Manino le Taʻuina o Upu

INA ia mafai ona fai ni fesootaʻiga lelei, e ao ona manino lau tautala. E ono faaosofia le fiafia ia pe tāua foʻi le mea o e manaʻo e taʻua, ae o le a lē iloa le tele pe a lē faigofie ona malamalama i au upu.

E lē mafai ona faagaeeina tagata i se tautalaga e latou te lē malamalama moni i ai. E tusa lava pe e malosi le leo o se tasi ma e mafai foʻi ona lagona lelei atu, ae afai e nunumi le taʻuaina o ana upu, o le a lē uunaʻia ai isi e fai ni gaoioiga. O le a pei lava o loo ia tautala mai i se gagana ese, e lē manino i ai lana ʻaufaalogologo. (Iere. 5:15) Ua faamanatu mai e le Tusi Paia iā i tatou e faapea: “A faaletonu le leo o le pu, o ai ea se na te sauni e tau! E faapea foi outou, afai tou te le sauniuni atu i o outou laulaufaiva ni upu matala, e iloa ea faapefea le upu ua tautala aʻi? auā e tautala atu outou i le gaogao.”—1 Kori. 14:8, 9.

O ā Mea e Faalētonu ai le Tautala? Atonu pe ona o le lē telē o le matala o lou fofoga i le tulaga e tatau ona iai. O maso o le auvae o loo malō ma laugutu e tau lē gaoioi e ono māfua ai ona lē manino le tautala.

A vave tele foʻi le tautala e ono māfua ai le tautala lea e lē faigofie ona malamalama i ai. E ono faatusaina lenei mea i se lipine ua puʻeina ai se tautalaga ua ta faasaoasaoa na i lo o le tulaga sa tatau ona iai. O loo iai lava i inā upu, ae ua lē iloa le tele o lona aogā.

I nisi tulaga, o le faalētonu o le tautala e fesootaʻi i le faalētonu o vaega o le fofoga lea e faaaogā i le tautala. Peitaʻi e oo lava iā i latou o ē e ao ona tauivi ma se faafitauli faapena e tele se mea e mafai ona latou fai e faaleleia ai lea faafitauli, e ala i le faatatauina o fautuaga i le suʻesuʻega lenei.

Peitaʻi, o le tele lava o taimi, o le faalētonu o le tautala e māfua i le faanunumi o le taʻuaina o upu—ua faasoloatoa le taʻuina ma ua faigatā ai ona malamalama. E ono aofia ai i le faafitauli le misi o silapela (syllables) po o mataʻitusi iloga, ia po o le faaselemutu foʻi o le taʻuaina o upu. Pe afai e soona taʻu faasoloatoa upu e se tagata, e ono maua mai e lana aofia ni nai manatu ma faaupuga, ae o le a latou taumateina isi manatu ma faaupuga. O le lē manino lelei o faaleoga e mafai ona faaleagaina ai le aogā o le aʻoaʻo atu a se tasi.

Le Auala e Faamanino ai le Tautala. O se tasi o mea e mafai ona manino ai le taʻuina o upu, o le malamalama lea i le fausaga o upu i lau gagana. I le tele lava o gagana, e fausia aʻe upu i silapela. O silapela e fai aʻe i le tasi po o le sili atu foʻi o mataʻitusi lea e faaleo faatasi e pei o se upu e tasi. I gagana faapena, e masani lava ona faaleo silapela taʻitasi pe a e tautala, e ui lava e lē tutusa uma le auala e faamamafa ai. Afai e te manaʻo e faamanino atili lau tautala, faalemu ma fai le mea sili e te mafai e faaleo atu ai silapela taʻitasi. E ono foliga mai i le amataga ua soona faamamafa naʻuā, ae a o e faamasani e fai, o le a iʻu lava ina e maua le faagasologa lelei o le tautala. Ina ia sologa lelei, e lē taumatea o le a e taʻu faatasia nisi upu, ae e ao ona ʻalofia lenei mea pe afai e ono lē manino ai le uiga o upu.

O se manatu lapataʻi: Ina ia ati aʻe le lelei o au faaleoga, e te ono faataʻitaʻi ona tautala ma faitau i se uiga matuā mautinoa lava. Peitaʻi aua neʻi faatagaina lenā e avea ma uiga masani e te tautala ai. O le a na ona pei ai e faafoliga ma lē pei o le tulaga e masani ai.

Afai e fai sina vaivai o lou leo pe a e tautala, faamasani e ea faasaʻo i luga lou ulu ae aua e te soona punou tele i lalo. Afai o le Tusi Paia lea e te faitau mai ai, ia faamaualuga le tulaga e uu ai le tusi ina ia oo ai i le taimi e sii ai lau vaai mai i le aofia agaʻi i lau Tusi Paia, ae na o sina tamaʻi minoi lava e fai ai. O le faia faapea e faigofie ai ona e taʻua upu e aunoa ma se faalavelave.

O le faamasani e tuu ese atu faalogona lē toʻa e mafai foʻi ona faaleleia ai lau tautala. Ua iloa e le toʻatele e faapea o le lē toʻa i maso o foliga ma maso o loo puleaina lau mānava, e mafai ona iai ni aafiaga matuiā i le auala e tautala ai. O le lē toʻa lenā e mafai ona faalavelaveina ai faiga sologa lelei lea e ao ona iai i lou mafaufau, o totoga e fesootaʻi i le faaʻī, ma le puleaina o le mānava—o se faiga e tatau ona sologa lelei ma i se tulaga masani.

E ao i maso o le auvae ona faavaivai ina ia mafai ai ona tali atu i le faasinoga mai i le faiʻai. E ao foʻi ona faavaivai laugutu. E tatau ona nofo sauni le auvae ma laugutu ia vave ona faalautele atu ma faamimigi ina ia maua tonu ai le tele o leo ia e amata mai i le gutu ma le faaʻī. Afai e lē toʻa le auvae ma laugutu, o le a lē talafeagai foʻi le matala a le gutu, ona oo lea ina faaofi faamalosi mai le sau o le leo i le va o nifo. O le a iʻu ai i se tautala oolo, faasenanui, ma lē manino. Peitaʻi, o le faavaivai o le auvae ma laugutu, e lē o lona uiga o le fai ma masani le augatā i le faaleoina o upu. E manaʻomia e lenei mea ona faapaleni ma le masaniga o le atiina aʻe o leo ina ia manino ai faaleoga o upu.

I le iloiloina o lou tulaga, e te ono mātauina ai le aogā o le faitau leotele. Ia mātauina ma le totoʻa le auala o loo e faaaogāina ai vaega ofoofogia o le fofoga o loo faaaogā i le tautala. Pe o lava le matala o lou fofoga ina ia sau ai i fafo le leo o le tautala e aunoa ma le faalavelaveina? E ao ona e manatua, e lē na o le laulaufaiva le vaega o le fofoga e faaaogā mo le tautala e ui o se tasi lea o vaega e pito sili ona pisi. O le ūa, le auvae a lalo, o laugutu, o maso o foliga, ma maso o le faaʻī e tofu uma lava ma vaega e fai. A o e tautala, pe o foliga mai ea o loo e faia e aunoa ma le gaoioi ai o foliga? Afai o e faia faapea, e telē la se avanoa e ono lē manino ai lau tautala.

Afai e maua se laau puʻe leo, puʻe ai lou leo a o e tautala e pei ona masani ai, ia pei o loo e talanoa atu i se tasi pe a e auai atu i le faiva i le fanua. Ia puʻe ni nai minute o le tautala i se talanoaga. O le faalogologo atu i lenā tautalaga na puʻe o le a fesoasoani iā te oe e mātauina ai so o se faalētonu o loo iā te oe i le faaleoina manino o nisi o upu. Mātau tulaga o loo faanunumi, faasenanui, pe taʻu faapupuu ai le faaleoina o upu, ma taumafai e vaai po o le ā le māfuaaga. E masani lava ona faaleleia le sesē e ala i le galue i manatu e pei ona talanoaina i inei.

Pe e iai se faalētonu i lau tautala? Faataʻitaʻi ona tatala tele lou fofoga na i lo le mea e te masani ai, ma taumafai e fai ma le faaeteete au faaleoga. Faatoʻatoʻa ma ia tau lelei lau mānava, ma tautala faagesegese. O le faia faapea ua mafai ai ona manino ma faaleleia le tautala a le toʻatele o ē faalētonu le tautala. E ui lava atonu e lē o faaleleia atoatoa lou faafitauli, ae aua le faavaivai ai. Manatua na filifilia e Ieova Mose, o le tagata e foliga mai sa lē manino lana tautala, e faaoo atu feʻau tāua i tagata Isaraelu ma Farao o Aikupito. (Eso. 4:10-12) Afai e te naunau e fai, e na te faaaogāina foʻi oe, ma o le a ia faamanuiaina lau faiva ina ia taulau manuia.