Le Tusi Mai i le Vaega Pule

Mo le ʻAutalaʻi Peleina o le Tala Lelei:

Maʻeu se faaeaga mataʻina o lo tatou autasi i le tapuaʻiga i le Atua moni e toʻatasi o Ieova! O i tatou o le “ʻaufaigaluega faatasi” ma ia, ma ua tuuina mai iā i tatou le galuega paia ma faasaoola, o le talaʻia ma le aʻoaʻo atu o le tala lelei o lona Malo ua faavaeina. (1 Kori. 3:9; Mata. 28:19, 20) Ina ia faataunuuina lenei galuega o loo faia i le lalolagi aoao i se tulaga filemu ma autasi, e tatau ona tatou maopoopo lelei.​—1 Kori. 14:40.

O le a fesoasoani lenei tusi iā te oe, ina ia e malamalama ai i le auala o loo faagaoioia ai le faapotopotoga Kerisiano i aso nei. O loo talanoaina ai faaeaga ma tiute tauave ua iai iā te oe o se tasi o Molimau a Ieova. Afai e te faatāuaina ou faaeaga ma faataunuu ou tiute tauave, o le a ʻfaamalosia lou faatuatua.’​—Galu. 16:4, 5; Kala. 6:5.

O lea, e matou te faalaeiauina oe ina ia suʻesuʻe māeʻaeʻa lenei tusi. Saʻili ni auala e mafai ai ona e faatatauina nei faamatalaga i lou olaga. O se faaaʻoaʻoga, afai e leʻi leva ona avea oe ma tagata talaʻi e leʻi papatiso, o ā laasaga e tatau ona e uia ina ia papatisoina ai oe e avea o se tasi o Molimau a Ieova? Ae pe afai ua uma ona e papatiso, o le ā e mafai ona e faia ina ia tuputupu aʻe ai faaleagaga ma faalautele lau auaunaga iā Ieova? (1 Timo. 4:15) E faapefea ona e saosaolaumea i le filemu o le faapotopotoga? (2 Kori. 13:11) E maua tali o na fesili i totonu o lenei tusi.

Pe afai o oe o se uso ua uma ona papatiso, o le ā e mafai ona e faia ina ia agavaa ai e avea o se auauna o le faiva, ma mulimuli ane avea o se toeaina? A o faaauau pea ona lolofi mai le faitau afe o tagata fou i le faalapotopotoga a le Atua, ua iai se manaʻoga faanatinati mo uso agavaa ina ia taʻimua. O le a fesoasoani lenei tusi iā te oe e iloa ai, po o le ā e aofia ai i le “aapa atu” i nei sini faaleagaga.​—1 Timo. 3:1.

Tau ina ia fesoasoani lenei tusi iā te oe e iloa ai lou tulaga i le faatulagaga a Ieova, ma ia faapelepele i ai. E matou te matuā alolofa iā te outou uma, ma e matou te tatalo pea o le a aofia outou i ē e faaauau ona tapuaʻi atu ma le fiafia i lo tatou Tamā i le lagi o Ieova, seʻia oo i le faavavau.​—Sala. 37:10, 11; Isa. 65:21-25.