Aʻoaʻoga a le Tusi Paia

E Faapefea Ona E Mafuta Atu i le Atua?

O loo talanoaina i lenei mataupu fesili atonu e te fia malamalama i ai, ma mau o le Tusi Paia e maua ai tali. E fiafia Molimau a Ieova e tou te talanoa i tali o na fesili.

1. Pe e faafofoga le Atua i tatalo uma?

Ua valaaulia e Ieova tagata o atunuu uma ina ia mafuta atu iā te ia e ala i le tatalo. (Salamo 65:2) Ae e lē o tatalo uma e faafofoga i ai o ia. O se faaaʻoaʻoga, ina ua faaauau pea ona faia e tagata Isaraelu le amioleaga, e leʻi fia faafofoga i ai le Atua i a latou tatalo. (Isaia 1:15) E mafai foʻi ona faalavelavea tatalo a se tane e faileagaina lana avā. (1 Peteru 3:7) Peitaʻi, e faafofoga mai le Atua i tatalo a ē e faia agasala matuiā, pe afai e faaalia le salamō.—Faitau le 2 Nofoaiga a Tupu 33:9-13.

2. E ao faapefea ona tatou tatalo?

O se faaeaga le tatalo, ma o se vaega o la tatou tapuaʻiga iā Ieova, o lea, e na o ia lava e ao ona tatalo atu i ai. (Mataio 4:10; 6:9) Ona e tatou te lē lelei atoatoa, e ao ona tatou tatalo e ala i le suafa o Iesu, ona ua na o ia le “ala.” (Ioane 14:6) E lē finagalo Ieova ina ia tatou aʻo faatauloto tatalo pe tusia foʻi, ae ia tatalo mai i le loto.—Faitau le Mataio 6:7; Filipi 4:6, 7.

E faafofoga mai foʻi Lē na foafoaina i tatou i tatalo lē leoa. (1 Samuelu 1:12, 13) Ua ia valaaulia i tatou ina ia tatalo atu i taimi uma, e pei o le amataga ma le faaiʻuga o le aso, i taimi o meaʻai, ma pe a fesagaʻia faafitauli.—Faitau le Salamo 55:22; Mataio 15:36.

3. Aiseā e faapotopoto faatasi ai Kerisiano?

E lē faigofie le mafuta atu i le Atua ona o loo tatou ola faatasi ma tagata e lē faatuatua i le Atua, ma tauemu i ana folafolaga e uiga i le aumaia o le filemu i le lalolagi. (2 Timoteo 3:1, 4; 2 Peteru 3:3, 13) O lea, e tatou te manaʻomia ai ni faatasiga e faalaeiauina ai ma o tatou uso talitonu.—Faitau le Eperu 10:24, 25.

E mafai ona e mafuta atu i le Atua pe afai e te faauō atu i ē e alolofa iā te ia. E iai avanoa i sauniga a Molimau a Ieova, e te maua ai aogā mai i le faatuatua o isi.—Faitau le Roma 1:11, 12.

4. E faapefea ona e mafuta atu i le Atua?

E mafai ona e mafuta atu iā Ieova pe afai e te mafaufau loloto i mea ua e aʻoaʻoina mai i lana Afioga. Ia mātau ana galuega, o lana taʻitaʻiga, ma ana folafolaga. O le mafaufau loloto faatasi ai ma le tatalo, e mafai ona atiaʻe ai i o tatou loto le talisapaia o le alofa ma le atamai o le Atua.—Faitau le Iosua 1:8; Salamo 1:1-3.

E faatoʻā mafai ona tatou mafuta atu i le Atua, pe afai e tatou te talitonuina atoatoa ma faatuatua iā te ia. E tai pei le faatuatua o se meaola, lea e tatau ona fafagaina ina ia faatumauina ai lona ola. E tatau ona e fafagaina pea lou faatuatua, e ala i le iloiloina o le faavae o ou talitonuga.—Faitau le 1 Tesalonia 5:21; Eperu 11:1, 6.

5. E faapefea ona aogā iā te oe le mafuta atu i le Atua?

E tausia e Ieova ē e alolofa iā te ia. E na te puipuia i latou mai i so o se mea e lamatia ai lo latou faatuatua, ma lo latou faamoemoe o le ola e faavavau. (Salamo 91:1, 2, 7-10) E na te lapataʻia i tatou e ʻalo ese mai i ala e faaleagaina ai lo tatou soifua mālōlōina, ma lo tatou fiafia. Ua aʻoaʻoina i tatou e Ieova i le auala sili e ola ai.—Faitau le Salamo 73:27, 28; Iakopo 4:4, 8.

Mo nisi faamatalaga, tagaʻi i le mataupu e 17 o lenei tusi, O ā Aʻoaʻoga Moni a le Tusi Paia?, ua lomia e Molimau a Ieova.