Faaaogā ma le Uigā Fesoasoani Vaaia

AISEĀ e faaaogā ai fesoasoani vaaia i lau aʻoaʻo atu? Auā o le faia faapena e mafai ona uigā atili ai lau aʻoaʻo atu. Sa faaaogā e Ieova le Atua ma Iesu Keriso ni fesoasoani vaaia, ma e mafai ona tatou aʻoaʻo mai iā te i laʻua. Pe a faaaogā faatasi fesoasoani vaaia ma upu o loo tautalagia, o le a taliaina ai faamatalaga i ni auala se lua, o mata ma taliga. O le a fesoasoani lenei mea e faauaʻi mai ai pea lau aofia ma faamalosia ai le faamatalaga o loo faia. E mafai faapefea ona e faaaofia fesoasoani vaaia i au taulimaga o le tala lelei? E mafai faapefea ona e mautinoa o loo e faaaogāina ma le uigā?

Le Auala sa Faaaogā ai e Faiaʻoga Silisili Fesoasoani Vaaia. Sa faaaogā e Ieova fesoasoani vaaia e faagalogatā ina ia aʻoaʻo atu ai ni lesona tāua. I se tasi pō na ia aumaia ai Aperaamo i fafo ma fetalai atu i ai: “Ina e vaavaai ae ia i le lagi, ma e faitauina fetu, pe afai e mafaia ona e faitauina; . . . E faapea lava lau fanau.” (Kene. 15:5) E ui ina foliga mai o le mea na folafolaina e faigatā i le vaaiga faaletagata, ae sa matuā maofa lava Aperaamo ma faatuatua ai iā Ieova. I se isi mea na tupu, na auina atu ai Ieremia e Ieova i le fale o se fai ipu omea ma ia ulufale atu i le fale faigaluega o le fai ipu omea e matamata i le faiga e le tamāloa o le omea. Maʻeu se lesona faagalogatā i le pule a Lē na Foafoaina Mea i luga o tagata! (Iere.18:1-6) Ma e mafai faapefea e Iona ona faagaloina le lesona i le alofa mutimutivale sa aʻoaʻoina ai o ia e Ieova, e ala i le laau sosolo o le kikaiona? (Iona 4:6-11) Na fetalai atu foʻi Ieova i ana perofeta ina ia faaataina mai feʻau faavaloaga a o faaaogāina nisi o mea iloga talafeagai. (1 Tu. 11:29-32; Iere. 27:1-8; Eseki. 4:1-17) O foliga o le fale fetafaʻi ma le malumalu lava ia, o ni faaataga e faapea ona fesoasoani iā i tatou ina ia malamalama ai i mea moni faalelagi. (Epe. 9:9, 23, 24) Ua faaaogā foʻi e le Atua le anoanoaʻi o faaaliga ina ia faaoo mai ai faamatalaga.—Eseki. 1:4-28; 8:2-18; Galu.10:9-16; 16:9, 10; Faaa. 1:1.

Sa faapefea ona faaaogā e Iesu fesoasoani vaaia? Ina ua taumafai le ʻau Faresaio ma ē sa mulimuli iā Herota e maileia o ia i ana fetalaiga, sa fesili atu Iesu mo se tenari ma faauaʻi atu manatu i le faatusa o Kaisara o loo i le tupe siliva. Ona ia fetalai atu lea faapea o mea a Kaisara e ao ona toe totogi atu iā Kaisara a o mea a le Atua e ao ona toe totogi atu i le Atua. (Mata. 22:19-21) I le aʻoaʻoina o se lesona ina ia ava i le Atua i mea uma ua tatou maua, sa faasino atu ai Iesu i se fafine mativa ua oti lana tane sa i le malumalu, o lē o lana foaʻi—o ni tupe iti e lua—o mea uma ia sa ia ola ai. (Luka 21:1-4) I se isi tulaga sa ia faaaogā ai se tamaitiiti e fai ma faaaʻoaʻoga o le lotomaulalo, e aunoa ma le fiasili. (Mata. 18:2-6) Sa ia faataʻitaʻia totino foʻi le uiga o le lotomaulalo e ala i le mulumuluina o vae o ona soo.—Ioa. 13:14.

Auala e Faaaogā ai Fesoasoani Vaaia. I le lē pei o Ieova, e lē mafai ona tatou fesootaʻi e ala i faaaliga. Ae peitaʻi, e tele ata faatupu manatu o loo maua i lomiga a Molimau a Ieova. Ia faaaogā nei ata e fesoasoani ai i tagata fiafia ina ia vaai faalemafaufau i le Parataiso faalelalolagi, ua folafola mai i le Afioga a le Atua. I se suʻesuʻega faale-Tusi Paia i le aiga, e mafai ona e faauaʻi atu se tagata aʻoga i se ata e fesootaʻi i le mea o loo lua suʻesuʻeina ma fesili atu iā te ia e taʻu mai iā te oe le mea o loo ia vaaia. E tāua ona mātau, ina ua faailoa atu se faaaliga i le perofeta o Amosa, na fetalai atu Ieova: “Se a ea se mea ua e iloa?” (Amo. 7:7, 8; 8:1, 2) E mafai ona e fesiligia ni fesili faapena a o e tataʻi atu manatu o tagata i ata ua fuafuaina o ni fesoasoani vaaia tau aʻoaʻo atu.

Afai e te tusia ni numera faamatematika pe faaaogā se siata o gafa e faaalia ai le gasologa o mea iloga na tutupu, e mafai e lenei mea ona fesoasoani i tagata ina ia faigofie ona malamalama i valoaga e pei o “tausaga e fitu” o le Tanielu 4:16 ma “vaiasosa e fitugafulu” o le Tanielu 9:24. O na fesoasoani vaaia o loo iai i le tele o a tatou lomiga mo suʻesuʻega.

I la outou suʻesuʻega faale-Tusi Paia i le aiga, o le talanoaina o mea e pei o le fale fetafaʻi, le malumalu i Ierusalema, ma le malumalu na vaaia e Esekielu e mafai ona faafaigofie pe afai e te faaaogāina se ata. E mafai ona maua na mea i le Insight on the Scriptures, le faaopoopoga i tua o le New World Translation of the Holy Scriptures—With References, ma lomiga eseese o Le Olomatamata.

Pe a faitauina le Tusi Paia ma lou aiga, ia faaaogā lelei faafanua. Ia suʻesuʻe i le faagasologa o le malaga atu o Aperaamo mai Uro agaʻi i Karana ma faaifo ane ai i Peteli. Iloilo le ala na ui ai Isaraelu ina ua tuua e le nuu Aikupito ae malaga atu i le Nuu o le Folafolaga. Vaai ogaeleele na tuu atu i ituaiga taʻitasi o Isaraelu o se tofi. Mātau le mamao na oo atu iai le pulega a Solomona. Mulimuli i le ala na sola ese ai Elia mai Isereelu, ua alu mamao i tala atu o Peresepa ina ua faamataʻuina o ia e Iesepela. (1 Tu. 18:46–19:4) Tagaʻi i aai ma taulaga na talaʻi ai Iesu. Ia mulimuli i malaga a Paulo, e pei ona faamatalaina i le tusi o Galuega.

E aogā fesoasoani vaaia i le faamasani o tagata aʻoga o le Tusi Paia i fuafuaga a le faapotopotoga. E mafai ona faailoa i lau tagata aʻoga se polokalame ua lomia ma faamatala i ai le ituaiga o faamatalaga o loo tatou talanoaina i fonotaga ma tauaofiaga. O le toʻatele ua maofa ona o sa latou maimoaga i le Maota o le Malo po o se maimoaga i se ofisa o le lālā o Molimau a Ieova. E mafai ona avea lenei o se auala uigā i le aveesea o manatu sesē e uiga i la tatou galuega ma lona fuafuaga. Pe a faia se maimoaga i le Maota o le Malo, ia faailoa atu le auala ua eseese ai mai isi nofoaga o tapuaʻiga. Ia faamatilatila e faapea o le Maota o le Malo, o se nofoaga talafeagai lea ua fetaui lelei mo le aʻoaʻoina. Faasino atu vala sa fuafuaina faapitoa mo le faiva i le lautele—potu o loo maua ai tusi, faafanua o oganuu, ma pusa o meaalofa (e ese mai le aoina o peleti).

I nofoaga o loo maua ai vitiō sa sauniunia e ala i le faatonutonuga a le Vaega Pule, ia faaaogā e atiina aʻe ai le mautinoa i le Tusi Paia, ia faamasani ai tagata aʻoga i galuega a Molimau a Ieova, ma ia faalaeiau ai ē matamata ina ia ola e ōgatasi ma mataupu silisili o le Tusi Paia.

Faaaogāina o Fesoasoani Vaaia mo Vaega Toʻatele. Pe a lava sauniunia ma taulimaina ma le tomai, e mafai ona avea fesoasoani vaaia o ni fesoasoani uigā i le aʻoaʻoina o vaega toʻatele. O na fesoasoani vaaia ua faapea ona saunia i auala eseese e le vasega o le auauna faamaoni ma le mafaufau.

I mataupu o suʻesuʻega i Le Olomatamata, ua masani ona aofia ai fesoasoani vaaia o ni ata, lea e mafai ona faaaogā e le faisuʻesuʻega ina ia faamamafa ai manatu tāua. Ua moni foʻi lenā i isi lomiga ua faaaogā i le Suʻesuʻega Tautusi a le Faapotopotoga.

O nisi auivi o lauga i le lautele atonu e foliga mai e talafeagai i ai le faaaogāina o fesoasoani vaaia ina ia faataʻitaʻia ai manatu. Peitaʻi, o le aogā sili ua masani ona faataunuuina lea, i le faauaʻi atu o manatu i mea o loo i le Tusi Paia, o loo iai i aao o le toʻatele o le aofia. Afai i se taimi, e manaʻomia ai se ata po o se auivi puupuu o ni manatu autū ina ia faamanino atu ai se manatu autū e tasi pe sili atu foʻi o se lauga, siaki muamua ina ia faamautinoa pe mafai i le fesoasoani vaaia ona iloa lelei atu (pe faitauina) mai le pito i tua o le nofoaga o le sauniga. O na mea e ao ona faaaogā ma le faaeteete.

O le autū o lo tatou faaaogāina o fesoasoani vaaia pe a tautala ma aʻoaʻo atu e lē ina ia faafiafia ai. Pe a faaaogā se fesoasoani vaaia talafeagai, e ao ona faamalosia e mea ua vaaia ia manatu o loo tatau ona faamamafaina faapitoa. O na fesoasoani o le a avea o se fuafuaga aogā pe afai o le a fesoasoani e faamanino ai upu ua tautalagia, e faafaigofie ai ona malamalama, po o le saunia ai foʻi o se faamaoniga malosi o le tāua o le mea ua taʻua. Afai e faaaogā tatau, e mafai e se fesoasoani vaaia talafeagai ona faatupu ai se aafiaga loloto, lea o le a avea ai le fesoasoani vaaia ma le manatu autū o le aʻoaʻoga ma mea e manatua mo le tele o tausaga.

O le tomai e faalogo ai ma le uiga o le vaai, ua iai uma se vaega tāua i le aʻoaʻo atu. Ia manatua le auala sa faaaogā ai nei uiga e Faiaʻoga Silisili o Ieova ma Iesu, ma taumafai e faataʻitaʻi iā i laʻua i au taumafaiga ina ia maua ai isi.