Toe Taʻua mo Faamamafa

O LE aʻoaʻo atu ma le uigā, e aofia ai le faaaogā o le toe taʻua o se mea. Pe a toe taʻua e sili atu i le faatasi se manatu tāua, o le a faigofie atu la ona manatua e i latou o i le aofia. Afai e toe taʻua se manatu i se isi auala e ese laʻitiiti, atonu o le a atili manino ai ona latou malamalama.

Afai e lē o manatua e lau ʻaufaalogologo au tala, o le a lē taaʻina la e au upu mea o loo latou talitonu po o le auala o loo latou ola ai. Atonu o le a faaauau ona latou mafaufau i manatu sa faapitoa ona e faamamafaina.

Ua faataatia e Ieova, lo tatou Faiaʻoga Silisili, se faaaʻoaʻoga mo i tatou i lona faaaogāina o le toe taʻua o mea. Na ia tuuina atu Tulafono e Sefulu i le nuu o Isaraelu. I le fetalai atu e ala i se agelu, na ia faapotopoto ai le nuu ina ia faalogo i na tulafono i le Mauga o Sinai. Mulimuli ane, sa ia tuuina atu iā Mose na tulafono ua uma ona tusia. (Eso. 20:1-17; 31:18; Teu. 5:22) Ona o le afioga a Ieova, na toe taʻu atu ai e Mose na tulafono i le nuu, a o leʻi ulu atu i latou i le Nuu o le Folafolaga, ma e ala i le agaga paia, na saunia ai e Mose se faamaumauga o lenā tala, e pei ona iai i le Teuteronome 5:6-21. Mai le tele o tulafono sa tuuina atu iā Isaraelu, na avatu ai foʻi ma le manaʻoga ina ia latou alolofa ma auauna iā Ieova ma o latou loto atoa, agaga atoa, ma le malosi atoa. O lenā mea sa toe taʻua i le tele o taimi. (Teu. 6:5; 10:12; 11:13; 30:6) Aiseā? Auā, e pei ona sa fetalai Iesu, “o le poloaiga muamua lena ma le sili.” (Mata. 22:34-38) E ala i le perofeta o Ieremia, na toe faamanatu atu ai e Ieova i le nuu o Iuta mo le sili atu i le 20 taimi, le tāua o le usiusitai atu iā te ia i mea uma sa faapea ona ia poloaʻiina ai i latou. (Iere. 7:23; 11:4; 12:17; 19:15) Ma e ala iā Esekielu, na fetalai atu ai le Atua mo le sili aʻe i le 60 taimi i nuu uma, “ona iloa ai lea e i latou o aʻu o Ieova.”—Eseki. 6:10; 38:23.

I faamaumauga o le faiva a Iesu, ua tatou mātauina ai foʻi le faaaogā ma le uigā o le toe taʻua o mea. O loo iai, mo se faaaʻoaʻoga, Evagelia e fā—o loo taʻitasi ma faamatala ai mea tāua na tutupu, sa lipotia mai e se toʻatasi po o isi o Evagelia, ae o loo tagaʻi i ai i na mea mai se isi itu e ese. I lana aʻoaʻo atu, sa faamatala ai e Iesu se manatu faavae tau aʻoaʻoga e tasi, e sili atu i le faatasi ae i ni auala eseese. (Mare. 9:34-37; 10:35-45; Ioa. 13:2-17) Ma a o iai i luga o le Mauga o Olive mo ni nai aso a o leʻi oo i lona maliu, sa faaaogā ai e Iesu le toe taʻua o mea ina ia faamamafa ai lana fautuaga tāua e faapea: “Ia outou mataala, . . . auā tou te le iloa po o le fea aso e sau ai lo outou Alii.”—Mata. 24:42; 25:13.

I le Faiva i le Fanua. Pe a e molimau atu i tagata, e te faamoemoe o le a latou manatuaina au tala. O le faaaogā ma le uigā o le toe taʻua o mea, e mafai ona fesoasoani ina ia ausia ai lenā sini.

I se tulaga faifai pea, o le toe taʻua o se manatu i le taimi o loo talanoaina ai se mataupu, o le a fesoasoani lea e tāmau ai i le mafaufau o se tagata. O lea, a māeʻa ona faitau se mau, e mafai ona e faamamafaina e ala i le faasino atu i sona vaega autū ma fesili atu, “Pe na e mātauina le auala o loo faaupu ai le mau?”

E mafai foʻi ona faaaogā ma le uigā fuaiupu mulimuli o se talanoaga. Mo se faaaʻoaʻoga, e te ono faapea atu: “O le manatu tāua o loo oʻu faamoemoe ina ia e manatuaina mai le ta talanoaga, o le . . . ” Ona toe taʻua loa lea. Atonu e faapenei: “O le fuafuaga a le Atua ia suia le lalolagi e avea ma parataiso. O lenā fuafuaga e mautinoa o le a faataunuu.” Pe atonu e faapea: “Ua faailoa manino mai e le Tusi Paia lo tatou ola i aso e gata ai o lenei faiga o mea. Afai e fia faasaoina i tatou mai i lona iʻuga, e ao la ona tatou aʻoaʻoina mea o loo manaʻomia e le Atua mai iā i tatou.” Po o le faapea atu foʻi: “E pei ona tatou vaaia, o loo ofoina mai e le Tusi Paia fautuaga aogā i le auala e foʻia ai faafitauli i olaga faaleaiga.” I nisi tulaga, atonu na o lou toe taʻua lava o se manatu e sii mai le Tusi Paia, e fai ma manatu e ao ona manatua. O le mea moni, ina ia uigā le faia faapena e manaʻomia ai le muaʻi manatunatu.

I le faia o toe asiga, atoa ai ma suʻesuʻega faale-Tusi Paia, o le faaaogā o le toe taʻua o mea e mafai ona faaaofia ai fesili autalu.

Pe a faafaigatā i se tagata ona malamalama pe faatatauina se fautuaga a le Tusi Paia, atonu e manaʻomia ona e toe taʻua le mataupu mai lea taimi i lea taimi. Ia taumafai e faamatala atu i ni itu eseese. E lē manaʻomia ona faauumi talanoaga, ae e ao ona faalaeiau ai le tagata aʻoga ina ia mafaufau pea i le mataupu. Ia manatua, sa faaaogā e Iesu lenei auala o le toe taʻua o mea, ina ia fesoasoani ai i lona ʻausoo e foʻia le faanaunauga o le fia sili.—Mata. 18:1-6; 20:20-28; Luka 22:24-27.

Pe a Faia Lauga. Pe a faia au lauga mai le pulelaa, o lou sini e lē tau ina faailoa atu o faamatalaga. E te manaʻo i le aofia ina ia malamalama i ai, ia manatua, ma ia faatatauina. Ina ia taulau lenā mea, ia faaaogā lelei le toe taʻua o mea.

Ae peitaʻi, afai e te toe taʻua soo manatu tāua, atonu o le a faasolo ina lē toe uaʻi mai ai lau aofia. Ia fili ma le faaeteete manatu e tatau ona faamamafa faapitoa. O manatu autū na e masani ona fafau aʻe ai lau lauga, ae atonu o loo faaaofia ai foʻi ma isi manatu e aogā faapitoa i lau aofia.

Ina ia faaaogā le toe taʻua o mea, atonu e muamua ona e otooto atu au manatu tāua i le faatomuaga. Ia faia faapea i ni fuaiupu pupuu lea o le a saunia ai se aotelega atoa o mea o le a e talanoaina, i fesili, po o ni faaaʻoaʻoga e faatulaʻi atu ai ni faafitauli e manaʻomia ona foʻia. Atonu e te taʻua le aofaʻiga o manatu tāua o loo iai, ma faasolosolo ona faailoa atu. Ona faalautele lea o na manatu taʻitasi i le tino o lau lauga. E mafai ona faamalosia faamamafaga i le tino o lau lauga e ala i le toe taʻua o manatu tāua taʻitasi a o leʻi see atu i le isi manatu tāua. Po o le faataulau foʻi e ala i le faaaogā o se faaaʻoaʻoga e faaaofia ai le faatatauga o le manatu tāua. E mafai ona faamamafa atili au manatu tāua i le faaaogā o se upu faaiʻu e toe taʻua ai, faamatilatila e ala i le faaaogā o eseesega, taliina o fesili sa lāgā, po o le faailoaina puupuu atu o ni vaifofō i faafitauli sa faamatalaina.

E lē gata i mea ua taʻua i luga, ae o se failauga tomai na te mātau ma le faaeteete tagata taʻitoʻatasi o loo iai i lana aofia. Afai o faafaigatā i nisi o i latou ona malamalama i se manatu, o loo iloa e le failauga. Afai e tāua le manatu, o le a ia toe faamatalaina. Ae peitaʻi, o le toe taʻua o na lava upu e tasi, atonu o le a lē taulau ai lana fuafuaga. E tele mea e aofia ai i le aʻoaʻo atu na i lo o lenā. E tatau ona ia fetuutuunaʻi. Atonu e manaʻomia ona ia faia ni faaopoopoga e leʻi fuafuaina i lana lauga. O lou iloa ona feagai ma manaʻoga o le aofia i lenei auala o le a matuā faamautinoa atili ai lou uigā o se faiaʻoga.