Le Agasala a le Tupu o Tavita

Na avea Tavita ma tupu ina ua maliu Saulo. O le taimi lenā ua 30 tausaga o Tavita. I se tasi pō ina ua mavae ni nai tausaga talu ona avea o ia ma tupu, sa ia iloa atu ai se fafine lalelei mai i le pito i luga o lona maota. Na iloa mulimuli ane e Tavita o Patesepa le igoa o le fafine, ma na faaipoipo atu i se fitafita e igoa iā Uria. Na aauina atu e Tavita o avefeʻau ina ia aami iā Patesepa. Na la faia feusuaʻiga ma iʻu ai ina tō Patesepa. Na taumafai Tavita e nanā le mea na tupu. Na ia faatonuina le taʻitaʻi o lana ʻautau e tuu Uria i le pito i luma o le ʻautau, ona ō ese lea o le ʻautau mai iā te ia. Ina ua fasiotia Uria i le taua, ona faaipoipo ai lea o Tavita iā Patesepa.

Peitaʻi na silafia e Ieova mea leaga uma na tutupu. O le ā o le a ia faia? Na auina atu e Ieova le perofeta o Natano iā Tavita. Na faapea atu Natano: ʻSa tele mamoe a se tasi tamāloa mauʻoa, ae e na o le tasi le tamaʻi mamoe sa iai a se tamāloa mativa na sili ona ia alofa i ai. Na ave e le tamāloa mauʻoa le mamoe e tasi a le tamāloa mativa.’ Na ita Tavita ma fai atu: ʻE tatau ona oti lenā tamāloa mauʻoa.’ Ona faapea atu lea o Natano iā Tavita: ʻO oe le tamāloa mauʻoa.’ Na matuā faanoanoa Tavita ma taʻutino atu iā Natano e faapea: ʻUa ou agasala iā Ieova.’ O lenei agasala na oo ai le tele o faafitauli iā Tavita ma lona aiga. Na faasalaina e Ieova Tavita. Peitaʻi, na ia faatagaina Tavita e ola pea talu ai sa faamaoni ma lotomaulalo o ia.

Na manaʻo Tavita e fausia se malumalu mo Ieova, ae na filifilia e Ieova Solomona le atalii o Tavita e fausia le malumalu. Na amata ona tapena e Tavita mea mo le fausiaina o le malumalu e fesoasoani ai iā Solomona. Na ia faapea ane: ʻE tatau ona sili le matagofie o le malumalu o Ieova. E laʻitiiti Solomona, ae o le a ou fesoasoani iā te ia e ala i le saunia o mea e manaʻomia.’ Na foaʻi atu e Tavita le tele o ana tupe mo le fausiaina o le malumalu. Na ia maua ni tagata popoto e faia galuega. Na ia aoina mai auro ma siliva, ma na maua mai foʻi laupapa arasi mai i Turo ma Saitonu. Ina ua lata i le taimi e maliu ai Tavita, na ia tuuina atu ai iā Solomona ata mo le fausiaina o le malumalu. Na ia faapea atu: ʻNa faatonuina aʻu e Ieova e tusia nei mea mo oe. O le a fesoasoani Ieova iā te oe. Aua e te fefe. Ia faamalosi ma fai le galuega.’