Ia Mafuta Atu i le Atua

Pe a Saʻili e se Tasi ua “Loto Momomo ma le Nutimomoia” le Faamagaloga

2 SAMUELU 12:1-14

E TATOU te agasala i le tele o taimi. Po o le ā lava lo tatou salamō, ae e tatou te ono taumānatu: ‘⁠Po o faafofoga mai le Atua i aʻu tatalo o le salamō? Po o le a ia faamagaloina aʻu?’ Ua aʻoaʻoina e le Tusi Paia lenei upu moni faamāfanafanaloto: E ui e lē manatu māmā Ieova i le agasala, ae e finagalo o ia e faamagalo le tagata agasala ae salamō. Ua faaalia manino i le 2 Samuelu mataupu 12, lenei mea i le tulaga o le tupu o Tavita i Isaraelu anamua.

Seʻi manatu i le mea na tupu. Na faia e Tavita ni agasala matuiā. Sa mulilua ma Patesepa, ma ina ua lē mafai ona nanāina le agasala, ona ia faia lea o se auala e fasiotia ai lana tane. E leʻi taʻua e Tavita lana agasala, ae na faafoliga atu o loo tumau pea lona tulaga mamā mo le tele o masina. Ae ui i lea, na silafia e Ieova le agasala a Tavita. Peitaʻi, na ia silasila i le loto o Tavita e ono mafai ona salamō. (Faataoto 17:3) O le ā o le a fai e Ieova?

Na auina atu e Ieova lana perofeta o Natano iā Tavita. (Fuaiupu 1) I le taʻitaʻiga a le agaga paia, na faalatalata atu ai Natano ma le faautauta i le tupu, ma na ia iloa e tatau ona faaeteete i ana upu. Na faapefea ona ia taʻu atu iā Tavita o loo ia ʻolegia o ia, ma fesoasoani iā te ia ina ia iloa le matuiā o ana agasala?

Ina ia ʻalofia le taʻutonuina e Tavita o ia lava, sa ia faamatala atu se tala e mautinoa e pāʻia ai le loto o lē na avea muamua ma leoleo mamoe. O le tala e faatatau i ni tamāloloa se toʻalua, o le tasi e mauʻoa a o le isi e mativa. “Sa matuā tele mamoe ma povi” a le tamāloa mauʻoa, a o le tamāloa mativa “e na o le tasi lava [lana] tamaʻi mamoe fafine.” Ina ua tali se mālō a le tamāloa mauʻoa, na manaʻo ai e sauni se taumafataga. Nai lo o le manaʻo e faaaogā sana lava mamoe, na ia fasi le mamoe e tasi a le tagata mativa. Ona na mafaufau Tavita o se tala moni, na toʻatamaʻi o ia ma vave ona fai atu: “E tatau ona oti le tagata ua faia lenei mea!” Aiseā? Auā na taʻua e Tavita: “E leʻi alofa mutimutivale o ia.”a—Fuaiupu 2-6.

Na taulau le fuafuaga na faia ai le talafaatusa a Natano. Na matuā aogā lava iā Tavita. Na taʻu saʻo atu e Natano iā te ia: “O oe lava le tagata!” (Fuaiupu 7) A o tautala Natano e fai ma sui o le Atua, e manino mai na faanoanoa Ieova i gaoioiga a Tavita. O le solia o tulafono a le Atua, na faaalia ai le lē faaaloalo o Tavita i Lē e Faitulafono. Na fetalai le Atua: “Ua e ʻinoʻino iā te aʻu.” (Fuaiupu 10) Na matuā tuia lona loto ona o le malosi o le aʻoaʻiga, na taʻutino ai Tavita: “Ua ou agasala iā Ieova.” Na faamautinoa atu e Natano iā Tavita ua faamagaloina o ia e Ieova, peitaʻi o le a ia seleseleina āuga o ana gaoioiga.—Fuaiupu 13, 14.

Ina ua uma ona faaali lana agasala, ona tusia lea e Tavita le Salamo 51. O loo faailoa ai e Tavita lona loto, ma iloa ai le tele o lona salamō. Ona o ana agasala, na iloa ai le manatu faatauvaa o Tavita iā Ieova. Ae ina ua salamō le tupu, na tofo ai i lelei o le faamagaloga a le Atua, na ia faapea atu iā Ieova: “Le Atua e, e te lē inosia le loto momomo ma le nutimomoia.” (Salamo 51:17) O nisi nei o upu e sili ona faamāfanafanaina ai le tagata agasala ua salamō, o loo saʻili i le alofa mutimutivale o Ieova.

[Faaopoopoga i lalo]