Faamatilatila Atu Manatu Autū

O Ā LA manatu autū o se lauga? Ua lē tau o ni vala mananaia ia e ao ona taʻua puupuu. O manatu tāua ia e ao ona umi se taimi e faalauteleina ai. O manatu ia e matuā aogā i le ausiaina o lou sini.

O se ki i le faamatilatilaina o manatu autū, o lou filifilia ma le tuufaatasia lea o le mataupu i se faiga atamai. O le faia o saʻiliʻiliga loloto mo se lauga e masani ona maua ai le tele o faamatalaga e mafai ona faaaogā. E mafai faapefea ona e filifilia po o ā faamatalaga e faaaogā?

Muamua, ia manatunatu i lau aofia. Pe augapiu ea ma so latou iloa i lau mataupu, pe ua latou masani lelei i ai? Po o le toʻatele ea o i latou e ioe i faamatalaga a le Tusi Paia e uiga i ai, po o iai nisi e masalosalo? O ā ituaiga o luʻi latou te fesagaʻi i le olaga i aso taʻitasi, pe a latou taumafai malosi e faatatau faamatalaga a le Tusi Paia e uiga i le mataupu? Lona lua, ia faamautinoa ua e malamalama lelei i le mea o loo e manaʻo e faataunuu, e ala ai ona talanoa atu i lenā aofia i le mataupu ua e fuafua e faaaogā. I le faaaogāina o na taʻiala e lua, iloilo le mataupu ma taofi na o faamatalaga e fetaui lelei.

Afai ua avatu iā te oe se auivi masani o loo iai le matua ma manatu autū, e ao la ona e tausisi i ai. Peitaʻi ane, o le aogā o mea o le a e taulimaina o le a matuā siitia, pe afai e te manatua mea sa taʻua i luga pe a faalauteleina manatu autū taʻitasi. A leai se auivi na avatua, e faitalia la oe ma filifili manatu autū.

Pe afai ua manino iā te oe au manatu autū ma ua uma foʻi ona tuufaatasia ai i lalo auʻiliʻiliga, o le a faigofie la iā te oe ona tauaao lau lauga. E foliga mai, e tele ni aogā o le a maua ai e lau aofia.

Auala Eseese e Tuufaatasia ai Lau Mataupu. E eseese metotia e mafai ona tuufaatasia ai le tino o lau lauga. A o e faamasani atu i ai, o le a e iloa ai le uigā o nisi o metotia, e faalagolago i le mea o loo e manaʻo e faataunuu.

O se metotia e fetuunaʻi e aofia ai le vaevaeina i ulutala. (E manaʻomia manatu autū taʻitasi auā o le a fesoasoani lea i le malamalama o lau ʻaufaalogologo i le mataupu pe ina ia ausia ai le sini o lau lauga.) O le isi metotia, o le faasolosolo lea i taimi na tutupu ai. (Mo se faaaʻoaʻoga, e faamuamua mea na tutupu a o leʻi oo mai le Lolo, sosoo atu ai ma mea na tutupu a o leʻi faaumatiaina Ierusalema i le 70 T.A., ona sosoo atu ai lea ma mea o loo tutupu i o tatou aso.) O le metotia lona tolu, o māfuaaga ma aafiaga. (E mafai ona faalautele lenei metotia i so o se itu. Mo se faaaʻoaʻoga, e mafai ona e amata i se tulaga o loo iai i le taimi lenei, le aafiaga, ona faailoa atu lea o le māfuaaga.) O le metotia lona fā, e aofia ai le tuufaafeagai. (Atonu e te faailoa atu ni itu e lelei ai ma leaga ai, po o le mautinoa ma le lē mautinoa.) I nisi taimi e sili atu i le tasi se metotia o le a faaaofia i se lauga.

Ina ua tuuaʻia sesē Setefano i luma o le ʻau Saniterini Iutaia, na ia avatu ai se lauga malosi sa faavae i se metotia o le faasolosolo o manatu i taimi na tutupu ai. A o e faitau i ai i le Galuega 7:2-53, seʻi mātau o manatu na filifilia sa matuā aogā lava. Sa muamua ona faamanino atu e Setefano e faapea, na ia faamatalaina se talafaasolopito sa lē mafai ona faafitia e lana aofia. Ona ia faasino atu lea, e ui ina sa teena Iosefa e ona uso, ae na faaaogā o ia e le Atua e saunia ai le faaolataga. Sa sosoo ai ma lona faailoa atu o le lē usiusitai o tagata Iutaia iā Mose, o lē na faaaogā e le Atua. Na faaiʻu lana lauga i le faamatilatila e faapea, o se agaga faapena sa faaalia e tagata Iutaia i augātupulaga ua mavae, sa faaalia foʻi e i latou na fasiotia Iesu Keriso.

Aua le Tele Naʻuā Manatu Autū. E lē tele naʻuā ni manatu tāua e manaʻomia i le faalauteleina o so o se matua. I le tele o tulaga, e masani lava e lē sili atu i le lima. Ua moni lenā e tusa lava pe e te talanoa mo se 5 minute, 10 minute, 30 minute, pe mo se taimi umi foʻi. Aua neʻi taumafai e faamatilatila ni manatu autū se tele. E itiiti ni nai manatu eseese e mafai ona puʻepuʻe maua e lau aofia mai se lauga e tasi. Ma o le umi o le lauga, o le tatau foʻi lenā ona iloga ma sili atu ona manino le faamatalaina o manatu autū.

E tusa lava pe fia manatu autū e te faaaogā, ia mautinoa ua māeʻaeʻa lou faalauteleina o manatu taʻitasi. Ia lava se taimi e tuu atu i le aofia mo le iloiloina o manatu autū taʻitasi ina ia tāmau ai i o latou finagalo.

E ao ona mātaulia mai e lau aofia le faigofie o lau lauga. O le a lē faalagolago lenei i taimi uma i le telē o le mataupu e taulimaina. Afai ua manino le tuufaatasia o ou manatu i lalo o ni nai ulutala autū ma ua e faalauteleina taʻitasi na manatu, o le a faigofie la ona mulimuli le aofia i le lauga ma o le a faigatā ona faagaloina.

Ia Faamatilatila Atu Manatu Autū. Afai ua lelei ona tuufaatasia lau mataupu, e leai la se faigatā o le toe faamausalīina atili o le uiga tāua o manatu autū e ala i lau taulimaga.

O le auala silisili e faamatilatila ai se manatu autū, o le avatu lea o ni manatu e faamaonia ai, ni mau, atoa ai ma isi mea i se auala o le a faapea ona faauaʻi atu ai e na mea i le manatu autū ma faalauteleina ai. O manatu lagolago uma e ao ona faamanino, faamaonia, pe faalauteleina ai le manatu autū. Aua neʻi faaopoopo atu fua i ai ni manatu e lē fesootaʻi ona e faapea e faaosofia ai le naunau. A o e faalauteleina manatu lagolago, ia faailoa manino atu lo latou fesootaʻiga i le manatu autū o loo latou lagolagoina. Aua neʻi tuua e faitalia le aofia ma faafesootaʻi. E mafai ona faailoa atu le fesootaʻiga e ala i le toe taʻua o upu iloga o loo faaleo atu ai le manatu autū, po o le toe taʻua o le aano moni o le manatu autū mai lea taimi i lea taimi.

O nisi failauga latou te faamatilatilaina manatu autū e ala i le faanumeraina o manatu. E ui o se tasi lenā o auala e faamatilatila atu ai manatu autū, ae e lē tatau ona tuu ai fua le filifilia ma le faaeteete ma le faalauteleina talafeagai o le mataupu.

E mafai ona e filifili e taʻua lau manatu autū i le amataga, a o leʻi faailoaina atu faamatalaga e lagolagoina ai. O le a fesoasoani lenā i le aofia e talisapaia ai le tāua o faamatalaga o loo sosoo mai, ma o le a faamamafa ai foʻi lenā manatu autū. E te ono toe faamausalīina le manatu e ala i le aoteleina pe a māeʻa ona faalauteleina atoatoa.

I le Faiva i le Fanua. O taʻiala ua talanoaina i luga e faatatauina e lē gata i lauga aloaʻia ae faapena foʻi i au talanoaga i le faiva i le fanua. Pe a sauniuni, ia manatunatu i so o se tulaga tāua o loo i finagalo o tagata i lenā vaipanoa. Ia filifili se matua e mafai ona maua ai se avanoa e faailoa atu ai pe faapefea i le faamoemoe ua ofo mai e le Tusi Paia ona foʻia ai lenā faafitauli. Atonu e fili ni manatu autū se lua ina ia faalauteleina ai lenā matua. Ia faamautū po o ā mau o le a e faaaogā e lagolagoina ai na manatu. Ona fuafua lea pe faapefea ona amata lau talanoaga. O se sauniuniga faapena o le a mafai ai ona faia se fetuutuunaʻiga pe a manaʻomia i le talanoaga. O le a fesoasoani foʻi lenā iā te oe ina ia taʻu atu ai se mea o le a faapea ona manatua e tagata o aiga.