Po o le a Faaiʻuina ea Mafatiaga?

MANATU O LE TUSI PAIA

“E na te [le Atua] soloiesea foʻi loimata uma i o latou mata, e lē toe iai se oti, po o se faanoanoa, po o se tagiauē, e lē toe iai foʻi se tigā.”​—Faaaliga 21:3, 4

AOGĀ E TE MAUA MAI AI

Faamaonia mai ai e lē o le Atua e māfua ai o tatou faafitauli.​—Iakopo 1:13.

E faamāfanafanaina i le iloaina e tigā faalogona o le Atua pe a tatou mafatia.​—Sakaria 2:8.

Le faamoemoe o le a faaiʻuina mafatiaga uma.​—Salamo 37:9-11.

PE MAFAI ONA TATOU TALITONU MONI I LE TUSI PAIA?

Ioe, mo ni māfuaaga se lua:

• E ʻinoʻino Ieova i mafatiaga ma faiga lē tonu. Seʻi manatu i faalogona o Ieova le Atua ina ua sauāina ma faileagaina ona tagata i taimi o le Tusi Paia. Ua taʻua i le Tusi Paia na matuā mafatia o ia ona o “ē na faatigā iā i latou.”​—Faamasino 2:18, Faaliliuga a le Lalolagi Fou.

  E inosia e Ieova i latou e faileagaina isi. Mo se faaaʻoaʻoga, ua taʻua i le Tusi Paia e ʻinoʻino o ia i “lima e sasaa le toto o ē e lē sala.”​—Faataoto 6:16, 17.

• E manatu mamafa mai le Atua iā i tatou taʻitoʻatasi. E lē gata e taʻitasi le tagata ma iloa “lona lava mafatia ma lona lava tigā,” ae e silafia foʻi e Ieova!​—2 Nofoaiga a Tupu 6:29, 30.

  Ua lē o toe umi ae faaiʻuina e Ieova mafatiaga o tagata taʻitoʻatasi, e ala mai i lona Malo. (Mataio 6:9, 10) Ae i le taimi nei, o loo ia faamāfanafana ma le alofa i latou o loo saʻili atu ma le faamaoni iā te ia.​—Galuega 17:27; 2 Korinito 1:3, 4.