Puipuia e le Agelu a Ieova Esekia

Na pulea e le emepaea o Asuria ituaiga e sefulu o le malo o Isaraelu. A o lea ua manaʻo foʻi Sanerivi le tupu o Asuria e pulea ma ituaiga e lua o le malo o Iuta. Na ia faoa taʻitasi lava aai o Iuta. Ae o le aai na sili ona ia manaʻo i ai o Ierusalema. Peitaʻi, e leʻi iloa e Sanerivi sa puipuia e Ieova le aai o Ierusalema.

Sa totogi e Esekia le tupu o Iuta le tele o tupe iā Sanerivi, ina ia aua neʻi faoa ai le aai o Ierusalema. E ui na talia e Sanerivi nei tupe, ae na ia auina atu pea lana ʻautau malosi e osofaʻia Ierusalema. Na fefefe tagata o le aai, ona ua latalata atu le ʻautau a Asuria. Ae na faapea atu Esekia iā i latou: ʻAua tou te fefefe. E malolosi le ʻautau a Asuria, ae o le a foaʻi mai e Ieova iā i tatou le malosi e sili atu i lo o i latou.’

Na auina atu e Sanerivi lana avefeʻau o Ravesaki i Ierusalema, ina ia taufaifai i tagata. Na tu Ravesaki i fafo o le aai ma valaau atu: ʻE lē mafai ona fesoasoani Ieova iā te outou. Aua neʻi faasesēina outou e Esekia. E leai se atua e mafai ona puipuia outou mai iā i matou.’

Na talosaga atu Esekia iā Ieova po o le ā e tatau ona ia faia. Na tali mai Ieova: ʻAua e te fefe i faamatalaga a Ravesaki. E lē faoa e Sanerivi Ierusalema.’ Ona sosoo ai lea ma le mauaina e Esekia o ni tusi mai iā Sanerivi. Na taʻua i na tusi: ʻUa leai se isi mea e mafai ona outou toe faia. E lē mafai e Ieova ona laveaʻiina outou.’ Na tatalo Esekia: ʻFaamolemole Ieova, ia e laveaʻiina i matou, ina ia iloa ai e tagata uma e na o oe lava le Atua moni.’ Na faapea mai Ieova iā te ia: ʻE lē oo mai le tupu o Asuria i totonu o Ierusalema. Ou te puipuia loʻu aai.’

Na mautinoa e Sanerivi e lē o toe umi ona ia faoa lea o Ierusalema. Ae i lenā lava pō, na auina atu ai e Ieova se agelu i le nofoaga o loo iai fitafita i fafo o le aai. Na fasiotia e le agelu fitafita e 185,000. Na maliliu fitafita malolosi a le tupu o Sanerivi. Ua leai se isi mea e mafai ona ia toe faia, ae na o le toe foʻi i lona aiga ona ua faatoʻilaloina o ia. Na puipuia e Ieova Esekia ma le aai o Ierusalema e pei lava ona ia folafolaina mai. Pe ana e iai i Ierusalema, pe e te maufaatuatuaina Ieova?