Le Auala e Iloa ai “Papelonia le Aai Tele”

O LOO iai faaupuga i le tusi o Faaaliga ua tusia i se gagana faafaatusa. (Faaaliga 1:1) O se faaaʻoaʻoga, o loo taʻua ai se fafine ua tusia i lona muaulu le igoa “Papelonia le Aai Tele.” O loo taʻua ai ua tiʻetiʻe o ia i ʻmotu o tagata ma nuu.’ (Faaaliga 17:1, 5, 15) O lenei fafine o se fafine faafaatusa auā e leai se fafine e mafai ona faia lenā mea. O le ā le mea ua faaatagia mai e lenei fafine talitane faafaatusa?

Ua faamatalaina i le Faaaliga 17:18 lenā lava fafine faafaatusa o “le aai tele lea e pule i tupu o le lalolagi.” O le upu “aai” e faaalia ai ni tagata ua faamaopoopoina. Talu ai la o lenei “aai tele” e pule i “tupu o le lalolagi,” e ao ona faasino atu lenei fafine ua taʻua o Papelonia le Aai Tele i se faalapotopotoga malosi i le atulaulau uma. E mafai ona taʻua o se faalapotopotoga aoao. O le ā lenei ituaiga o faalapotopotoga? O se faalapotopotoga faalelotu. Ia mātau mai le auala tatou te maua ai lenā manatu pe a tilofaʻia nisi o mau i le tusi o Faaaliga.

E iai faalapotopotoga faapolotiki, faalapotopotoga faapisinisi ma faalapotopotoga faalelotu. O Papelonia le Aai Tele e lē o se faalapotopotoga faapolotiki, auā ua taʻua i le Tusi Paia ua “faitaaga” o ia ma “tupu o le lalolagi,” po o faiga faapolotiki i le lalolagi. O loo faia e lenei fafine le faitaaga, e ala i le osia o sootaga vavalalata ma taʻitaʻi o lenei lalolagi, ma faia so o se mea e manaʻomia ina ia mafai ai ona ia taaʻina ma pule iā i latou. O le māfuaaga lea e taʻua ai o ia o “le fafine talitane sili.”—Faaaliga 17:1, 2; Iakopo 4:4.

E lē o faasino atu Papelonia le Aai Tele i faalapotopotoga faapisinisi, auā o “ʻaufaatauʻoa o loo femalagaaʻi o le lalolagi” ia ua fai ma faatusa o faiga faapisinisi, o le a taufaitagituʻi i latou pe a faaumatia lenei fafine. E pei ona faamatalaina i le tusi, o loo “tutū mamao ese” tupu ma tagata faatau ʻoa ma vaavaai ane iā Papelonia le Aai Tele. (Faaaliga 18:3, 9, 10, 15-17) O lea la, e talafeagai ona faapea atu o Papelonia le Aai Tele, e lē o se faalapotopotoga faapolotiki pe faapisinisi, a o se faalapotopotoga faalelotu.

Ua faamaonia atili le avea o Papelonia le Aai Tele o se faalapotopotoga faalelotu i le manatu lenei, o loo ia faasesēina nuu uma lava i ana “faiga faaagaga.” (Faaaliga 18:23) Ona e faalelotu faiga faataulāitu uma lava, ma e māfua mai i temoni, ua fetaui la le faapea mai o le Tusi Paia, ua avea Papelonia le Aai Tele “ma mea e nonofo ai temoni.” (Faaaliga 18:2; Teuteronome 18:10-12) Ua faamatalaina foʻi lenei faalapotopotoga e faapea, e tetee atu i le tapuaʻiga moni ma e sauā i ʻle ʻauperofeta ma le ʻaupaia.’ (Faaaliga 18:24) Ona o le ita o Papelonia le Aai Tele i le tapuaʻiga moni, ua ia matuā sauāina ma fasiotia ai ʻo ē ua molimau iā Iesu.’ (Faaaliga 17:6) O lea la, o lenei fafine ua taʻua o Papelonia le Aai Tele, ua fai ma faatusa o le faalapotopotoga o lotu sesē uma lava i le lalolagi aoao, lea e aofia ai lotu uma lava e tetee iā Ieova le Atua.