Uiga Faatalanoa

E MASANI lava ona lagona le toʻafimālie o tagata pe a talanoa ma uō. E lē muaʻi faatulagaina a latou faaupuga e fai. O nisi e tiotio; o isi e tau lē tautatala. Po o le ā lava le tulaga, e tosina isi i le auala masani e tautatala ai.

Peitaʻi, pe a faalatalata atu i se tasi e te lē masani ai, e lē talafeagai ona tautala atu i se uiga ua soona masani naʻuā, ia po o le lē faaaloalo foʻi i ai. O le mea moni lava ia, i nisi aganuu o talanoaga ma tagata e lē masani ai e ao lava ona amata i se uiga faaaloalo. A uma loa ona faaali atu le faaaloalo e tatau ai, atonu i se uiga faautauta e talafeagai ona faaitiitia gagana faaaloalo ae faaaogā se uiga faatalanoa.

Pe a e tautala atu mai i le pulelaa, e ao foʻi ona e faaalia le faaeteete. O se uiga lē faaaloalo e aveesea ai le mamalu mai i se sauniga faa-Kerisiano atoa ma le tāua o mea o loo taʻua. I nisi gagana, e iai faaupuga e manaʻomia pe a talanoa atu i se tagata matua, se faiaʻoga, se tagata ofisa, po o se matua. (Mātau faaupuga o loo faaaogā i le Galuega 7:2 ma le 13:16.) E ese foʻi faaupuga e faaaogā pe a talanoa atu i se paaga faaipoipo po o se uō vavalalata. E ui lava o le uiga tatou te talanoa ai mai le pulelaa e lē tatau ona soona sasalu naʻuā, ae e ao ona faaaloalo.

Peitaʻi, e iai vala e ono faapogaia ai se taulimaga a se tagata e foliga mai ai ua sasalu naʻuā. O se tasi o nei mea moni o le faatulagaina lea o fuaiupu, po o se fasi fuaiupu. E tulaʻi mai se faafitauli pe a taumafai se failauga e toe taʻua faaupuga e pei lava ona tusia ai. E masani ona matuā ese lava upu e tusia na i lo upu e tautala ai. E saʻo, o suʻesuʻega loloto i sauniuniga mo se lauga e masani lava ona fai e faaaogā ai manatu ua uma ona lomia. Atonu foʻi po o se auivi ua saunia e faavae ai le lauga. Afai o le a e faamatalaina manatu i le auala e pei lava ona tusia ai po o le faitau saʻo mai foʻi i se auivi ua lomia a o fai le lauga, e lē mafai ona foliga mai lau tautala e faatalanoa. Ina ia faatumauina se faiga faatalanoa, faamatala manatu i au lava upu ma ʻalofia ituaiga fuaiupu e fenumiaʻi ona fai.

O le isi vala o le fesuisuiaʻi o le saosaoa o le tautala. O le tautala e tele i le upu i le upu ma sasalu naʻuā e masani ona aofia ai le faasologa o upu e tutusa lelei le tulaga e iai, ma taotasi lava i le saosaoa e tasi. I talanoaga e masani ai, e fesuisuiaʻi le saosaoa ma mānavaga e eseese le uumi.

Peitaʻi, pe a e talanoa atu i se aofia toʻatele, e ao ona e faafesootaʻia le faiga faatalanoa ma le leo tele, le malosi, ma ia aasa ina ia faatumauina ai lo latou uaʻi mai.

Ina ia mafai ona iai se uiga faatalanoa lea e talafeagai i le faiva, e manaʻomia ona e fai ma masani le tautala lelei i aso uma. E lē o le uiga o lenei mea faapea e ao ona maualuga au aʻoaʻoga. Peitaʻi e lelei ona ati aʻe se masaniga o le tautala lea o le a faapogaia ai isi e faalogo atu ma le faaaloalo i mea o loo e fai atu ai. I le manatunatu i lenā mea, iloilo pe e te lē manaʻomia ona galue i manatu o loo taʻua i inei i lau talanoa i aso taʻitasi.

1. Ia ʻalofia faaupuga e faaleagaina ai le kalama lelei, ia po o le ono faailogaina faatasi ai oe ma tagata o ē o o latou olaga o ola ai ua faaleagaina ai tapulaa faale-Atua. I le ōgatusa ma le fautuaga i le Kolose 3:8, ia ʻalofia gagana paaa ma matagā. I le isi itu, e lē leaga le tautala e pei ona masani ai i aso faisoo. O le talanoa e pei ona masani ai, po o faaupuga i aso faisoo, e talafeagai ae ia fai i le tulaga e talafeagai ai le tautala.

2. Ia ʻalofia le toe taʻu e lē aunoa o le faaupuga lava e tasi ma fasi fuaiupu ina ia faamatala ai ni ou manatu eseese o loo iai. Ia faamasani e faaaogā upu e faamatala manino ai le mea o loo e uiga i ai.

3. Ia ʻalofia le toe taʻua e aunoa ma se māfuaaga o faaupuga e ala i le mafaufau muamua i le mea o loo e manaʻo e fai atu ai; ona amata lea ona tautala.

4. Ia ʻalofia le natiaina o manatu lelei ona o le tele naʻuā o upu. Ia faamasani e faamanino le taʻuaina i se fuaiupu faigofie o le manatu o loo e manaʻo ia manatua.

5. Tautala i se uiga e faaalia ai le faaaloalo mo isi.