe ma avea ma sui o mea e te faatāuaina, ia manatunatu lelei la i faamatalaga o le a e fai atu ai, e faapeʻī lo latou foliga mai, ma pe faapeʻī le lagona o manatu o loo iai. E ono saunia ai mea tonu lava o loo manaʻomia ina ia amata ai, e faamalosia ai, pe e faalaeiauina ai se tasi ina ia ui i le ala i le ola.