Puipuia e Ieova Iosefatu

Na faaleagaina e Iosefatu le tupu o Iuta fata faitaulaga na faia ai taulaga iā Paala ma tupua sa iai i le nuu. Na manaʻo o ia e iloa e tagata tulafono a Ieova. O lea na ia auina atu ai perenise ma le ʻau sa Levī i vaipanoa uma o Iuta, ina ia latou aʻoaʻoina tagata i tulafono a Ieova.

Na fefefe nuu na lata ane e osofaʻi Iuta, talu ai na latou iloa sa fesoasoani Ieova i ona tagata. Na latou avatu foʻi meaalofa i le tupu o Iosefatu. Peitaʻi, na ō ane tagata Moapi, tagata Amoni, ma i latou mai i le vaipanoa o Seira e tau ma le nuu o Iuta. Na iloa e Iosefatu sa ia manaʻomia le fesoasoani a Ieova. O lea na ia faapotopoto ai tamāloloa, fafine, ma tamaiti uma i Ierusalema. Ona ia tatalo lea i o latou luma: ʻIeova e, e lē mafai ona matou manumalo pe a aunoa ma lau fesoasoani. Faamolemole faailoa mai le mea e tatau ona matou faia.’

Na tali mai Ieova i la latou tatalo: ʻAua tou te fefefe. O le a ou fesoasoani iā te outou. Inā tutū ia ma tutumau, ma vāai i le auala o le a ou faaolaina ai outou.’ Na faapefea ona faaolaina e Ieova i latou?

I le taeao na sosoo ai, na filifilia e Iosefatu ni tagata pepese ma faatonuina i latou e muamua atu i luma o le ʻautau. Na latou savavali mai i Ierusalema agaʻi i le nofoaga e fai ai le taua, e taʻua o Tikoa.

Na tau Ieova mo ona tagata, a o pepese leotetele ma le fiafia tagata pepese e viia o ia. Na ia faafenuminumiaʻi mafaufau o tagata Amoni ma tagata Moapi. O lea, na amata ai ona toe fetauaʻi lava i latou ma feoti uma ai. Peitaʻi, na puipuia e Ieova tagata o Iuta, fitafita, ma ositaulaga. Na faalogo tagata uma i nuu na lata ane i mea sa faia e Ieova, ma latou iloa ai sa faaauau ona puipuia e Ieova ona tagata. E faapefea ona puipuia e Ieova ona tagata? E tele auala e na te puipuia ai i latou, ma e na te lē manaʻomia le fesoasoani a tagata e faia ai faapea.