O LE A AVEA SOO E TOʻAFĀ MA FAIFAIVA I TAGATA

Ua mavae taumafaiga a tagata Nasareta e fasioti Iesu, ma ua alu atu nei o ia i le aai o Kapanaumi, lea e latalata i le sami o Kalilaia. E taʻua foʻi lenei sami o “le vaituloto o Kenesareta.” (Luka 5:1) Ua faataunuuina ai i inei le valoaga o loo i le tusi o Isaia e faapea, o le a vaaia e tagata Kalilaia o loo nonofo latalata i le sami se malamalama tele.—Isaia 9:1, 2.

A o iai Iesu i Kalilaia, ua faaauau pea ona ia faalauiloa atu “ua latalata mai le malo o le lagi.” (Mataio 4:17) Ua toe feiloaʻi atu nei o ia i ona soo e toʻafā, o ē sa latou malaga faatasi i le taimi muamua. Ae ina ua latou tuua Iutaia ma Iesu ma agaʻi atu i Kalilaia, na latou toe foʻi ai i a latou pisinisi faifaiva. (Ioane 1:35-42) Ua oo nei i le taimi ua tatau ai ona latou mulimuli atu pea iā Iesu, ina ia mafai ai ona ia aʻoaʻoina i latou, e faaauau pea ona faia le faiva pe a mavae atu o ia.

Ua savali atu nei Iesu i le matafaga, ma ua ia vaaia ai Simona Peteru, o lona uso o Aneterea, ma nisi o le ʻaufaifaiva o loo faamamā a latou upega. Ua alu atu o ia i luga o le vaa a Peteru, ma talosaga atu iā te ia ina ia tuutuu teisi ese atu le vaa mai i le matafaga. Ua nofo i lalo Iesu, ma ua amata ona aʻoaʻo atu i le motu o tagata o loo i le matafaga, upu moni e faatatau i le Malo.

Ina ua uma ona aʻoaʻo atu Iesu, ona ia fetalai atu lea iā Peteru: “Ia tuutuu atu le vaa i le mea loloto, ma lafo ifo ai o outou upega, ina ia maua ai ni iʻa.” Ae ua tali mai Peteru: “Le Faiaʻoga e, ua alu le pō atoa o matou fagogota ae e leai se mea na maua, ae ona o lau fetalaiga, ou te toe lafo ifo ai upega.”—Luka 5:4, 5.

Ua lafo ifo nei a latou upega i le sami, ma ua maua mai ai le tele o iʻa. O lea, ua amata ai ona masaesae a latou upega. Ua latou talotalo atu i le isi vaega o la latou ʻaufaifaiva o loo i le isi vaa, e ō mai e fesoasoani iā i latou. E leʻi umi ae tutumu uma vaa e lua, ma ua amata ai ona tau gogoto ifo. Ua vaai atu Peteru i lenei mea, ona faapaʻū ai lea i vae o Iesu ma faapea atu: “Le Alii e, ia e maliu ese atu, auā o aʻu o se tagata agasala.” Ua tali mai Iesu: “Aua e te toe fefe, e amata atu nei ona e maua tagata.”—Luka 5:8, 10.

Ua fetalai atu Iesu iā Peteru ma Aneterea: “Inā mulimuli mai ia iā te aʻu, ou te faia oulua ma faifaiva i tagata.” (Mataio 4:19) Ua ia valaaulia foʻi isi tagata faifaiva o Iakopo ma Ioane, o atalii o Sepetaio. E la te leʻi toe faatalatū, ae ua tuua a la upega ae mulimuli atu iā Iesu. Ioe, ua tuua e i latou nei e toʻafā a latou pisinisi faifaiva, ma avea ai ma uluaʻi soo o Iesu, o ē o le a mulimuli atu pea iā te ia.