Toe Autalu Manatu Tāua

Pe e iai se taimi e faigatā ai ona e manatua mea na e suʻesuʻeina? O i tatou uma lava e tupu ai lenā mea mai i lea taimi i lea taimi. O le ā e mafai ona fesoasoani iā i tatou? Ia toe autalu manatu tāua.

A o faia au lava suʻesuʻega, ia fai ma taofi pe a tau atu i se manatu tāua, ma faaalu se taimi e manatunatu po o le ā ua e aʻoaʻoina mai ai. Ia mātau le auala na fesoasoani ai le aposetolo o Paulo i uso ma tuafāfine e faia ai lenā mea, ina ua ia faapea atu: “O le manatu autū lenei.” (Epe. 8:1) O lenā auala, na mafai ai ona ia fesoasoani iā i latou ia malamalama i le uiga o mea o loo ia fai atu ai ma le auala e fesootaʻi ai manatu uma.

Pe a māeʻa au suʻesuʻega, atonu e mafai ona e faaalu se taimi pe sefulu minute, e manatunatu ai i manatu tāua mai i mea sa e suʻesuʻeina. Pe afai e te lē manatua na manatu, toe vaai i tamaʻi ulutala po o fuaiupu muamua o palakalafa taʻitasi. Pe a iai se manatu fou e te aʻoaʻoina, ia taumafai e faamatala i au lava upu. O lou autaluina o manatu tāua, e lē gata o le a fesoasoani iā te oe e toe manatua ai mea sa e suʻesuʻeina, ae o le a e malamalama lelei ai foʻi i le auala e mafai ona faatatauina ai i lou olaga.