Tāga ma Foliga Vaaia

O TAGATA mai i isi aganuu e saʻoloto lava i le faiga o tāga na i lo o i latou mai i isi talaaga. Ae ui i lea, o le mea moni lava, o tagata uma a talanoa e fesuisuiaʻi o latou foliga vaaia ma ni nai tāga. O le tulaga lenā e iai e lē gata i talanoaga totino ae atoa foʻi ma le talanoa atu i le lautele.

Sa avea o se mea masani iā Iesu ma ona uluaʻi soo le faia o tāga. I se tasi taimi, na lipoti atu e se tasi iā Iesu e faapea o loo fia talanoa lona tinā ma ona uso iā te ia. Na tali mai i ai Iesu: “O ai ea loʻu tinā? O ai foi oʻu uso?” Ona faaopoopo mai lea o le Tusi Paia e faapea: “Ona faaloaloa ai lea e ia o lona aao i ona soo, ua faapea atu, ‘Faauta, o loʻu tinā ma oʻu uso.’” (Mata. 12:48, 49) O isi faamatalaga i mea na tutupu, ua faaalia ai e le Tusi Paia i le Galuega 12:17 ma le 13:16 e faapea, sa avea o se mea masani i aposetolo o Peteru ma Paulo le faia o tāga.

O manatu ma faalogona e fesootaʻi e lē gata i le leo ae e faaalia foʻi e ala i tāga ma foliga vaaia. O le lē faaaogā lelei o nei mea e ono faailoa atu ai e faapea e lē o naunau mai lē o loo tautala. Peitaʻi afai e lelei ona faaaogāina nei auala o fesootaʻiga, o le a matuā faaleleia lava le uigā o le tautala. E tusa foʻi po o e talanoa i le telefoni, afai e lelei ona e faaaogāina tāga ma foliga vaaia, o le a faigofie ona faaoo atu e lou leo le tāua o lau feʻau atoa ai ma ou faalogona totino e faatatau i mea o loo e fai atu ai. O le mea lea, pe e te tautala e lē faavaea i le upu po o e faitau, po o autilo atu lau ʻaufaalogologo iā te oe po o autilo i a latou Tusi Paia, e tāua tele tāga ma foliga vaaia.

E ao ona avea au tāga ma ou foliga vaaia o se mea e te masani ai ae lē o se mea e aʻoina mai i se tusi. E lē taitai manaʻomia ona e aʻoaʻoina pe faapefea ona ʻata po o le faapefea foʻi ona ita. E ao foʻi ona faailoa atu e tāga faalogona o loo iā te oe. O le tele lava o le fai o au tāga e pei ona masani ai, o le sili atu foʻi lea ona lelei.

E lua ituaiga tāga e masani ai: faamatala ma le faamamafa. O tāga faamatala e faamatala mai ai se gaoioiga pe faaalia ai le lautele, le umi, le loloto, ma le maualuga faapea foʻi ma nofoaga. I le aʻoga, pe a e galue i le faaaogāina o tāga, aua le faamalieina oe i le na o le tasi pe lua ni tāga. Taumafai e fai tāga i se tulaga e pei ona masani ai a o faagasolo lau lauga. Afai e faafaigatā iā te oe ona faia faapea, e ono fesoasoani iā te oe pe a e suʻe mo ni upu o loo faailoa atu ai faasinoga, le mamao, le telē, le nofoaga, po o tulaga faapena. Peitaʻi, i le tele lava o tulaga, na pau lava le mea e manaʻomia ona e faia o le faamasani i lau lauga, aua le popole i le foliga atu o le a iai, ae tautala atu ma fai mea e pei ona e faia i aso faisoo. Afai e toʻafilemu le tagata, e faigofie lava ona fai tāga e pei ona masani ai.

O tāga faamamafa e faamatala atu ai faalogona ma talitonuga mautinoa. E faamatilatilaina, faamautūina, ma faamalosia ai taofi. E tāua tāga faamamafa. Peitaʻi ia faaeteete! E faigofie lava ona avea tāga faamamafa o se ituaiga o amioga ua fai ma masani. Afai e te faaaogāina pea lava pea le tāga lava e tasi, e ono amata ona tataʻi atu i ai manatu na i lo le faamamaluina ai o lau lauga. Afai e faailoa atu e la outou ovasia o le aʻoga e faapea o lou faafitauli lea, taumafai la e faaaogā na o tāga faamatala mo sina taimi. A uma sina taimi, ona amata foʻi lea ona toe faaaogā tāga faamamafa.

Ina ia fuafuaina le tele e te ono faaaogā ai tāga faamamafa atoa ma ituaiga tāga e talafeagai, manatunatu i faalogona o i latou o loo e talanoa atu i ai. O le faasino saʻo atu o lou lima i le aofia i le faia o se tāga, atonu e lē lelei ai o latou faalogona. I nisi aganuu afai e tuu le lima o se tama i lona gutu ina ia faaalia ai le ofo, e manatu i ai o se faafāfine. I nisi vaega o le lalolagi, e manatu i ai o se faamaualuga mo fafine le soona faaaogā soo o o latou lima e fai ai a latou tāga. O lea la, o nofoaga na e manaʻomia faapitoa ai lava i tuafāfine ona faaaogā lelei o latou foliga vaaia e faamatala atu ai se mea. I le toetoe lava o vaega uma o le lalolagi, o le faia i luma i se vaega toʻalaiti, o ni tāga ua ova atu ma le tulaga e tatau ona iai, e ono manatu i ai o se fia mālie.

A o e mauaina le poto masani ma faasolo ina faigofie ona e tautala, so o se tāga faamatala lava e te faaaogāina o le a faigofie lava ona faailoa atu ai ou faalogona moni, e faataʻitaʻia atu ai lou talitonuga mautinoa ma lou faamaoni. O le a faaopoopo atu ai le uigā i lau tautala.

Le Faailoaga i Ou Foliga. Na i lo se isi lava vaega o le tino, e masani lava o ou foliga e tele ina faailoa atu ai ou faalogona moni lava o iai. O ou mata, o foliga o lou gutu, o le femilosaʻi solo o lou ao e iai uma lava sa latou vaega e fai. E aunoa ma se upu e fai atu, e mafai e ou foliga ona faailoa atu ai se uiga faalēano, ʻinoʻino, lē mautonu, maofa, po o le fiafia. Pe afai e avatu faatasi na foliga vaaia ma se upu o loo fai, e faaopoopo atu ai le uigā o lagona ma le vaaiga. Ua tuuina e Lē na Foafoaina Mea se fetaulaʻiga tele o maso i ou foliga—e sili atu i le 30 lona aofaʻiga. E toetoe lava o le ʻafa o nei maso e faaaogā pe a e ʻataʻata.

Pe e te i le pulelaa po o e auai i le faiva i le fanua, o loo e taumafai malosi e tufa atu i tagata le feʻau lea e logolelei, o se feʻau e faafiafiaina ai o latou loto. E mafai ona faamautinoa atu lenā mea e se ʻataʻata māfana. I le isi itu, afai e aunoa ou foliga ma ni uiga faaalia, e ono fesiligia ai i lea tulaga lou faamaoni.

E sili atu i lenā, o se ʻataʻata e taʻu atu ai i isi e faapea o loo iā te oe ni faalogona agalelei iā i latou. E faapitoa lava le tāua o lenā mea i nei aso, lea ua masani ona fefefe ai tagata i tagata e lē masani ai. O lou ʻataʻata e mafai ona fesoasoani i tagata ina ia toʻafimālie ma atili ai ona tali lelei mai i mea o loo e fai atu ai.