Tatalo i le Mauga o Hiei—Pe o se Manumalo ea mo le Filemu o le Lalolagi?

PE O LE A aumai e le tatalo le filemu i le lalolagi? “E lē oo ma le filemu i le na ona tatalo. E lē faigofie faapena,” na fai ma ai Gijun Sugitani, o se na faamaopoopoina le sauniga tatalo na faia ia Aokuso 1987 i Iapani. “A e ou te manatu foi o le a lē faataunuuina le filemu e aunoa ma le faia o ni tatalo.” Sa tutusa lava lona manatu ma le toʻa 500 o tagata Iapani ma le toʻa 24 o sui mai isi atunuu na auai i lena sauniga na faia i Kyoto i Iapani o le Faauluuluga o Lotu i le 1987.

O le ituaiga Tendal o le lotu Puta na ia fautuaina malosi le faia o lenei sauniga tatalo e mulimuli atu ai i le sauniga lea na faia i le 1986 i Assisi (Italia) ma fuafuaina ai ina ia ō gatasi ma le faamanatuina o lona 1,200 tausaga talu ona tatalaina le Malumalu o Enryakuji i le Mauga o Hiei. Sa auauaʻi tagata o o latou tupuaga o Puta, faatagā Kerisiano, Confucian, Hinitu, Isalame, Siu, Sikh, ma Shinto, i le ofoina atu o tatalo i luga o le mauga. Pe sa avea moni lea sauniga o se manumalo mo le filemu o le lalolagi?

Sauniga o le ‘Teu Fugalaau’

“O lenei sauniga faauluulu o se teu lea faalelotu o fugalaau,” na fai mai ai Etai Yamada, o le ositaulaga sili a le ituaiga lotu Tendai ma o le taʻitaʻifono. “E leai se fugalaau e mamae pe leai foi sona manogi.” O le uiga o lana tala e faapea o le mea sili lava pe a autasi lotu i lo latou naunau mo le filemu o le lalolagi, ona mafai ai lava lea ona taofia e lotu taitasi ona lava talitonuga feteenaʻi, e pei o fugalaau eseese taitasi i se teu e tasi.

I totonu o “fugalaau” taatele sa i ai i le sauniga, sa i ai le Lotu Katoliko, sa fai ai ma sui Katinale Francis Arinze o le Failautusi a le Vatikana mo Tagata e Lē ni Kerisiano. Na faitauina e Arinze le feau a le pope, na faapea mai, “e lē mafai ona maua le filemu e aunoa ma le tatalo ma e ui lava atonu ua amata ai taua e ni nai tagata, a e o le fllemu e manaomia ai le felagolagomaʻi ma le lagolago malosi a tagata uma.”—Mainichi Daily News, Aokuso 5, 1987, itulau 12.

Afai o le faamoemoe mo le filemu o le lalolagi “e manaomia ai le felagolagomaʻi ma le lagolago malosi a tagata uma,” o le ā la le malosi o i le Atua lea o loo latou ofo atu i ai tatalo? Na tatalo sui mo le filemu, a e ua latou talitonu o le a aumaia lea e taumafaiga faaletagata. E pei lava o se teu fugalaau ua manaia lona faavasegaina, ua tatau foi ona faapea le manaia o le faaalia ma o a latou lava taumafaiga i a latou sauniga tatalo.

E ese le manaia o se teu fugalaau pe a tagaʻi i ai, a e a uma loa le sauniga faapitoa, ona magumagu loa lea o fugalaau e leai ni aa ma ua mavae atu lo latou matagofie. Ua vave lava ona lē iloa le matagofie o fugalaau taitasi ma le pupula mai o le teu. Ma o le a lē fuafua foi e ia fugalaau e fuaina ma ni fua. Pe sa iʻu foi faapena lenei sauniga faauluulu e pei o le “teu fugalaau” e lē fuaina maia ni fua?

Sa leʻi faamalieina taʻitaʻi lotu lava latou o ē sa auai i iʻuga na maua mai ai. “Sa latou mananao ia matuā patino mai po o ā ni auala e tatau ona faia e lotu i le lumanai a e na latou fai mai sa lē lava se taimi mo na talanoaga,” ua lipotia mai ai e le Asahi Evening News. A e peitai, o se iʻuga faapena na faatalitalia. “O lo matou sini,” na fai mai ai Takaaki Kobayashi, o se tasi o ē na faamaopoopoina le sauniga faauluulu, “o le fia faalogo atu lea i fautuaga a lotu taitasi i auala e sili ona lelei e maua ai le filemu. O le tulafono autū o le tatau lea ona faalogologo atu sui taitasi o loo auai i manatu o isi e aunoa ma le faia o se manatu, pe tali atu pe tetee atu foi.” Sa faatapulaaina a latou taumafaiga i le sauniga tatalo ina ia na ona faalogologo atu i isi, a e leai se gaoioiga. Ma o le iʻuga la, sa “lē taulau i lea fono ona faataatia se faasologa manino mo le ausiaina o sini o le sauniga faauluulu.”

Pe sa mo Kerisiano Moni Lea Mea?

Atonu o tau manatu tagata o loo taumafai e mulimuli atu ia Iesu Keriso: ‘Pe e ao i se Kerisiano ona auai i se sauniga tatalo faapea?’ O le mea moni faapea na faia i le Mauga o Hiei, le mauga paia o le lotu Puta, ua avatu ai mafuaaga ina ia mafaufau i ai. Pe e mafai ona e vaai faalemafaufau i le afio aʻe o Iesu Keriso i le mauga paia o Puta e ofoina atu se tatalo mo le fllemu?

Na lapataia e le aposetolo o Paulo soʻo o Iesu Keriso: “Aua tou te amo faalegatasi ma e le talitonu; auā pe faapefea ona faatasi o le amiotonu ma le amio leaga? Pe faapefea foi ona mafuta o le malamalama ma le pouliuli? Pe faapefea foi ona loto gatasi o Keriso ma Pelialo? Pe faapefea foi ona tofusia faatasi o lē talitonu ma le ua le talitonu? Pe faapefea foi ona [tutusa NW] o le malumalu o le Atua ma tupua?. . .O lea ia o mai ai outou nai totonu ia te i latou, ma ia outou vavae mai, ua fetalai mai ai le Alii [Ieova, NW], aua foi tou te papaʻi atu i se mea leaga; ona ou talia ai lea o outou.—2 Korinito 6:14-17.

Pe o le a lē avea ea le ofoina atu o tatalo i se sauniga o le faatasiga o lotu eseese i le mauga paia o Puta e faapea, e avea ai se Kerisiano ma sē ‘ua amo faalegatasi’? Pe o lona uiga ea foi la faapea, e ao i Kerisiano moni ona lē galue i le tatalo atu mo le filemu? E leai lava!

Tatalo mo le Filemu

I lana valoaga e faatatau i “aso e gata ai,” na tautala ai le perofeta o Isaia e uiga i tagata e toatele o ē o le a faapea mai: “O mai ia, tatou o ae ia i le mauga o Ieova,” a e lē o le Mauga o Puta o Hiei. O “le mauga o Ieova” ua faaatagia ai le tapuaiga moni a le Atua o le Tusi Paia. O le ‘o aʻe’ i lena mauga o le a iʻu i le ā? Ioe, o le a “aʻoaʻo mai foi o ia [Ieova] ia te i tatou i ona ala, ona tatou savavali ai lea i ona ala,” na fai mai ai Isaia! “E faamasino foi o ia [Ieova] i nuu ese, na faaopoopo mai ai le perofeta. O le iʻuga, o le a i ai le filemu i le lalolagi, auā na valoia e Isaia faapea o tagata tapuai moni o le a “latou tuʻi ai lea i a latou pelu e fai ma uamea o suotosina, o latou tao foi e fai ma polo e teu aʻi vine; e le sii atu le pelu e le tasi nuu i le tasi nuu, latou te le toe aʻoaʻo foi i taua.”—Isaia 2:2-4

Ua uma ona faia lenei tulaga i totonu o Molimau a Ieova, ma ua lē pine a e aofia ai le lalolagi atoa. A e faapefea? O le a aumaia le filemu tumau e Ieova le Atua, a e lē o tagata, e ala i lona Malo. O le a tafi mamāina e lea malo le lalolagi mai ē talepe filemu ma o le a momoli vave mai ai se lalolagi parataiso. (Faaaliga 11:15, 18) I le lē pei o faamatalaga na sa faia i le saunlga a faauluuluga o lotu lena sa pei o se faaviiviiga o se ‘teu fugalaau’ a e lea ni fua, o le a lē foi fua afioga a Ieova e aunoa ma ni iʻuga.—Isaia 55:11.

Ai se ā, la, e ao ai ona tatou tatalo mo le filemu pe afai o le Atua o le a aumaia le filemu e ui lava po o ā taumafaiga a tagata? I le tatalo atu ina ia oo mai le Malo o le Atua, ua tatou faailoa atu ai lo tatou lava faanaunau atu mo le filemu ma ua faataʻitaʻia ai foi lo tatou faatuatua i le auala o le a aumaia ai lea e le Atua i le lalolagi. (Mataio 6:9,10) O la tatou vaai atu i le oo mai o le filemu mai le Atua po o le leai foi e faalagolago lea i lo tatou “faamoemoe ia Ieova.” O lea, ia ō mai i “le mauga o Ieova” ma auai i le tatalo mo le filemu moni ua ia folafola mai.—Salamo 37:9, 11, NW

[Ata i le itulau 8]

E ese le manaia o se teu fugalaau pe a tagaʻi i ai, a e lē fuafuaina e fua mai ai ni fua

[Ata i le itulau 9]

Le Mauga o Hiei, le mauga paia o le ituaiga Tendai o le lotu Puta, o i ina na faia ai le sauniga tatalo