Le Auala e Pāʻia ai Loto o i Latou o Loo Tatou Aʻoaʻoina
1. O le ā le aafiaga o aʻoaʻoga a Iesu i loto o lana ʻaufaalogologo?
1 Na pāʻia e Iesu loto o lana ʻaufaalogologo. I se tasi taimi, na “mū” loto o ona soo ina ua uma ona ia faamatala i ai ma le manino Tusitusiga Paia. (Luka 24:32) Talu ai o le usitaʻi i le Atua e tatau ona sau mai i le loto, e faapefea la ona tatou faaosofia le naunau o ē o loo tatou aʻoaʻoina, ina ia uunaʻia ai i latou e faia ni suiga i o latou olaga?—Roma 6:17.
2. O le ā le tāua o le faautaga loloto i le pāʻia o le loto o se tagata?
2 Faaaogā le Faautaga Loloto: O le toʻatele o tagata e lē gaoioi e faia se suiga, pe afai e tau lava o lou taʻu i ai o le mea e saʻo ma le mea e sesē. O le faaaogā foʻi o le tele o mau e faamaonia ai le sesē o o latou talitonuga, atonu o le a atili ai ona lē fiafia i latou. Ina ia uunaʻia se tasi e gaoioi, e tatau ona tatou iloa muamua māfuaaga o ona talitonuga ma ana gaoioiga. O fesili faatupu manatu e filifili lelei ma fai atu i se auala faautauta, e faalaeiau ai le tagata e faaali mai ona manatunatuga loloto. (Faata. 20:5) O le faia faapea, o le a tatou iloa ai manatu e filifili mai i le Tusi Paia e pāʻia ai lona loto. O lea, e tatau ona faaalia le onosaʻi ma le naunau moni i le tagata. (Faata. 25:15) Ia manatua, e eseese lava le vave e agaʻigaʻi ai i luma faaleagaga tagata. Ia faataga se taimi e galue ai le agaga paia o Ieova, ina ia taaʻina manatu ma gaoioiga a le tagata.—Mareko 4:26-29.
3. E faapefea ona tatou fesoasoani i ē o loo tatou aʻoaʻoina ina ia atiaʻe uiga lelei?
3 Fesoasoani iā i Latou ia Atiaʻe Uiga Lelei: O mau o le Tusi Paia o loo faaalia mai ai le lelei ma le alofa o Ieova, e mafai ona fesoasoani i ē o loo tatou aʻoaʻoina ina ia atiaʻe uiga lelei. E mafai ona faaaogā mau e pei o le Salamo 139:1-4 po o le Luka 12:6, 7, e iloa ai le naunau moni mai o Ieova iā i tatou taʻitoʻatasi. Pe a amata ona faaalia e se tasi lona talisapaia moni o le agalelei faifua o Ieova, o le a atili ai la ona tuputupu aʻe lona alofa ma le tuutoina atu iā te Ia. (Roma 5:6-8; 1 Ioa. 4:19) E lē gata i lea, o le iloaina e aafia totino Ieova i a latou amioga, e ono uunaʻia ai i latou e gaoioi i se auala e faafiafiaina ma faamamaluina ai o ia.—Sala. 78:40, 41; Faata. 23:15.
4. E faapefea ona faaalia e tatou te amanaʻia le saʻolotoga a se tasi e filifili ai, a o tatou aʻoaʻo i latou i le faiva?
4 E lē faamalosia e Ieova se tasi ina ia usitaʻi i ana poloaʻiga. Nai lo o lea, ua faaalia lona naunau mai i tagata taʻitoʻatasi e ala i le faailoa mai i ai o le atamai o le mulimuli i ana apoapoaʻiga. (Isa. 48:17, 18) E tatou te faaaʻoaʻo iā Ieova, e ala i le aʻoaʻo o tagata i se auala e fesoasoani ai iā i latou e faia a latou lava filifiliga. E iai iʻuga lelei ma tumau, pe afai e uma ane ua iloa e se tagata lava ia ua tatau ona ia faia ni suiga. (Roma 12:2) O le a atili ai foʻi ona vavalalata atu o ia iā Ieova, o lē e “suʻesuʻeina loto.”—Faata. 17:3.