Ua Agaʻi atu Malo Malolosi o le Lalolagi o Tala Tuufaasolo o le Tusi Paia i le lo Latou Iʻuga!
PE E MAFAI ona e manatu faapea ua tusia tala tuufaasolo a o leʻi tupu? E te fai mai ea ‘e lē mafai lava’? A e peitai, o loo iai se tusi ua taʻu moni mai ai lava tala tuufaasolo a o leʻi tutupu—e faitau selau, o nisi taimi e oo lava i le faitau afe o tausaga a o leʻi tutupu na mea! O lena tusi o le Tusi Paia.
E lē gata ina lipotia mai ma le saʻo e le Tusi Paia mea tutupu anamua, a e i se auala e maofa ai ona ua oo lava foi ina ia valoia mai le otootoga tāua o le tala tuufaasolo o le lalolagi e pei ona o lea aafia ai tagata o le Atua, mai le vaitaimi o Papelonai anamua, e sili atu i le 2, 500 tausaga ua mavae, e agai atu ai ma e oo lava ina sili atu i tua i o tatou aso o loo iai nei.
Na tuuina atu i le perofeta o Tanielu, o lē na ola i lona ono o senituri a o leʻi oo mai i o tatou Aso Taatele [T.L.M] ni faaaliga mavaevae se fa, ia e feagai ma le lumanai o le tala tuufaasolo o le lalolagi. O fea na ia maua ma ai ia na faamatalaga? Na faapea mai Tanielu: “A o iai le Atua i le lagi, o lē na te faaalia mea lilo.” (Tanielu 2:28) Na maofa le au suʻesuʻe i le eleele i faamaoniaga ofoofogia e faamaonia ai le saʻo o le tala tuufaasolo ma valoaga na maua i le Tusi Paia, ona o toega o mea na tuua e malo malolosi anamua o le lalolagi ia na latou maua mai i le eleele.
O le lua o malo malolosi o tala tuufaasolo o le Tusi Paia, o Aikupito ma Asuria, ua leva tausaga talu ona iai a o leʻi oo i aso o Tanielu. Na pule Papelonia i aso o Tanielu, ma o igoa o ia malo malolosi e lua o le lalolagi e sosoo ai na faailoa atu i le perofeta. (Tanielu 2:47, 48; 8:20, 21) O le isi lua o le a mulimuli mai i nei malo, ma aumaia ai i tatou i ona po nei.
E Fia?
E tusa ia ma le Tusi Paia, e fia ia malo malolosi o le lalolagi o le a iai? Na tuuina atu le tali i le aposetolo matua o loane ma faaali atu iai po o fea o tatou iai i le faasologa o taimi. Na taʻu atu e se agelu ia Ioane: “O tupu foi ia e toafitu; e toalima ua pauū, o loo iai le tasi, e lei oo mai nei foi le tasi.”—Faaaliga 17:10.
O ā malo malolosi e lima o le lalolagi ia na oo mai ma toe pauū i aso o Ioane? O Aikupito, Asuria, Papelonia, Metai ma Peresia, Ma Eleni. O lē fea sa iai pea? O Roma. A e o lē fea malo “e lei oo mai?” Le Malo Malosi o le Lalolagi i o tatou aso o Peretania ma Amerika. o malo malolosi nei o le lalolagi e sili ona manatu mamafa iai tagata o le Atua i aso anamua ma ona po nei.
O le mea moni e aupito sili ona tāua lenei: Sa tatau ona na o le toafitu malo i le faasologa o malo malolosi faapea o le lalolagi! A e i le taimi lava foi lea, o le a iai se malo malosi lona valu lea o le a aofia ai ma mea totoe o ia malo e fitu, lea na valoia o le a iai mo sina taimi puupuu, i ona po o le malo lona fitu. (Faaaliga 17:10, 11) O le uiga o lenei mea, ua tatou ola nei i le vaitaimi o le malo mulimuli mai malo malolosi o le lalolagi o pulega faale-Tagata. O le a lē toe iai se isi!
Ua lē o toe umi nei, ona oo mai lea o le toe aso mo malo malolosi o le lalolagi. Na valoia e Tanielu faapea o nei faiga faaletagata o le a nutipalaina ma ‘lelea ese i le matagi.’ (Tanielu 2:35) O le ā o le a suia i latou? I se mea o le a sili atu ona lelei! Ua lipotia mai e Tanielu: “O ona po o ia tupu e faatuina ai e le Atua o le lagi o le malo e le faaumatia e faavavau; . . . na te tuʻimomomoina ma faaumatia ia malo uma lava, a o ia e tumau lava e faavavau.” (Tanielu 2:44) O lea, e leai se mea e mafai ona suia nei malo malolosi faaletagata o le lalolagi na i lo o le Malo o le Atua. Maeu se faaleleia uiga ese o le a iai i le pulega o le lalolagi!
E lē taumatea ua e iloa se mea e uiga i malo malolosi o le lalolagi. A e pe e mafai ea ona fesoasoani ia te oe lou iloa atili e uiga ia latou tu, a latou lotu, ma lo latou feagai ai ma tagata o le Atua ma valoaga o le Tusi Paia, e faateleina ai lou malamalama e uiga i le tala tuufaasolo o le fanau a tagata e tusa ai ma le malamalamaga i le Tusa Paia?
Ioe, o le mea moni. O lea ma tou te fiafia ai e faasalalau atu, e amata mai i lenei lomiga, se faasologa o ni mataupu se valu e feagai ma malo malolsi o le lalolagi. O nei mataupu e ao ona fesoasoani e faaamautinoa atu ai ia te o faapea o le tala tuufaasolo o loo taʻua i le Tusi Paia, e mafai ona faalagolago iai ma e mau faatuatuaina. E ao foi ona faaamalosia ai lou faatuatua e ia mataupu i le mea moni faapea, e faamaoni ma tonu valoaga o le Tusi Paia!