1986—O se Tausaga e “Puipuimaluina ai le Filemu”?

SA ALAGAINA mai e Malo Aufaatasi le 1986 o le Tausaga Faavaomalo o le Filemu. O le ā se agaʻi i luma o i ai inā faatatau i le filemu i le lalolagi? O faamatalaga nei mai le kelope aoao. Mai ia Aperila 7 e oo i le 12, 1986, sa fai ai se vaega a faipule uma mai atunuu e 103 i lona 75 o fonotaga a le IPU (Inter-Parliamentary Union) i le Aai o Mexico.

Na molioʻo atu ai e le Failautusi Sili o Malo Aufaatasi o Javier Perez Cuellar lenei feau i le Faalapotopotoga: “A o amataina le Tausaga Faavaomalo o le Filemu, tau ina ia teu i mafaufau o tagata uma lava lona matua lenei—‘Ia Puipuimaluina le Filemu ma le Lumanai o Tagata’—ua saunia se taulaiga e lē gata i le 1986 a e mo tausaga o i luma. Seʻi tatou puʻea ma le maumauaʻi avanoa o le 1986.”

Na taʻua e le Peresitene o le IPU faapea sa ia asia nisi o atunuu “ina ia fesili atu pe mafai ona avea tagata o le palemene i inā ma tagata o le filemu” O lana faaiʻuga: “Sa ou iloa ai maeu se faigata o lenei mea, ma o le mea moni i nisi tulaga e leai se faamoemoe.”

Sa faamatala mai e se Vaega i Mexico lava ia lo latou “matuā faameo tele faapea e ui lava ina faatuputeleina le popole o tagata lautele i le mataʻutia o le gaosia o auupega ma taumafaiga a Malo Aufaatasi, e leai lava se faatinoga tele ua faia i tausaga ua mavae e uiga i le lafoaʻia o auupega.”

Na taʻua foʻi e se Vaega i Anetenitina “faapea e lē mafai lava e le onosefulu miliona na feoti i le taua e lua a le lalolagi, po o le iʻuga o le pomu niukelea na pa i Hiroshima, po o le selau tolusefulu o tauvaga tau i mea tau ona lava e aʻoaʻoina ai le fanau a tagata faapea o loo ua i ai nei o ia i le faitotoa o lona faaumatiaga.” Sa matuā i ai lava se popolega faapea “o Malosi faaniukelea e lima, ua aofia ai le sili atu i le 50,000 auupega faaniukelea, o se aofaiga ua tutusa ma le tolu tone o malosi e faapasae ai mo mea uma taitasi o loo aināina lo tatou paneta.”

O sui tumau o le Komiti o le Saogalemu a Malo Aufaatasi na i ai ni latou sui, ma o nisi nei ō a latou faamatalaga:

Na taʻua e le Vaega a Peretania “O le sini autū o le tatau lea ona puipuia le faia o ni tauvaga o mea tau i le vateatea. Peitaʻi, e manaomia ona tatou faamaonia . . . Ua uma ona i ai faia faavaegaau i le vateatea.” Na faaamamafa mai e le Vaega a Farani: “faapea o le leai o se poto po o se tomai i Malo Aufaatasi e tausia ai se soagalemu atoatoa ma le filemu o le ʻauga faapitoa lea o le solia e nisi Setete o mataupu silisili tāua o tulafono faavaomalo ma tulafono tau i amioga mamā.” Na faamamafa mai foʻi e le Vaega a Rusia” ua matuā i ai se popolega tele e uiga i le mataʻutia o le faamataʻu mai o mala faaniukelea i le fanau a tagata, lea e mafai ona oo atu ai ina faaiʻuina le faamalamalamaina o tagata i luga o le lalolagi.” Na lipotia mai le faapea mai o se sui mai le Iunaite Setete o le a “avea o se taumafaiga tele o le taumafai e faailoa atu le manaoga faavaomalo ina ia felagolagomaʻi e tau faasaga i faiga faatupu faalavelave.”

I le isi itu o le lalolagi, na faailogaina ai le Tausaga Faavaomalo o le Filemu ia Mati 21 i se faatasiga i le Maota Tele o Tagata Beijing. Sa sili atu ona mautinoa ma aasa na i lo isi le palemia Saina o Zhao Ziyang i lona faapea mai: “Pe a tausia pea e tagata o le lalolagi a latou taumafaiga maumauaʻi, e mautinoa lava lo latou manumalo i le filemu.”

E tusa ai ma le Tausaga Faavaomalo o le Filemu a Malo Aufaatasi na faapea mai ai Pope Ioane Paulo ll ua manao le Vaaiga Paia ina ia faagaee se “gaoioiga o tatalo i le lalolagi aoao mo le filemu e aofia ai malo uma ma tapuaiga.”

Ua solia ese le filemu mai lenei lalolagi. Ma ai se ā? O le filemu moni e tatau ona faavae i le alofa; a o le lalolagi ua fevaevaeaʻina i le faamaualuga i va o malo ma le inoino. E manaomia e le filemu moni le poto ma pulega tonu; o pulega a tagata lē lelei atoatoa ua lē taulau ai ona latou ausia lenei tulaga. O le filemu moni e tatau ona faaautū i le tapuaiga autasi a le Atua moni e toatasi; o tapuaiga a le lalolagi ua vaevaeina ma le leai o se faamoemoe i le faitau afe o lotu eseese, ma e leai se tasi o na lotu e faaaloalo ia Ieova o le Alii Silisili Ese. E manaomia e le filemu moni ona aveesea le “atua o le lalolagi nei,” o Satani le Tiapolo, ma lana faiga pulega; a e na o le malo o Ieova i aao o Lana Keriso na te mafai ona tuʻimomomoina Satani ma ana galuega.—2 Korinito 4:4.

[Ata i le itulau 15]

O le talā auro a Ausetalia o le “filemu”

O le faailoga tusi 10 seleni o le “filemu” Kenya