Se Isi Matātiʻa Tāua i le Aʻoaʻoga Faale-Tusi Paia

O LE ASO TOFI, Oketopa 1, 1987, sa o se tasi lea o matātiʻa i le aʻoaʻoga faale-Tusi Paia e pei ona ofoina mai e le Sosaiete o Molimau a Ieova i le lalolagi aoao. Na faailogaina ai le faavaeina o le Aʻoga fou e Aʻoaʻo ai i le Faiva. O le uluai vasega e toʻa 24 uso nofo fua na lipotia atu mo le aʻoaʻoina faapitoa i le Maota Fono tele o Pittsburgh i Coraopolis, Pennsylvania. Sa faaavanoaina e tagata e mafana o latou loto o ē e ona aiga i totonu o Molimau i lena vaipanoa, o latou fale ina ia nonofo ai nei tagata aʻoga mo le valu vaiaso o la latou aʻoaʻoga.

Sa lesitalaina i le taeao tagata aʻoga, na latou maua a latou tusi aʻoga faapea foi ma faatonuga e amata ai. I le 7:30 i lena afiafi po, sa pa tutuʻi le Maota Fono i le 1,518 o Molimau fiafia o ē na naunau e fia auai i le tatalaina aloaiʻa o lenei aʻoga fou.

o Albert Schroeder, o se sui o le Vaega Pule o Molimau a Ieova, sa avea o le taʻitaʻifono. Ina ua uma le pese ma le tatalo, ona ia faafeiloaʻi mai lea o Robert Dawson, o le ovasia o le aai o Pittsburgh. Sa faatalofa atu ma le mafana le Uso o Dawson i le toʻa 24 o tagata aʻoga i Pittsburgh ma faamālo atu i aiga e 13 ia na latou tauofo e saunia mea e nonofo ai i latou. Sa ia faamanatu atu ia i latou na talimalo faapea, o le a avea o lo latou faaeaga le faaalia o le alofa e fua mai ai le talitonu, le faamoemoe, ma le onosai i mea uma lava. (1 Korinito 13:7) Sa ia faamanatu atu foi i tagata aʻoga faapea, i le avea o i latou ma malo, e ao ona latou faaalia le loto faafetai, loto maulalo, ma le fia fesoasoani. I lenei auala, e iʻu ai i ni faauoga e mafai ona tumau i le olaga atoa.

Ona faafeiloai atu loa lea o tagata aʻoga, e taʻu atu e le tagata lava ia lona igoa ma po o fea e sau ai ma o le ā sa avea o lana galuega i le auaunaga ia Ieova. O nisi na ō mai mai Puerto Rico, Anitenitina, Kanata, ma Hong Kong, a o isi uma e ō mai mai le vaega i sasaʻe o le Iunaite Setete. E ese ai mai le faa-Peretania, o nisi o i latou e mafai ona tautatala i le faa-Sepaniolo, faa-Falani, faa-Italia, po o le faa-Saina.

Ona sosoo ai lea ma le faafeiloai mai e le taʻitaʻifono James Hinderer e avea o se tasi o faiaʻoga. I le faavaeina o ana faamatalaga i le Mataio 7:24, 25, sa faamamafa ai e le Uso o Hinderer le tāua o le mulimuli atu e ala i le faia o mea, i le faatinoina o mea sa aʻoaʻoina. I lea, o le a fauina aʻe ai e tagata aʻoga lo latou “fale” i luga o le faavae papa na i lo o le oneone e fesoloaʻi.

Na sosoo ai ma le lauga a Randall Davis, o se tasi o faiaʻoga i tagata aʻoga. Na faavae ana faamatalaga i le Isaia 54:13, ma sa ia faailoa atu ai faapea, o le a aʻoaʻoina i latou e Ieova ina ia mafai ai ona latou taʻu atu faatonuga i isi. O le a manaomia ona latou matuā faalagolago atu i le “fesoasoani” moni, o le agaga paia lea o Ieova le Atua.—Ioane 14:26.

Sa sosoo ai ma le lauga atu o Albert Schroeder i le pe na faapefea ona faamanatu mai e lena afiafi po ia te ia le isi foi matātiʻa i le aʻoaʻoga faale-Tusi Paia. Sa ia manatua ai Fepuari 1, 1943, ina ua faatasitasi le selau o tagata aʻoga, toʻafa faiaˈoga, (e aofia ai ma ia), ma mālō mai Brooklyn, i South Lansing, i Niu Ioka, mo le tatalaina o le Aʻoga Faale-Tusi Paia o le Olomatamata o Kiliata. I le sili atu i le 44 tausaga talu mai lena taimi, ua i ai pea le faamanuia a Ieova i le Aʻoga i Kiliata, e pei ona vaaia i le salalau atu i le lalolagi atoa o le sili atu i le 6,000 misionare ua uma ona aʻoaʻoina i le Tusi Paia. Ona faailoa atu loa lea e le Uso o Schroeder le matalasi o mataupu eseese o le a aʻoaʻoina i le Aʻoga e Aʻoaʻo ai i le Faiva. E faatasi ai i nei mea, o Aʻoaʻoga ia a le Tusi Paia, le Faalapotopotoga Faatiokarate (lea e taulaʻi atu le tele o le vaai i tiute tauave a ovasia ma auauna o le faiva), Le Pulega a le Atua, ma le Tautala atu i le Lautele. Sa ia tataʻi mai foi manatu i le matalasi o tusi aʻoga e aofia ai ma le Reasoning From the Scriptures. I le faaiʻuga, sa faailoa atu ai e le Uso o Schroeder le faataunuuga o le Isaia 45:23, i le taʻua ai faapea, i ona āuga, na tootuli atu ai tulivae o tagata lotu o ē tetee i le Atua, auā ua latou iloa e saʻo Molimau a Ieova i le itu tau i vailaau, tulafono, ma faamaumauga a le Tusi Paia o mea tutupu.

“Ia Faaaʻoaʻo ia Paulo” o le matua lena na filifilia e le tasi failauga na sosoo ai, o Karl Klein o le Vaega Pule. Sa ia faaalia pe na faapefea ona fai atu pea le aposetolo o Paulo i isi ina ia faaaʻoaʻo ia te ia. Sa ia mafai ona faia o lenei mea, auā sa ia faaaʻoaʻo ia Keriso. (1 Korinito 11:1) Sa fautuaina tagata aʻoga ina ia faaaʻoaʻo ia Paulo i lona poto ma le tomai i le faaaogāina o le Tusi Paia, i lana talaʻiga faamalosi ma le maelega, i lona lē manatu faapito, i lona agamalu ma le loto maulalo, ma lona tumau ma le onosai.

Ona sosoo ai loa lea ma le fofogaina atu e Theodore Jaracz, o se sui foi o le Vaega Pule, le lauga o le tatalaina, “O le Aʻoga Fou—Mo le ā le Fuafuaga?” Sa ia amata lava i le matauina faapea o i latou ua tauofo mo lenei aʻoga ua latou loto malilie e auauna i so o se mea o le a manaomia ai i latou i le fanua i le lalolagi aoao. Faatasi ai ma le sili atu i le tolu ma le kuata miliona o Molimau i le sili atu le 54,000 faapotopotoga, o loo i ai se manaoga tele mo ni tane agavaa latou te leoleoina, aʻoaʻo, ma taʻimua i le galuega sili faaevagelia. I anamuā lava, na valoia ai e Ieova faapea o le a ia saunia “mea alofa i tagata.” (Salamo 68:18, NW) Sa ia faia lenei mea i taimi o le au aposetolo, e pei foi ona faaalia e le aposetolo o Paulo i le Efeso 4:8-11. Ua saunia foi la e Ieova i aso nei ‘mea alofa i tagata’ ma ua aʻoaʻoina nisi o i latou e ala i lenei aʻoga fou.

Na faailoa atili mai e le Uso o Jaracz faapea, a o tofu lava tagata aʻoga uma ma o latou tomai masani, e mafai ona faia e Keriso nei tomai ina ia sili atu ona tāua. A e manaomia ai ni taumafaiga i lena, ma na faaalia ai e le failauga lona mautinoa faapea o le a faia e nei tagata aʻoga e toʻa 24 lena taumafaiga. Na ia faasino mai faapea e lē mafai ona i ai se vavae ese mai tulaga amiotonu a Ieova ma na ia faapea mai, o i latou o taʻimua e mafai ona latou fesoasoani atu e ala i a latou faaaʻoaʻoga totino ma faatosinaga. I le tele o vaega o le lalolagi, o loo i ai le manaoga, tele mo ni tane agavaa latou te talia tiute tauave faalefaalapotopotoga. O lenei manaoga ua aafia ai e oo lava i faapotopotoga tetele atonu pe na o le toʻatasi pe toʻalua ni toeaina ma se numera faatapulaaina o auauna o le faiva. O lea la ua manino i le mafuaaga ua manaomia ai ona faavaeina se Aʻoga e Aʻoaʻo ai i le Faiva—ina ia aʻoaʻoina ai toeaina ma auauna o le faiva e leʻi faaipoipo ina ia auauna i so o se mea i le fanua i le lalolagi aoao. I le avea o se iʻuga o lo latou aʻoaʻoina, o le a sili ona faaauupegaina ai i latou e tausia le faatelega e pei o ni leoleo mamoe.

Ua mafai ona avatu e Molimau uma a Ieova le faafetai i le Atua ona ua mafai ona faavaeina le Aʻoga e Aʻoaʻo ai i le Faiva. I le faaiʻuga, na taʻua ai e le Uso o Jaracz: “Ou te mautinoa ua autasia i tatou uma i manatu ma faalogona agaʻi ia Ieova e pei ona faamatalaina i le Salamo 79:13: ‘O i matou foi o lou nuu ma le lafu mamoe na e fagaina, matou te faafetai ia te oe e faavavau; matou te taʻutaʻu atu ou viiga i lea tupulaga ma lea tupulaga.’” Ona faaiʻuina ai lea o lenei sauniga fiafia lē ma faagaloina i le pese ma le tatalo.