Se Tofotofoga i le Mauga o Karamelu

Na tele tupu leaga sa iai i ituaiga e sefulu o le malo o Isaraelu, ma o Aapo o se tasi o tupu e sili ona leaga. Na faaipoipo o ia i se fafine leaga e igoa iā Iesepela, o lē na tapuaʻi iā Paala. Na faatumulia e Aapo ma Iesepela le nuu i le tapuaʻiga iā Paala, ma na la fasiotia foʻi perofeta a Ieova. O le ā na faia e Ieova? Na ia auina atu le perofeta o Elia e taʻu atu se feʻau iā Aapo.

Na faapea atu Elia i le tupu o Aapo, o le a leai se timu i Isaraelu ona o lona amioleaga. E silia i le tolu tausaga, e leʻi ola ni mea totō, ma na fia aai tagata. Mulimuli ane, na toe auina atu e Ieova Elia iā Aapo. Na faapea mai le tupu: ʻO oe o sē faatupuina faafitauli. O oe ua māfua ai nei mea uma.’ Na tali atu Elia: ʻE lē o aʻu na māfua ai le leai o se timu. O oe na māfua ai, auā ua outou tapuaʻi iā Paala. O le a tatou faia la se tofotofoga e iloa ai po o ai le Atua moni. Ia faapotopoto le nuu ma perofeta a Paala i luga o le mauga o Karamelu.’

Na faapotopoto le nuu i luga o le mauga. Na faapea atu Elia: ʻIa outou filifili. Pe afai o Ieova le Atua moni, ia outou mulimuli iā te ia. Ae afai o Paala o le atua moni, ona outou mulimuli lea iā te ia. O laʻu luʻi lenā. E tatau i perofeta e 450 a Paala ona saunia se taulaga ma valaau atu i lo latou atua, ma o le a ou saunia foʻi se taulaga ma valaau atu iā Ieova. O lē e tali mai i le afi o le Atua moni lea.’ Na malilie tagata e faia faapea.

Na saunia e perofeta a Paala se taulaga. Na alu le aso atoa o latou valaau atu i lo latou atua: ʻPaala e, ia e faafofoga mai iā i matou.’ Ina ua lē tali mai Paala, ona taufaifai lea o Elia iā Paala. Na faapea atu Elia: ʻIa outou valaau leotetele atu iā te ia. Atonu o loo moe o ia, ma e ao ona fafagu iā te ia.’ Ua oo i le afiafi, ae o loo valaau atu pea perofeta a Paala iā te ia. Peitaʻi, e leʻi tali mai lava Paala.

Na tuu e Elia lana taulaga i luga o le fata faitaulaga ma sasaa i ai vai. Ona ia tatalo lea: ʻIeova e, faamolemole ia e faailoa mai i tagata o oe o le Atua moni.’ O le taimi lava lenā na aumai ai e Ieova le afi mai i le lagi ma ua mū ai le taulaga. Na valaau leotetele tagata: ʻO Ieova le Atua moni!’ Na faapea atu Elia: ʻIa pupuʻe i perofeta a Paala!’ Na fasiotia i le aso lava lenā perofeta e 450 a Paala.

Ina ua iloa atu se ao itiiti i luga aʻe o le sami, ona faapea atu lea o Elia iā Aapo: ʻUa gogolo mai timuga tetele. Inā sauni ia lau kariota ma toe foʻi i lou aiga.’ Na oo ina pogisa le lagi i ao, ua agi mai le matagi, ma ua maligi ifo timuga tetele, ona uma ai lea o le lāmala. Na alu saosaoa le kariota a Aapo. Ae o le fesoasoani a Ieova na mafai ai ona tamoʻe saosaoa atu Elia nai lo o le kariota. Ae pe na uma ai faafitauli o Elia? Seʻi o tatou vaai i le tala o loo sosoo mai.