Saʻo Aʻiaʻi o Faamatalaga

AISEĀ e ono faia ai e se Kerisiano se faamatalaga e lē moni? Atonu e na te toe taʻua se mea sa ia faalogo i ai, e aunoa ma le faamautinoaina o mea moni. Pe atonu ua ova lona faamatalaina o se mataupu, ona e aunoa ma lona iloa, sa sasi lana faitau i le mataupu na ia maua mai ai faamatalaga. Pe a tatou uaʻi atu ma le faaeteete ina ia saʻo aʻiaʻi e tusa lava po o ni nai mataupu laiti, o le a iloa la e la tatou aofia e mafai ona latou talitonuina le moni aʻiaʻi o vala e sili ona tāua o la tatou feʻau.

I le Faiva i le Fanua. I le iloaina o loo tele pea mea e ao ona latou aʻoaʻoina, ua fefefe ai le toʻatele e amata i le faiva i le fanua. Ae peitaʻi, e vave ona iloa e i latou nei e mafai ona latou molimau atu ma le uigā, e tusa lava pe ua na o sina poto faavae o le upu moni ua iā i latou. E faapefea? O le ki o sauniuniga.

A o leʻi auai i le faiva i le fanua, ia faamasani i le mataupu o loo e manaʻo e talanoaina. Taumafai e manatunatu i ni fesili e ono lāgā e lau ʻaufaalogologo. Ia saʻili ni tali faamalieloto mai le Tusi Paia. O inā o le a sauniunia ai oe e avatu ni tali saʻo i se auala toʻafilemu. Po o le a e faia ea se suʻesuʻega faale-Tusi Paia? Toe autalu ma le faaeteete le mataupu o le suʻesuʻega. Ia faamautinoa ua e malamalama i faavae faale-Tusi Paia mo tali i fesili ua lomia.

Ae ā pe a fesiligia e le tagata o le aiga po o se aumea faigaluega se fesili e te leʻi sauni e tali? Afai e te lē o mautinoa i mea moni, aua le taumateina. “E manatunatu le loto o lē amiotonu, ina ia fai se tali.” (Faata. 15:28) Atonu o le a e maua le fesoasoani o loo e manaʻomia i le tusi o le Reasoning From the Scriptures po o le “Mataupu o le Tusi Paia mo Talanoaga” pe afai o loo maua i lau gagana. Afai e lē o iai iā te oe se tasi o na tusi, ia talosaga atu seʻi faia ni au saʻiliʻiliga loloto ona toe foʻi atu ai lea. Afai e faamaoni lē na fesili ane, o le a lē āfaina la iā te ia le faatali mo le tali saʻo. O le mea moni, atonu o le a matuā faateʻia o ia ona o lou lotomaulalo.

O le galulue faatasi ma isi tagata talaʻi agavaa i le faiva i le fanua, e mafai ona fesoasoani iā te oe ina ia atiina aʻe ai le tomai i le taulimaina ma le tonu o le Afioga a le Atua. Mātau mau o loo latou faaaogāina ma le auala o loo latou felafolafoaʻi ai i na mau. Ia talia ma le lotomaulalo so o se fautuaga po o se faasaʻoga latou te ofoina mai. Sa maua e le soo maelega o Apolo ni aogā i fesoasoani mai isi. Na faamatalaina e Luka, Apolo o sē e “mau upu,” e “poto,” ma e “malosi foi lona loto,” o se tagata e “tautala atu o ia ma matuā aʻoaʻo atu ma le saʻo i mea e uiga ia Iesu.” Ae peitaʻi, sa leʻi lava lona malamalama. Ina ua mātau e Pisila ma Akula lenā mea, ona la “ave lea ia te ia, ma faamatala [“saʻo,” NW] atu atili le ala o le Atua ia te ia.”—Galu. 18:24-28.

“Uumau i le Afioga Faamaoni.” O a tatou taulimaga i sauniga, e ao ona atagia atu ai le faaaloalo loloto mo le matafaioi a le faapotopotoga o se “poutu foi lea ma le lagolago o le upu moni.” (1 Timo. 3:15) Ina ia taofi mau i le upu moni, e tāua ona tatou malamalama i le uiga o mau ua tatou fuafua e faaaogā i lauga. Ia manatunatu i faamatalaga o loo siʻomia ai ma le fuafuaga o mau.

O mea e te fai atu ai i se sauniga a le faapotopotoga atonu o le a toe taʻua. O le mea moni, “o mea e tele e sese ai i tatou uma.” (Iako. 3:2) Peitaʻi, o le a e maua aogā i le atiina aʻe o uiga masani o le a faapea ona saosaolaumea i tautalaga saʻo. O le toʻatele o uso ua tusia o latou suafa i le Aʻoga o le Faiva Faatiokarate, e mulimuli ane avea ma toeaina. Ua faatalitalia “mea e sili ona tele” mai iā i latou ua tofia i na avega tauave. (Luka 12:48) Afai e avatu ma le lē faaeteete e se toeaina se fautuaga sesē e faapea ona oo ai ni faafitauli matuiā i ni sui o le faapotopotoga, e ono oo i lenā toeaina le toʻasa o le Atua. (Mata. 12:36, 37) O lea, o se uso ua agavaa e avea o se toeaina e tatau ona iloa e tagata uma lona “uumau i le afioga faamaoni e tusa ai ma lona tomai o le aʻoaʻo atu.”—Tito 1:9, NW.

Ia faaeteete ina ia ōgatasi au faaiʻuga ma le “matua o upu e ola ai” o loo faapea ona faaalia atoa i upu moni faale-Tusi Paia. (2 Timo. 1:13) E lē tatau ona e mataʻu ai i lenā mea. Atonu o tau faamāeʻa ona e faitau i le Tusi Paia atoa. Ia faaauau pea ona fai. Ae i le taimi nei, seʻi mātau le auala e mafai ai e fautuaga o loo mulimuli mai ona fesoasoani iā te oe, ina ia iloiloina ai le mataupu o loo e mafaufau e faaaogā i lau aʻoaʻo atu.

Muamua, ia fesili ifo iā te oe lava: ‘Po o lenei ea mataupu e ōgatasi ma mea ua uma ona ou aʻoaʻoina mai le Tusi Paia? Po o le a tosina atu ai ea laʻu ʻaufaalogologo iā Ieova, po o le a faasilisilia ai le atamai o le lalolagi, ma faalaeiauina ai tagata ina ia taʻitaʻia ai e lenā atamai?’ Na fetalai Iesu: “O lau afioga o le upu moni lea.” (Ioa. 17:17; Teu. 13:1-5; 1 Kori. 1:19-21) O le isi, ia faaaogā lelei lomiga mo suʻesuʻega ua saunia e le vasega o le auauna faamaoni ma le mafaufau. O le a fesoasoani lea iā te oe, e lē gata e malamalama tonu ai i mau ae ia faatatau ai foʻi i se auala paleni ma talafeagai. Afai e faavae au lauga i “matua o upu e ola ai” ma faalagolago i le auala o fesootaʻiga a Ieova pe a faamalamalama ma faatatauina mau, o le a saʻo la au faamatalaga.

Siaki le Saʻo Aʻiaʻi o Faamatalaga. O tala i mea fou o loo tutupu, o tala e toe sii mai i ni faamatalaga na taʻua muamua, ma ni mea na tutupu, e mafai ona aogā pe a e faataʻitaʻia ma faatatauina nisi o manatu autū. E mafai faapefea ona e faamautinoa e saʻo na faamatalaga? O se tasi o auala, o le maua mai lea o na faamatalaga mai ni puna e maufaatuatuaina. Ia manatua e toe siaki pe faamata e fou na faamatalaga. E faasolo ina tuai fuainumera; e vave ona toe faaleleia atili suʻesuʻega faasaienisi, ma a o tuputupu aʻe le malamalama o le tagata i le talafaasolopito ma gagana anamua, e toe manaʻomia foʻi ona vaʻiliʻilia faaiʻuga sa faavae i le poto faatoʻā mavae atu. E ao ona matuā faaeteete pe afai e te mafaufau e faaaogā faamatalaga mai nusipepa, televise, leitiō, imeli, po o le Initineti. Ua fautua mai le Faataoto 14:15: “O le ua faigofie [“leai se poto masani,” NW], e talia e ia upu uma; a o le ua mafaufau, ua faautauta o ia i lona ala. Fesili ifo iā te oe lava: ‘Po o lenei ea puna o faamatalaga ua lauiloa i le saʻo aʻiaʻi? Po o iai nisi mea e mafai ona faamaonia ai le moni o le faamatalaga? Afai e te masalosalo i le moni o se faamatalaga, aua le faaaogāina.

E faaopoopo i le siakiina o le maufaatuatuaina o puna o faamatalaga, ia iloilo ma le faaeteete le auala ua e fuafua e faaaogā ai le faamatalaga. Ia faamautinoa ua ōgatasi lou faaaogāina o faamatalaga sii ma fuainumera, ma le mataupu na aumai ai. I se taumafaiga e faamamafa ou manatu, ia faaeteete e aua neʻi avea mea e fai e ni “nai tagata” ma itu e aafia ai “le toʻatele o tagata,” ia aua neʻi avea mea e fai e le “toʻatele o tagata” ma itu e aafia ai “tagata uma,” ma ia aua neʻi avea “nisi tulaga” e fai ma “tulaga uma.” O le soona taʻua soo o mataupu po o le soona faatele o lipoti e aofia ai fuainumera, le telē po o le matuiā o se mea, e matuā fesiligia ai lava lou faamaoni ma lou maufaatuatuaina.

Pe afai e saʻo i taimi uma mea e te tautala ai, o le a lauiloa ai oe o se tagata o lē e faaaloalo i le mea moni. O lenei mea o le a taʻuleleia ai Molimau a Ieova. E sili atu ona tāua, o le a faamamaluina ai “Ieova le Atua o le upu moni.”—Sala. 31:5, NW.