Fēsili Mai le Au Faitau

◼ O le a le eseesega i le va o le tino ua lē oti lava ma le ola e faavavau?

O le olioli uma ē faauuina e maua le ola agaga i le lagi ma tagata o ē ua tau amiotonuina e le Atua mo le ola i le lalolagi Parataiso. O lea pe a e mafaufau i ai, o le lē oti lava i le lagi ma le ola e faavavau i le lalolagi e auga lava i le mea e tasi—o le ola e faavavau. Ae ui i lea, e i ai faamatalaga e uiga i le lē oti lava e ao ona faia.

O le upu Eleni ua faaliliuina i ai le “lē oti lava” (athanasia) ua fai ae mai le a ma mai le thanatos, o lona uiga “oti”. O le uiga autu o le lē oti lava o le ‘aunoa ma le oti,’ po o le lē toe oti. Ua manino la, o Ieova o le puna autu o le ola uma ma e soifua pea. (Salamo 36:9; 90:1, 2) Ua faamaonia lenei e le mea moni i lona Alo faamamaluina o lē ua avea nei ma “pupula o lona [Atua] mamalu ma ua matuā tusa lava ma ia,” ua faamatalaina “o Tupu o tupu, ma le Alii o alii; o loo na o ia o lē soifua pea lava.” (Eperu 1:3; 1 Timoteo 6:15, 16) E leai se mea fai ola na te faoa le ola o Iesu lē soifua pea, ua ese mai ai i tagata po o agaga e mafai ona oti. Ua tatou faitau atili: “Ua tatou iloa ua toetu mai Keriso nai e ua oti, e le toe maliu lava o ia e le toe pule le oti ia te ia.”—Roma 6:9.

E ui o le lē oti lava ua i ai se uiga o le ola e faavavau, o le lē oti lava e foliga mai e i ai se aafiaga sili atu nai le ola e faavavau o sē ua ia mauaina. E foliga mai e faasino i uiga faapitoa o le olaga, ma e soo faatasi ma le ola pea. Ua faapea mai le Tusi Paia e faatatau i Kerisiano faauuina: “Auā e tatau ona ofu o lenei tino iu vale i le tino ola pea, ia ofu foi lenei tino oti i le tino lē oti lava. Pe a ofu foi lenei tino iuvale i le tino ola pea, a ofu foi lenei tino oti i le tino lē oti lava, ona taunuu ai lea o le upu ua tusia: ‘Ua faaumatia le oti i le manumalo.’”—1 Korinito 15:53, 54.

E le o saunia e le Tusi Paia faamatalaga e tele e faatatau i le uiga o le ola ua taua o le lē oti lava. Ua tatou iloa o le tagata ola—e oo lava i tagata lelei atoatoa e i ai le faamoemoe e ola faavavau i luga o le lalolagi—e tatau ona inu ma ʻaai ina ia tumau pea i le ola, nei tei ua feoti ma maua ai le tino iu vale. (Kenese 2:9, 15, 16) e leai se masalosalo o le lē oti lava e aofia ai se uiga o le olaga e le manaomia ona faatumauina faapena. O lea e mafai ona faapea o i latou o ē e lē oti lava o e faapea ‘ua le toe pule le oti ia te i latou.’ O le a talafeagai foi lena, ma lo latou mauaina o le tino ola pea e faaalia ai e le pala, faaleagaina pe iuvale o latou tino agaga. (Faatusatusa 2 Korinito 5:1; Faaaliga 20:6) E iloa ai i lenei auala le eseesega o le lē oti lava ma le ola e faavavau faaletagata.

E tauia e Ieova le Atua o le Faamsino lelei atoatoa le vaega faauuina i le lē oti lava. Pe a ia fuafua i lona atamai e tele ma lana silafaga e tofotofoina ma le atoatoa ma le lē fesiligia lo latou agavaa mo le lē oti lava, latou te faatuatuaina o le a tumau lo latou faamaoni. O i latou uma e faamasinoina e Ieova e mauaina le ola e faavavau, po o se tino agaga e lē oti lava po o se tagata lelei atoatoa, o le a mafai ona tapuai ia te ia e faavavau. O lea, i lona ta aofai mulimuli la, o le olaga faaletagata e faavavau ma le lē oti lava i le lagi e auga uma lava i le ola e faavavau.—Ioane 17:3.

◼ Pe ua saʻo ona malamalama mai le Ioane 20:25 faapea sa faatautauina Iesu i ona lima e taitasi ma le fao na tutui ai?

Ua faapea mai le Cyclopaedia of Biblical, Theological, and Ecclesiastical Literature, tusia e M’Clintock ma Strong:

‘Ua telei le taimi la faalavelave ua faaaluina i le fefalōaʻi pe tolu pe fa fao na faaaogaina e faamau ai le Alii. Ua tumau le manatu o Nonnus mulimuli mai ai ma Gregory Nazianzen faapea e na o le tolu fao sa faaaoga. O le talitonuga lautele e faapea e fa fao, o se manatu e lagolagoina i se tulaga lautele ma finauga fia iloa a Curtius. O isi ua faitauina le aofai o fao i se maualuga e oo atu i le sefulufā.’—Volume ll, itulau 580.

Ua faapea ma le Mataio 27:35: “Ua latou faasatauro ia te ia, ona tufatufa ai lea e i latou o ona ofu, ua latou fai ai le vili.” Ua itiiti se faamatalaga ua aumaia, i le Mareko, Luka ma le Ioane. Ina ua mavae le faatuina o Iesu, sa faapea mai Toma: “Afai ou te le vaai atu i ona lima, i mea na tutui i fao ma tuu loʻu lima i lona itu, ou te le talia lava.” (Ioane 20:25) O lea e ui i nisi taimi e saisaia ai tagata soitulafono i se satauro i ni maea, o Iesu sa tutuiina i fao. Ua manatu nisi mai le Ioane 20:25 e lua fao na faaaogaina, e taitasi i ona lima. Peitai pe o le faaaogaina o le numera tele (o fao) e tatau ona malamalama i ai o se faamatalaga maoti e faailoa ai faapea o aao taitasi a Iesu sa tutuiina i ni fao eseese se lua?

Ua faapea mai Iesu toe faatuina i le Luka 24:39: “Ia outou vaavaai mai i oʻu lima ma oʻu vae, auā o aʻu lava lenei.” Ua tau mai a i nei sa tutuiina foi vae o Iesu. Talu ai e lei taʻua e Toma tulaga fao i vae o Iesu, o lona faaaogaina i le numera tele “o fao” atonu o se faasinoga lautele i fao e tele na faaaogaina i le tutuiina o Iesu.

O lea, e le talafeagai i lenei manatu ona faapea atu ma le mautinoa pe fia le aofai o fao na faaaogaina. Soo se ata o Iesu i luga o le satauro e ao ona iloaina o galuega a tagata tusi ata o loo aumaia ai na o sina faaaliga e faavae i faamaoniga le lava o loo ia te i tatou. O le finau i se faamatalaga le taua ai le faatagaina e faanenefu ai le upu moni taua faapea: “Ua tele i tatou ma le Atua i le maliu o lona Alo.”—Roma 5:10.