E Faapefea Ona E Mafuta Vavalalata Atu i le Atua?

1. Pe e faafofoga le Atua i tatalo uma?

Ua valaaulia e le Atua tagata o atunuu uma ina ia mafuta atu iā te ia e ala i le tatalo. (Salamo 65:2) Ae e lē faafofoga o ia i tatalo uma. O se faaaʻoaʻoga, e mafai ona faalavelavea tatalo a se tane e faileagaina lana avā. (1 Peteru 3:7) E lē gata i lea, ina ua faaauau pea ona faia e tagata Isaraelu le amioleaga, e leʻi fia faafofoga le Atua i a latou tatalo. Ae peitaʻi, e faafofoga le Atua i tatalo a ē e faia agasala matuiā, pe afai e latou te salamō moni. Ioe, o le tatalo o se faaeaga.​—Faitau le Isaia 1:15; 55:7.

Maimoa i le vitiō Pe Faafofoga le Atua i Tatalo Uma?

2. E faapefea ona tatou tatalo?

O le tatalo o se vaega o la tatou tapuaʻiga, o lea, e na o Ieova o Lē na foafoaina i tatou, e tatau ona tatalo i ai. (Mataio 4:10; 6:9) E lē gata i lea, ona e tatou te lē lelei atoatoa, e tatau la ona tatalo e ala atu i le suafa o Iesu, ona na maliu o ia mo a tatou agasala. (Ioane 14:6) E lē finagalo Ieova e aʻo faatauloto pe e tusia foʻi a tatou tatalo, ae ia tatalo mai i o tatou loto.​—Faitau le Mataio 6:7; Filipi 4:6, 7.

E faafofoga mai foʻi Lē na foafoaina i tatou i tatalo lē leoa. (1 Samuelu 1:12, 13) Ua ia valaaulia i tatou ina ia tatalo atu i taimi uma, e pei o le amataga ma le faaiʻuga o le aso, i taimi o meaʻai, ma pe a fesagaʻi ma faafitauli.​—Faitau le Salamo 55:22; Mataio 15:36.

3. Aiseā e faapotopoto faatasi ai Kerisiano?

E lē faigofie le mafuta atu i le Atua ona o loo tatou ola faatasi ma tagata e lē faatuatua i le Atua, ma tauemu i ana folafolaga e uiga i le aumaia o le filemu i le lalolagi. (2 Timoteo 3:1, 4; 2 Peteru 3:3, 13) O lea, e tatou te manaʻomia ai ni faatasiga e faalaeiauina ai faatasi ma o tatou uso.​—Faitau le Eperu 10:24, 25.

O le auaufaatasi ma tagata e alolofa i le Atua, o le a fesoasoani iā i tatou ina ia mafuta vavalalata ai i le Atua. O sauniga a Molimau a Ieova, o se avanoa lelei lea e maua ai ni aogā mai i le faatuatua o isi.​—Faitau le Roma 1:11, 12.

4. E faapefea ona e mafuta vavalalata atu i le Atua?

E mafai ona e mafuta vavalalata atu iā Ieova pe afai e te mafaufau loloto i mea ua e aʻoaʻoina mai i lana Afioga. Ia mātau ana galuega, o ana fautuaga, ma ana folafolaga. O le mafaufau loloto faatasi ai ma le tatalo, e mafai ona atiaʻe ai i o tatou loto le talisapaia o le alofa ma le atamai o le Atua.​—Faitau le Iosua 1:8; Salamo 1:1-3.

E faatoʻā mafai ona tatou mafuta atu i le Atua, pe a talitonu ma faatuatua iā te ia. Ae e tai pei le faatuatua o se laau, e tatau ona fui. E tatau ona faasūsūina pea lou faatuatua, e ala i le iloiloina o le faavae o ou talitonuga.​—Faitau le Mataio 4:4; Eperu 11:1, 6.

5. E faapefea ona aogā iā te oe le mafuta vavalalata atu i le Atua?

E tausia e Ieova ē e alolofa iā te ia. E na te puipuia i latou mai i so o se mea e lamatia ai lo latou faatuatua, ma lo latou faamoemoe o le ola e faavavau. (Salamo 91:1, 2, 7-10) Ua ia lapataʻia i tatou e ʻalo ese mai i ala e faaleagaina ai lo tatou soifua mālōlōina, ma lo tatou fiafia. Ua aʻoaʻoina i tatou e Ieova i le auala sili e ola ai.​—Faitau le Salamo 73:27, 28; Iakopo 4:4, 8.