Pe a Feagai ma Faigatā

E tusa po o ā au taumafaiga fitā ina ia fiafia lau faaipoipoga ma lou aiga, ae e iai lava mea e tutupu e te leʻi faatalitalia e mou atu ai le olioli. (Failauga 9:11) Ua saunia mai ma le alofa e le Atua se fesoasoani mo o tatou mafatiaga. O lea, pe afai e te faatatauina taʻiala faale-Tusi Paia o loo mulimuli mai, o le a mafai e oe ma lou aiga ona onosaia so o se tulaga faigatā.

1. IA FAALAGOLAGO IĀ IEOVA

LE MANATU O LE TUSI PAIA: “Ia taʻu atu o outou popolega uma iā te ia, auā o loo manatu mamafa mai o ia iā te outou.” (1 Peteru 5:7) Ia manatua, e lē faapogaia e le Atua ou mafatiaga. (Iakopo 1:13) O le a fesoasoani mai o ia i le auala sili ona lelei, pe afai e te faalatalata atu pea iā te ia. (Isaia 41:10) “Ia outou sasaa atu iā te ia mea o loo i o outou loto.”​—Salamo 62:8.

E faalaeiauina oe pe a e faitau ma suʻesuʻe i le Tusi Paia i aso taʻitasi. O le iʻuga, e ʻfaamāfanafanaina ai i tatou e Ieova i o tatou puapuaga uma.’ (2 Korinito 1:3, 4; Roma 15:4) Ua ia folafola mai o le a ia aumaia ʻle filemu, e silisili i mea uma lava e manatu i ai.’​—Filipi 4:6, 7, 13.

LE MEA E MAFAI ONA E FAIA:

• Tatalo mo le fesoasoani a Ieova ina ia maua le toʻa ma le mafaufau lelei

• Ia iloilo ma filifili po o le ā le mea e sili ona lelei e mafai ona e faia e tusa ai o le faafitauli

2. IA TAUSI LELEI OE MA LOU AIGA

LE MANATU O LE TUSI PAIA: “O le loto o le tagata malamalama e na te maua le poto, a o taliga o ē e atamamai e saʻili i le poto.” (Faataoto 18:15) Ia iloilo ma iloa po o ā manaʻoga moni o sui taʻitoʻatasi o lou aiga. Ia talanoa atu iā i latou ma faalogologo lelei.​—Faataoto 20:5.

Ae faapefea pe a maliu sē e pele? Aua e te matamuli e faaali atu ou lagona ootia i lou aiga. Ia manatua, e oo lava iā Iesu ʻna tagi’ foʻi o ia. (Ioane 11:35; Failauga 3:4) E tāua foʻi le lava o le mālōlō, auā o le a fesoasoani e te onosaia ai tulaga faigatā.​—Failauga 4:6.

LE MEA E MAFAI ONA E FAIA:

• A o leʻi aliaʻe mai se tulaga faigatā, ia fai ma masani le talatalanoa ma lou aiga, auā o le a faigofie ai ona latou talanoa atu iā te oe, pe a tulaʻi mai se faafitauli

• Ia talanoa atu i isi atonu na oo foʻi i mafatiaga o loo outou fesagaʻia

3. IA TALOSAGA ATU MO SE FESOASOANI

LE MANATU O LE TUSI PAIA: “O le uō moni e alofa i taimi uma, ma o ia o se uso ua fanau mo taimi o puapuaga.” (Faataoto 17:17) O nisi taimi e naunau au uō e fesoasoani atu, ae e latou te lē iloa po o le ā le mea e ao ona fai. O lea, ia faailoa atu iā i latou ou manaʻoga moni. (Faataoto 12:25) E lē gata i lea, ia saʻili atu mo se fesoasoani i le auala e te faatatauina ai taʻiala o le Tusi Paia, mai iā i latou o ē e malamalama lelei i ai. O a latou fautuaga mai i le Tusi Paia o le a mafai ona fesoasoani iā te oe.​—Iakopo 5:14.

O le a e maua le malosi manaʻomia pe a fai ma au masani le faatasitasi ma tagata e faatuatua i le Atua ma ana folafolaga. O le a faamāfanafanaina atili oe pe a e fesoasoani i isi o loo manaʻomia ni faalaeiauga. Ia faailoa atu iā i latou lou faatuatua iā Ieova ma ana folafolaga. Ia faaalu le tele o lou taimi e faalaeiau ai isi, nai lo o le faaesea o oe mai iā i latou e alolofa iā te oe.​—Faataoto 18:1; 1 Korinito 15:58.

LE MEA E MAFAI ONA E FAIA:

• Talanoa atu i sau uō māfana ma ia talia lana fesoasoani

• Ia faailoa saʻo atu ou manaʻoga moni