Aʻoga mo Toleniga i le Faiva—O se Faitotoʻa Lautele mo Galuega Faateleina
1 E ala i le perofeta o Ieremia, na folafola atu ai e Ieova faapea: “Ou te tofia foʻi mo i latou o leoleo mamoe e leoleo iā te i latou; latou te lē toe fefefe, latou te lē matataʻu foʻi, e leai so latou e lē iloa.” (Iere. 23:4) Ua faataunuuina lenā galuega faaleoleo mamoe i aso nei i tagata i atunuu uma lava. O loo faia e le faitau afe o toeaina i faapotopotoga lenei galuega faaleoleo mamoe. E lē gata i lea, ua fesoasoani iā i latou uso talavou e toʻatele e pei o le sau i le vaveao, o loo ofoina atu i latou ma le loto, i le auaunaga iā Ieova. (Sala. 110:3) Maʻeu se faamanuiaga o le iai o nei uso lotomaulalo i faapotopotoga o tagata o le Atua! A o faateleina le galuega o le aoaoina mai faaleagaga, o loo iai se manaʻoga mo ni tane agavaa ina ia faaavanoa atu e auauna i o latou uso.
2 Ua iai se faatulagaga lelei e toleniina ai toeaina nofofua ma auauna o le faiva o loo nofofua mo tiute tauave faateleina i le Aʻoga mo Toleniga i le Faiva. E silia i le 22,000 tagata aʻoga mai le tusa ma le 140 atunuu ua uma ona toleniina i lenei aʻoga i vasega e 999 sa faia, talu ona amataina mai le 1987. Ua avea lenei aʻoga e pei o se “faitotoʻa lautele” mo galuega faateleina.—1 Kori. 16:9.
3 Fuafuaga mo le Aʻoga: O le fuafuaga o le Aʻoga mo Toleniga i le Faiva, o le toleniina ma le sauniunia lea o tane agavaa mo tiutefai po o fea lava e tulaʻi mai ai se manaʻoga i le faalapotopotoga. E faateleina e le aʻoga lo latou tomai e taʻimua ai i le galuega faaevagelia, auai i le leoleoina o le lafu, ma le aʻoaʻo atu i le faapotopotoga. Pe a uma le aʻoga, e tofia nisi o le ʻauaʻoʻoga e avea o ni paeonia faapito po o ni ovasia femalagaaʻi i o latou lava atunuu, po o isi foʻi atunuu. O isi sa mauaina ni o latou tofiga e auauna ai i a latou lava faapotopotoga na iai, po o ni vaipanoa o loo tele ai le manaʻoga i lalo lava o le oganuu a le lālā.
4 I le valu vaiaso o le aʻoga, e faia ai e le ʻauaʻoʻoga ni suʻesuʻega loloto o le Tusi Paia. E latou te iloiloina lelei le tele o aʻoaʻoga faale-Tusi Paia, faapea ma tiute tauave faaleoleo mamoe, ma taʻiala i le taulimaina o faafitauli i le soifuaga faa-Kerisiano. E latou te aʻoaʻoina foʻi mea o loo i le Tusi Paia e faatatau i mataupu i le puleaina o mea, faamasinoga, ma mataupu tau i le faalapotopotoga. E latou te mauaina toleniga faapitoa i le lauga atu i le lautele, ma e tuuina atu foʻi i ai le fesoasoani totino ina ia faatelevave ai lo latou ati aʻe i le itu faaleagaga.
5 Mea e Manaʻomia: E manino lelei lava, e iai agavaa e manaʻomia mo i latou e auai i le aʻoga. E tatau ona lē i lalo ifo o le lua tausaga talu ona avea lea uso o se toeaina po o se auauna o le faiva. E tatau ona nofofua i latou uma, ma ia i le va o le 23 ma le 50 tausaga. E ao i le tagata o loo talosaga ona iloa faitau, tusitusi, ma lelei le tautala i le gagana o loo faia ai le aʻoga, ma e tatau ona lelei le soifua mālōlōina, lea e lē manaʻomia ai se tausiga faapitoa ma ni taumafa faapitoa. E sili ona manaʻomia i latou o loo i le auaunaga paeonia sauatoa.
6 O i latou e tauofo mai, e ao ona nofosauni e auauna po o fea lava e manaʻomia ai i latou. E manaʻomia ona iai se agaga e pei o lea sa i le perofeta o Isaia, lea na tinoū e ofoina atu o ia e fai se galuega faapitoa, i le faapea atu: “O aʻu lenei, inā auina atu aʻu.” (Isa. 6:8) Sa ia faaalia foʻi le lotomaulalo i lona olaga atoa. O i latou ua faaavanoa atu mo le Aʻoga mo Toleniga i le Faiva e ao ona uunaʻia e le alofa mo o latou uso, ma se faanaunauga e auauna atu iā i latou na i lo le manaʻo i se tulaga aloaʻia po o se tulaga maualuga. Pe a mauaina na toleniga lelei, e faatalitalia le ʻaufaauu e faatatauina mea na latou aʻoaʻoina ina ia maua ai e isi ia aogā.—Luka 12:48.
7 O Aogā: A o faagasolo le valu vaiaso o toleniga loloto, ua oo ai ina tausia i latou ‘i upu o le faatuatua ma mataupu lelei.’ (1 Timo. 4:6) Ua faaagavaaina ai i latou e fesoasoani ma faalaeiau i isi i faapotopotoga ma matagaluega ua tofia i latou i ai. I le tele o vaipanoa ua tofia i ai le ʻauaʻoʻoga ua faauu mai le Aʻoga mo Toleniga i le Faiva, ua faateleina ai galuega i le fanua; ua uunaʻia ai le auaunaga paeonia aemaise lava i ē talavou; faapea ma se uaʻi totino atu i le toʻatele o tagata fou ua auaufaatasi ma tagata o le Atua.
8 Pe o oe o se toeaina po o se auauna o le faiva o loo nofofua ma o loo i le va o le 23 i le 50 tausaga? Aiseā e lē mafaufau ai e talosaga atu mo le Aʻoga mo Toleniga i le Faiva? Po o oe ea o se uso talavou o loo mafaufau i ni sini i le lumanaʻi i le auaunaga iā Ieova? Aiseā e lē faafaigofie ai lou olaga, ma ia saʻoloto mai mea e popole ai, ina ia mafai ona e ulu atu i lenei “faitotoʻa lautele” mo galuega faateleina? E aumaia ai iā te oe le olioli ma le faamalieina. O le mea moni, ua avea le Aʻoga mo Toleniga i le Faiva ma faamanuiaga e lē gata i le ʻaufaauu o le aʻoga, ae faapea foʻi ma faapotopotoga o tagata o le Atua i le lalolagi aoao.
[Pusa i le itulau 3]
Le Auala ua Latou Maua ai Aogā Mai le Aʻoga
“Ua faaleleia atili e le aʻoga laʻu faiva ma loʻu tomai e leoleo ai le lafu i le atamai, e ala i le faaaogāina o Mau.”
“Ua sili atu nei ona ou lagonaina le mautinoa, i le taulimaina o tiute tauave eseese i le faapotopotoga.”
“Ua toetoe lava o vala uma o loʻu olaga ua suia ai, e aofia ai ma oʻu lagona e faatatau i faatulagaga a le Atua ma lana faalapotopotoga.”
“O le toleniga sa ou maua, ua fesoasoani iā te aʻu e iloa ai le manaʻomia ona faaavanoaina o aʻu e auauna i mea o loo iai le manaʻoga.”