Taumafaiga Ina ia Pāʻia le Loto

E FAAOPOOPO i le molimau atu i tagata, e manaʻomia ona e faia se taumafaiga ina ia pāʻia ai o latou loto. I le Tusi Paia, ua masani ona faaeseeseina le loto ma uiga vaaia o loo faaalia e se tagata. O le loto ua fai lea ma sui o mea o loo i totonu o se tagata—o ona lagona, o mea uma o loo ia mafaufau i ai, le pogai o lona mafaufau i ai, ma le auala ua taaʻina ai e na mafaufauga ana gaoioiga. O le loto lenei o loo lūlūina i ai fatu o le upu moni. (Mata. 13:19) Ma o le loto foʻi lenei e tatau ona atiina aʻe ai le usiusitai i le Atua.—Faata. 3:1; Roma 6:17.

Ina ia mafai la ona goto lau aʻoaʻoga i le loto, ia uaʻi atu i mea nei: (1) Ia iloa mea ua uma ona taaʻina ai le loto o lau tagata faalogologo. (2) Ia faamalosia uiga aogā, e pei o le alofa ma le mataʻu faale-Atua. (3) Faalaeiau lau tagata faalogologo ia iloilo uunaʻiga o lona loto, ina ia mafai ona ia faafiafiaina atoatoa Ieova.

Faaaogāina o le Faautauta. E eseese māfuaaga ua tuai ai ona talia e tagata le upu moni. Pe a faia se suʻesuʻega faale-Tusi Paia i le aiga, atonu e manaʻomia ona e aveesea le faailoga tagata, ae faaaogā ni mea moni e suia ai manatu sesē o loo iai i le tagata aʻoga, pe atonu foʻi e manaʻomia ona e avatua se faamaoniga. Fesili ifo iā te oe lava: ‘Po o iloa ea e lenei tagata soifua o loo iai ni ona manaʻoga faaleagaga? O le ā le tele o mea ua ia talitonu i ai? O ā mea e lē o talitonu i ai? Aiseā ua ia faia ai na faaiʻuga? Pe na te manaʻomia se fesoasoani ina ia foʻia ai tuʻinanauga na e ono taofia ai o ia mai le taliaina o avega tauave e māfua ona o le mauaina o le upu moni?’

E lē faigofie i taimi uma ona iloa le pogai ua talitonu ai tagata i nisi o mea. “O le atamai i le loto o le tagata, o le vai loloto lea,” e pei ona taʻua i le Faataoto 20:5, “a o le tagata faautauta, na te utufia mai ai.” O le faautauta o le tomai lea e malamalama ai i se mea e lē vave ona faaalia mai. E manaʻomia ai le matuā mataalia ma se uiga agaalofa.

E lē o fesootaʻiga uma e aofia ai le tautala. Atonu e iai se isi mataupu e ono suia ai foliga vaaia po o le leo o se tagata aʻoga. Afai o oe o se matua, e lē taumatea ua e iloa o se suiga i le amio a lau tama e faaalia ai lona aafia i taaʻiga fou i le olaga. Aua neʻi e lē amanaʻia na uiga pe a aliaʻi mai. O faailoilo na o mea o loo i le loto o se tagata.

O fesili ua filifilia lelei, e mafai ona fesoasoani iā te oe ina ia utufia mai ai mea o loo i le loto o se tasi. E mafai ona e fesili atu: “E faapeʻī ou lagona e uiga . . . ?” “O le ā ua faatalitonuina oe e faapea . . . ?” “O le a faapeʻī ona e tali atu pe afai . . . ?” Ae peitaʻi, ia faaeteete aua neʻi osofaʻia tagata i fesili. E mafai ona faatomua ma le faautauta au fesili i le faapea atu, “Pe e te malie pe a ou fesili atu . . . ?” O le iloaina o mea o loo i le loto, o se galuega fitā e lē manaʻomia ona faatopetopeina. I le tele o tulaga, e tatau ona faaalu se taimi e atiina aʻe le maufaatuatuaina, a o leʻi lotomalie le tagata e faailoa mai ona faalogona loloto. E oo foʻi i tulaga faapenei, e tatau ona faaalia le faaeteete ina ia aua ai neʻi manatu le tagata, o loo e fesili atu i ni mea e leai sau aiā i ai.—1 Pete. 4:15.

E manaʻomia foʻi le faautauta i le auala e te tali atu ai i mea ua e faalogo i ai. Ia manatua o lou sini o le malamalama lea i tagata, ina ia mafai ai ona e filifilia faamatalaga e faavae i le Tusi Paia o le a faapea ona uunaʻia ai i latou. Ia vave ona taofi so o se uunaʻiga e faaalialia ai le sesē o o latou manatu. Na i lo lenā, ia mataala ina ia malamalama i faalogona e lē o faaalia maia i upu. O lea o le a e iloa ai le auala e tali atu ai; ma i le iloa e lau tagata aʻoga o loo e malamalama iā te ia, o le a faapea ona ia mafaufau loloto ai i mea o loo e taʻua.—Faata. 16:23.

I se isi tulaga, e mafai lava ona e uunaʻia tagata e tusa lava pe e te lauga atu i se vaega toʻatele. Afai e lelei lau fesootaʻiga ma le aofia, e te mataala i o latou foliga vaaia, ma faia ni fesili uigā faatupu manatu, o le a e malamalama ai la i faalogona o lau aofia e uiga i mea o loo e taʻua. Afai ua e iloa lelei lau aofia, ia faaalia le magafagafa mo lo latou tulaga. Ia manatua uiga masani o le faapotopotoga a o e fefulifulisaʻi ma i latou i le Afioga a le Atua.—Kala. 6:18.

Faagaee Faalogona Aogā. Afai ua e maua sina malamalamaga e uiga i mea o loo talitonu i ai se tagata, i mea e lē talitonu i ai o ia ma le māfuaaga, o le a mafai loa ona e atiina aʻe i na mea. Ina ua mavae lona toetū, sa pāʻia ai e Iesu loto o lona ʻausoo ina ua “faamatala . . . o Tusi” iā i latou e tusa ai o mea sa tutupu e leʻi mamao atu. (Luka 24:32) E ao foʻi ona e taumafai e faafesootaʻi mea na tutupu i se tagata, o mea o loo ia moomoo i ai, ma mea ua ia iloa i le Tusi Paia. O le a pāʻia le loto o se tagata aʻoga i se auala aogā pe a ia iloa manino: “O le UPU MONI lenei!”

Pe a e faatāuaina le agalelei o Ieova, lona alofa, lona alofa tunoa, ma ona ala amiotonu, o le a e fesoasoani ai la iā i latou o loo e aʻoaʻoina ina ia atiina aʻe lo latou alofa mo le Atua. Pe a e faaaluina le taimi e faailoa atu ai i lau ʻaufaalogologo uiga e sili ona lelei o loo silafia e le Atua mai iā i latou, ua e avatua ai iā i latou māfuaaga e talitonu ai, e mafai ona latou maua se faiā totino ma ia. E mafai ona ausia lenei mea i le manatunatu i mau e pei o le Salamo 139:1-3, Luka 21:1-4, ma le Ioane 6:44 ma i le fesoasoani atu i lau ʻaufaalogologo e talisapaia le loloto o le mafutaga alofa a Ieova ma ana auauna faamaoni. (Roma 8:38, 39) Faamatala atu e faapea e lē na o a tatou mea sesē e silafia e Ieova ae na te silasila foʻi o tatou olaga atoa, lo tatou maelega mo le tapuaʻiga mamā, ma lo tatou alofa mo lona suafa. (2 No. 19:2, 3; Epe. 6:10) Ua ia manatua e oo lava i nai auʻiliʻiliga laiti e uiga iā i tatou, ma i se auala mataʻina, o le a ia toe faatutūina ai i le ola “i latou uma ua i tuugamau.” (Ioa. 5:28, 29; Luka 12:6, 7) Talu ai ua faia tagata i le faatusa ma foliga o le Atua, o se talanoaina la o ona uiga, ua masani ona talia lelei ai i le loto o se tagata.—Kene. 1:27.

E mafai foʻi ona pāʻia le loto, pe a faamasani se tasi e vaai i isi tagata e pei ona silasila i ai Ieova. Afai e faaalia mai e lo tatou Atua le agaalofa mo i tatou, e talafeagai foʻi la lona faaalia o lenā magafagafa mo isi, e tusa lava po o ā o latou talaaga, atunuu, po o le ituaiga. (Galu. 10:34, 35) O le taimi lava e faia ai e se tagata lenā faaiʻuga, ona iai loa lea o se faavae mausalī faale-Tusi Paia mo ia, e liaʻi ese ai le ʻinoʻino ma le faailoga tagata mai lona loto. O le a mafai i lenei mea ona ia maua ai se mafutaga filemu ma isi a o ia faamasani e faataunuuina le finagalo o le Atua.

O le mataʻu faale-Atua, o se isi lea o faalogona e ao ona e fesoasoani i isi ina ia atiina aʻe. (Sala. 111:10; Faaa. 14:6, 7) O lenā faaaloalo loloto, po o le mataʻu i le Atua, e mafai ona uunaʻia ai se tagata ina ia ausia se mea atonu e lē mafaia i lona lava malosi. E ala i le talanoaina o galuega ofoofogia a Ieova, ma lona alofa agalelei uigaese, e mafai ona e fesoasoani ai i isi ina ia atiina aʻe se mataʻu talafeagai i le ʻalofia o le faia o se mea e toʻasa ai o ia.—Sala. 66:5; Iere. 32:40.

Ia faamautinoa ua malamalama lau ʻaufaalogologo, e tāua iā Ieova a latou amio. E iai ona faalogona, ma e ala i la tatou tali atu i ana taʻiala, tatou te ono faapogaia ai lona faanoanoa po o le olioli. (Sala. 78:40-42) Ia faailoa i tagata le pogai e mafai ai e a latou amio ona faia se eseesega i le tali atu i le luʻi a Satani faasaga i le Atua.—Faata. 27:11.

Ia fesoasoani i lau ʻaufaalogologo ina ia malamalama, o le ausia o mea manaʻomia e le Atua e aogā mo i latou. (Isa. 48:17) O se tasi o auala e faia ai lenei mea, o le faasino atu lea i āuga leaga i le tino ma tau i faalogona, pe a teena le atamai o le Atua, e tusa lava pe mo sina taimi. Faamatala le auala ua tatou vavamamao ai ma le Atua ona o le agasala, ua lē maua ai e isi le avanoa e aʻoaʻo ai le upu moni mai iā i tatou, ma faapea ona lē amanaʻia ai a latou aiā. (1 Tesa. 4:6) Fesoasoani i lau aofia ina ia faatāua faamanuiaga ua uma ona latou maua ona o le tausia o tulafono a le Atua. Ia faamalosia lo latou lotofaafetai mo le mea moni e faapea, o le savavali i ala amiotonu o Ieova ua tatou sao ai mai le tele o puapuaga. Pe a faatuatua se tagata i le atamai o ala o le Atua, o le a ia teena ai la so o se mea e faasagatau mai i ai. (Sala. 119:104) O le a ia manatu ai i le usiusitai, e lē o se avega mamafa, ae o se auala e faaalia ai le tuutoina atoa o lona tagata iā Ieova.

Fesoasoani i Isi Ina ia Faia se Iloiloga. Ina ia faaauau ona tuputupu aʻe faaleagaga, e manaʻomia e tagata ona utagia mea o loo i o latou loto. Faamatala le auala e mafai ai ona fesoasoani le Tusi Paia iā i latou ina ia faia ai faapea.

Ia fesoasoani i lau ʻaufaalogologo ia iloa o le Tusi Paia ua lē na o se tusi o poloaʻiga, o fautuaga, o mea tutupu i tala faasolopito, ma valoaga. O loo faaalia ai foʻi le finagalo o le Atua. I le Iakopo 1:22-25, ua faatusaina ai le Afioga a le Atua i se fāʻata. E ala i la tatou tali atu i mea ua fai mai ai ma i le auala o loo faataunuu ai e Ieova ana fuafuaga, ua faaalialia ai e le feʻau a le Tusi Paia le tulaga o o tatou loto. Ua faaalia ai le auala o loo silasila mai ai le Atua, o lē “tofotofoina loto,” iā i tatou. (Faata. 17:3) Faalaeiau lau ʻaufaalogologo ina ia manatua lenā mea. Ia uunaʻia i latou e mafaufau i mea ua faasaoina e le Atua mo i tatou i faamaumauga o le Tusi Paia ma suiga atonu e manaʻomia ona latou faia i o latou olaga ina ia atili ai ona fiafia mai o ia. Fesoasoani iā i latou ina ia manatu i le faitauina o le Tusi Paia, o se auala e iloa ai le silafaga a Ieova e uiga i “manatu ma filifiliga o le loto” ina ia mafai ai ona latou felagolagomaʻi ma le Atua i le faia o ni suiga e manaʻomia.—Epe. 4:12; Roma 15:4.

O nisi tagata aʻoga atonu e mananaʻo e faatino mea ua latou aʻoaʻoina, ae o loo popole i mea o le a mafaufau i ai isi tagata. Atonu o loo latou tauivi ma nisi o tuʻinanauga malolosi faaletino. Pe atonu o loo latou gaoioi e saʻili se auala e auauna ai i le Atua a o pipii atu foʻi i faiga a le lalolagi. Ia faailoa atu le mataʻutia o lenā tulaga lē mautonu. (1 Tu. 18:21) Ia uunaʻia i latou e tatalo i le Atua ina ia iloiloina ma faamamāina o latou loto.—Sala. 26:2; 139:23, 24.

Ia faailoa atu iā i latou, o loo malamalama Ieova i la latou tauiviga ma ua faamatala mai e le Tusi Paia le mea o loo tupu. (Roma 7:22, 23) Fesoasoani iā i latou ina ia faaeteete ia aua neʻi pulea i vaivaiga o le loto lē lelei atoatoa.—Faata. 3:5, 6; 28:26; Iere. 17:9, 10.

Ia faalaeiau tagata taʻitoʻatasi ina ia iloiloina māfuaaga o loo ia faia ai mea. Aʻoaʻo o ia ina ia fesili ifo iā te ia lava: ‘Aiseā ou te manaʻo ai e fai lenei mea? Po o le a faailoa atu ai ea iā Ieova ou te talisapaia moni mea uma ua ia faia mo aʻu?’ Ia galue ia faamalosia le talitonuga maumauaʻi e faapea o se faiā faamaonia ma Ieova, o se mea totino aupito sili lea ona tāua ua maua e se tasi.

Ia fesoasoani i lau ʻaufaalogologo ia malamalama i le tāua o le auauna iā Ieova ma o latou “loto atoa.” (Luka 10:27) O lona uiga o o latou faalogona, faanaunauga, ma uunaʻiga uma e tatau ona ōgatasi ma ala o Ieova. O lea, ia aʻoaʻo lau ʻaufaalogologo ina ia iloilo e lē gata o mea o loo latou faia ae faapea foʻi i o latou faalogona e uiga i mea e faafinagaloina e le Atua ma māfuaaga latou te auauna ai iā te ia. (Sala. 37:4) A o manatunatu au tagata aʻoga i vala e manaʻomia ona faaleleia, faalaeiau i latou ina ia tatalo iā Ieova e faapea: “[Ia] faia ina ia tasi loʻu loto e mataʻu i lou suafa.”—Sala. 86:11.

Pe a atiina aʻe e se tagata aʻoga se faiā totino ma Ieova, o le a ia usiusitai ai i le Atua ona o le faatuatua ae lē ona o lou faamalosiaina. Mulimuli ane, o le a “suesue . . . [e ia lava] pe se a se mea e fiafia i ai le Alii.” (Efe. 5:10; Fili. 2:12) O lenā usiusitai mai le loto e faafiafiaina ai Ieova.—Faata. 23:15.

Ia manatua o Ieova o ia lea o lē na te fuatiaina loto ma faatosina mai tagata i se faiā ma ia. (Faata. 21:1; Ioa. 6:44) O la tatou matafaioi o le felagolagomaʻi. (1 Kori. 3:9) E “peiseai ua aioi mai le Atua . . . e ala ia i [t]atou.” (2 Kori. 5:20; Galu. 16:14) E lē faamalosia e Ieova se tasi ina ia talia le upu moni, ae a o tatou faaaogāina le Tusi Paia, e mafai ona ia faapogaia la tatou ʻaufaalogologo ina ia iloa, o mea ua latou lagonaina o le tali lea i a latou fesili—po o a latou tatalo. Ia manatua lenei mea i so o se avanoa e te aʻoaʻoina ai isi, ma tatalo naunautaʻi iā Ieova mo lana taʻitaʻiga ma le fesoasoani.—1 No. 29:18, 19; Efe. 1:16-18.