Ia Aʻoaʻo Lau fanau

Pe na Faamamulu Ieremia?

PE E iai se taimi e te faavaivai ai ma e manaʻo e faamaamulu?—a E toaʻtele e faapena. E faapena foʻi le talavou o Ieremia. Peitaʻi, e leʻi faamaamulu o ia ona o tala ma mea na fai e isi. Seʻi o tatou talanoa i le pogai na pele ai Ieremia i le Atua e ui ina manaʻo e faamaamulu.

A o leʻi fanau Ieremia, na filifilia o ia e le Atua moni o Ieova ia avea ma perofeta, e lapataʻia tagata ua latou lē faia le mea e fiafia i ai le Atua. Pe e te iloa le tala a Ieremia iā Ieova i tausaga mulilmuli ane?— “Ou te lē iloa ona tautala, auā o aʻu o le tama itiiti.”

O le ā le tali a Ieova iā Ieremia?— Na tali atu Ieova ma le agalelei ae maumauaʻi: “Aua e te faapea, O aʻu o le tama itiiti; auā o i latou uma ou te auina atu i ai oe, e te alu lava i ai, o mea uma foʻi ou te fai atu ai ia te oe, e te fai atu ai lava. Aua e te fefe ia te i latou.” Aiseā? “Auā ou te iā te oe e laveaʻi iā te oe,” ua fetalai mai ai Ieova.—Ieremia 1:4-8.

Ae e ui i lea, e pei ona taʻua muamua, na lotovaivai lava Ieremia. Talu ai sa ulagia o ia ona o le auauna i le Atua. Na fai mai o ia: ‘Ua tauemu ma ula mai tagata uma iā te aʻu i le aso atoa,’ O lea na ia manaʻo ai e faamaamulu. Na fai mai o ia:“Ou te lē taʻutaʻuina [Ieova], ma ou lē toe tautala i lona suafa.” Ae pe moni na faamaamulu o ia?

Na fai mai Ieremia: ‘A o loʻu loto ua avea le afioga a Ieova o se afi mumū ua punitia i oʻu ivi, ua lailoa aʻu i onosai, ua ou lē mafaia lava.’ (Ieremia 20:7-9) E ui ina fefe Ieremia i nisi taimi, ae o lona alofa iā Ieova e leʻi faamaamulu ai. Seʻi o tatou vaai pe na faapefea ona puipuia Ieremia ona e leʻi faamaamulu.

Na faatonu e Ieova Ieremia ia lapataʻi tagata o le a faaumatia Ierusalema pe afai e lē suia o latou ala leaga. Ina ua lapataʻi atu Ieremia, na feita tele tagata ma fai mai: “E tatau ona oti o lenei tagata.” Peitaʻi na augani atu Ieremia iā i latou, ia “faalogo i le siʻufofoga o Ieova.” Ona faapea atu lea o ia: ‘Ia outou iloa, afai tou te fasioti iā te aʻu, ua outou fasiotia le tagata e lē sala auā ua auina mai aʻu e le Atua e tautala atu ia te outou.’ E te iloa la le mea na tupu?—

Ua faapea mai le Tusi Paia: “Ona fai atu ai lea o alii ma le nuu uma i faitaulaga ma perofeta, ‘E lē tatau ona oti o lenei tagata, auā ua tautala mai o ia iā te i tatou i le suafa o Ieova lo tatou Atua.’” O lea ina ua lē faamaamulu Ieremia ona o lona fefe, na puipuia o ia e Ieova. Ae seʻi o tatou vaai i le mea na tupu iā Uria, o le isi perofeta a Ieova, ae e ese lana mea na fai.

Ua faapea mai le Tusi Paia: ʻNa vavalo Uria i mea e oo i Ierusalema e pei o upu a Ieremia.’ Ae ina ua ita le tupu o Ioakima iā Uria, e te iloa le mea na faia e Uria?— Na fefe o ia ma faamaamulu i le faia o le finagalo o le Atua ma sola i Aikupito. Na auina atu e le tupu tagata e suʻe o ia ma toe aumai. Ma ina ua aumai o ia, e te iloa o le ā le mea na faia e lenei tupu leaga?— Na ia fasiotia Uria i le pelu!—Ieremia 26:8-24.

Aiseā na puipuia ai e Ieova Ieremia ae lē puipuia Uria?— Ona e ui ina fefe Ieremia e pei o Uria, ae e leʻi faavaivai o ia e auauna iā Ieova ma sola ese. E leʻi faamaamulu o ia. O le ā se lesona e tatou te aʻoaʻoina mai iā Ieremia?— I nisi taimi atonu e faigatā ona faia le mea o fetalai mai ai le Atua, ae e ao ona tatou faatuatua ma usitaʻi iā te ia.

[Faaopoopoga i lalo]

Fesili:

○ O le ā le galuega na tofia e Ieova iā Ieremia?

○ Aiseā na manaʻo ai Ieremia e faamaamulu?

○ Aiseā na puipuia ai Ieremia ae lē puipuia Uria?

○ O le ā ua tatou aʻoaʻoina mai le faaaʻoaʻoga a Ieremia?