Pe e Tatau Ona Tatou Faamamaluina Aso Faamanatu?

E LĒ o faavaea i le Tusi Paia aso faamanatu a lotu ma aso faamanatu a le lalolagi, ia e masani ona faamamaluina i aso nei. O fea la na amata mai ai le faamamaluina o na aso faamanatu? Afai e mafai ona e susū atu i se faletusi, e lelei ona mātau faamatalaga a nisi o tusi e uiga i aso faamanatu o loo taatele i lou atunuu. O ni faaaʻoaʻoga nei.

Eseta. “E leai se faamatalaga i le Feagaiga Fou e faaalia ai na faamamaluina le Eseta.” (The Encyclopædia Britannica) O fea na amata mai ai le Eseta? Na amata mai i tapuaʻiga faapaupau. E ui lava ua manatu tagata o le Eseta e faamanatu ai le toe tū o Iesu, ae e lē faa-Kerisiano mea e fai i le Eseta. O se faaaʻoaʻoga, ua faapea mai se tusi Katoliko e uiga i le “rapiti o le Eseta”: “O le rapiti o se mea faapaupau e fai ma faailoga o le fanautama.”—The Catholic Encyclopedia.

Tausaga Fou. E eseese aso ma auala e faamanatu ai e atunuu le Tausaga Fou. Ua faapea mai se tasi tusi i le amataga mai o le faamanatuina o le Tausaga Fou: “O le pule o Roma o Iulio Kaisara na filifilia le aso muamua o Ianuari, e faamanatu ai le aso muamua o le Tausaga Fou i le 46 T.A. Na fai faapitoa e tagata Roma lenā aso mo Janus le atua o faitotoʻa, pa puipui ma le amataga o mea. Na maua le igoa o le masina o Ianuari, mai iā Janus o se atua e lua ona foliga, e faasaga le isi foliga i luma ae ū le isi i tua.” (The World Book Encyclopedia) O lea la, e faapaupau le amataga mai o le faamanatuina o le Tausaga Fou.

Halloween. Ua faapea mai se tasi tusi: “O nisi o mea e fai i le Halloween e mafai ona vaaia i se sauniga faaositaulaga na faia, a o lumanaʻi le faa-Kerisiano a le lotu anamua a tagata e taʻua o Celt, o ē na nonofo i le itu i sasaʻe o Europa. Na faia e nei tagata tausamiga mo ni atua se lua—o le atua o le lā ma le atua o tagata oti . . . , ma na paʻū lenā tausamiga iā Novema 1, o le amataga o le tausaga fou a tagata Celt. O le tausamiga mo tagata oti na iʻu ina ofi ane i tū faa-Kerisiano.”—The Encyclopedia Americana.

O Isi Aso Faamanatu. E lē mafai ona tatou talanoaina aso faamanatu uma ua faamamaluina e tagata i le lalolagi aoao. Peitaʻi, e lē taliaina e Ieova aso faamanatu e viiviia ai tagata, po o faalapotopotoga a tagata. (Ieremia 17:5-7; Galuega 10:25, 26) Ia manatua foʻi, e faalagolago le fiafia po o le lē fiafia o le finagalo o le Atua i aso faamanatu a lotu, ona o le amataga mai o ia aso. (Isaia 52:11; Faaaliga 18:4) O taʻiala tāua i le Tusi Paia o loo taʻua i le Mataupu e 16 o le tusi lenei, o le a fesoasoani iā te oe e iloa ai le silafaga a le Atua e faatatau i le auai i aso faamanatu a le lalolagi.