Faaaogā Fesoasoani Vaaia e Aʻoaʻo Ai
1. Na faapefea ona faaaogā e Ieova fesoasoani vaaia e aʻoaʻo ai ana auauna i aso anamua, ma o ā iʻuga na oo i ai?
1 Ina ia avatu faamatalaga tāua i ana auauna anamua, sa iai taimi na faaaogā ai e Ieova faaaliga ma miti. Seʻi manatu i le faaaliga na iloa e Esekielu i le kariota faalelagi a Ieova. (Eseki. 1:1-28) Seʻi manatu i lagona na oo iā Tanielu ina ua ia vaaia i le miti faavaloaga lea na faaata mai ai le faagasologa mai o malo malolosi o le lalolagi. (Tani. 7:1-15, 28) Ae faapefea le faaaliga mataʻina lea na “faailoa mai” i le aposetolo o Ioane e tusa ma mea o le a tutupu i “le aso o le Alii”? (Faaa. 1:1, 10) Sa aʻoaʻoina Esekielu, Tanielu ma Ioane e ala i le faaaogāina o lanu e matuā manino lava ma gaoioiga tetele, ma sa tāmau ai i o latou mafaufau na manatu mo se taimi umi lava.
2. O ā fesoasoani vaaia e mafai ona tatou faaaogā e aʻoaʻo ai isi i upu moni o le Tusi Paia?
2 Pe afai e tatou te mananaʻo e faamatala upu moni o le Tusi Paia i isi ma ia teu i manatu ia lē faigofie ona galo, e mafai ona tatou faaaogā a tatou vitiō e aʻoaʻo ai. O loo aofia i a tatou vitiō le tele o mataupu e ati aʻe ai le mautinoa i le Tusi Paia, i le faalapotopotoga a Ieova, ma mataupu silisili e faaleleia ai o tatou olaga faa-Kerisiano. Seʻi o tatou iloiloina nei ni nai auala e faaaogā lelei ai a tatou vitiō e aʻoaʻo ai. O nisi nei o vitiō e mafai ona faaaogā.
3. O le ā le mea e mafai ona e faaaogā e tataʻi ai se tagata aʻoga o le Tusi Paia i le faalapotopotoga?
3 I le Faiva: Pe na e taʻu atu i se tagata aʻoga o le Tusi Paia e faatatau i lo tatou ʻauuso faa-Kerisiano? Faaali iā te ia le vitiō Our Whole Association of Brothers. A lē avatu iā te ia e matamata ai a o leʻi faia le lua suʻesuʻega o sosoo ai, ia po o le matamata faatasi ai i le isi lua suʻesuʻega. Ona talanoa lea o fesili autalu o loo i La Tatou Faiva o le Malo o Iuni 2002.
4. O ā ni meafaigaluega e aʻoaʻo ai e ono faaaogā e se talavou i le aʻoga?
4 Talavou e, ia talanoa i lou faiaʻoga i se avanoa e ono faaali ai i lau vasega mea moni na tutupu o loo i le vitiō Jehovah’s Witnesses Stand Firm Against Nazi Assault or Faithful Under Trials—Jehovah’s Witnesses in the Soviet Union. Fai i ai o le a e tusiaina ni fesili, ona fetuunaʻi lea o fesili o loo i La Tatou Faiva o le Malo o Iuni 2001 po o Fepuari 2003 e fua i le talanoaga o le a faia i le vasega.
5. O le ā o loo mafai ona maua e mātua e faaaogā i le taimi o suʻesuʻega a le aiga?
5 Faatasi ma le Aiga ma Uō: Mātua e, seʻi manatu i le matutua ua iai nei lau fanau talu le taimi mulimuli na latou matamata ai i le vitiō Young People Ask—How Can I Make Real Friends? Aiseā e lē toe matamata ai i le isi suʻesuʻega a lo outou aiga o loo sosoo ai? O loo iai i La Tatou Faiva o le Malo o Aperila 2002 fesili mo se talanoaga i le vitiō.
6. E faapefea ona e faatulaga se taimi e taufai ati aʻe ai ma uō?
6 Po o iai ni uō i le faapotopotoga o loo tou mananaʻo e valaaulia i lo outou aiga? O le matamata faatasi o le vitiō Respect Jehovah’s Authority o le a ati aʻe ai tagata i lenā afiafi, aemaise lava pe afai e toe autalu lesona na aʻoaʻoina mai ai, i le faaaogāina o fesili o loo i La Tatou Faiva o le Malo o Setema 2004.
7. O ā avanoa e ono maua e faaali ai a tatou vitiō?
7 Isi Avanoa e Maua: O ā isi auala e te faaaogā lelei ai a tatou vitiō e 20? Po o le faaalia ea o se tasi po se lua o na vitiō i se tasi e te asiasi soo i ai o le a fesoasoani iā te ia e agaʻigaʻi ai i luma faaleagaga? Po o le a e talosaga atu e faaali i se falemaʻi o tagata matutua i lou vaipanoa po o se falepuipui, falemaʻi, po o se isi nofoaga? Po o le a fesoasoani le vitiō ina ia iai se taaʻiga lelei i ou tauaiga e lē o ni Molimau a Ieova, o ou tuaoi ma i latou e tou te faigaluega faatasi? O a tatou vitiō e matuā mataʻina lava, e maua ai aʻoaʻoga, ma e ese le aogā e avea ma fesoasoani vaaia. Faaaogā na vitiō e aʻoaʻo ai tagata.