Sa Lototele ma Faamaoni Ionatana

O Ionatana le atalii ulumatua o le tupu o Saulo, o ia o se fitafita lototele. Na faamatala e Tavita, e sili atu le saosaoa o Ionatana nai lo o se aeto ma e malosi atu nai lo o se leona. I se tasi aso, na iloa atu ai e Ionatana ni fitafita Filisitia i luga o se aʻega. Na ia fai atu i lana auauna na aveina ana meatau: ʻE faatoʻā ta osofaʻia i latou pe a faaali mai e Ieova se faailoga. Pe afai e valaau mai le ʻau Filisitia e ta te ō atu e tau, ona ta iloa lea ua oo i le taimi e osofaʻia ai i latou.’ Na valaau mai le ʻau Filisitia: ʻŌ mai tatou te tau!’ Ona ō aʻe ai lea o Ionatana ma lana auauna i le aʻega ma fasiotia fitafita e toʻa 20.

Talu ai o Ionatana o le atalii ulumatua o Saulo, o ia la sa tatau ona sosoo iā Saulo e avea ma tupu. Ae na iloa e Ionatana na filifilia e Ieova Tavita e avea ma tupu e sosoo ai o Isaraelu. Peitaʻi e leʻi lotoleaga ai o ia. Na matuā māfana le faauōga a Ionatana ma Tavita. Na la faia se tautoga e puipui e le tasi le isi. Na avatu e Ionatana iā Tavita lona ofu talaloa, pelu, ʻaufana, ma le fusipaʻu e faailoga ai le la faauōga.

A o sola ese Tavita mai iā Saulo, na alu atu Ionatana iā te ia ma faapea atu: ʻIa e faamalosi ma ia e lototele. Ua filifilia oe e Ieova e avea ma tupu. O loo iloa foʻi e loʻu tamā lenā mea.’ Pe e te manaʻo e iai sau uō lelei e pei o Ionatana?

E tele taimi na fesoasoani ai Ionatana i lana uō o Tavita, e ui lava na lamatia ai lona ola. Na ia iloa na manaʻo le tupu o Saulo e fasiotia Tavita. O lea na ia fai ai i lona tamā: ʻO se agasala lou fasiotia o Tavita, e leai se mea sesē na ia faia.’ Na matuā ita Saulo iā Ionatana. I nai tausaga mulimuli ane, na feoti faatasi ai Saulo ma Ionatana i se taua.

Ina ua mavae le maliu o Ionatana, ona suʻe lea e Tavita o le atalii o Ionatana o Mefiposeta. Ina ua maua o ia e Tavita, na ia fai atu iā te ia: ʻTalu ai sa avea lou tamā ma aʻu uō lelei, o le a ou tausia oe i lou olaga atoa. O le a e nofo i loʻu fale ma ta aai faatasi i laʻu laulau.’ E leʻi galo iā Tavita lana uō o Ionatana.