Ai se ā e Faafetai Ai?

TAGAI i le faavaa i luma o lenei mekasini. E mautinoa lava lona faamanatu mai ai ia i tatou faapea o loo i ai le tele o mea matagofie e faapaleniina ai le matagā ma le tupalapalā o loo vaaia i so o se mea.

Pe e te talisapaia ea mea matagofie? Mafaufau i se nuanua ma lona matuā manino mai, i lanu eseese matagofie pe a mavae atu le pogisa o se matagi malosi. Manatunatu i se afu ma lona tafe ifo. Pe taumafai e vaai faalemafaufau i manu o taaalo ma a latou fanau. Seʻi faaata i lou mafaufau se togalaau o fugalaau e faafiafiaina ai po o se taufuifui o se togasaito ua fuatele mai. Ioe, o vaaiga masani nei i le toatele o tagata. A e o ā āuga ua latou faia ia te oe?

E Faigofie ona Manatu Māmā i Ai

E masani lava, o le tele e fai soo ai se mea, o le sili atu foi lea ona avea o se mea taatele—ma o le a sili atu foi lea ona faigofie ona manatu māmā i ai. O lenei lē taulau atonu e foliga mai ua sili ona leoleoā i le 20 senituri ua tele vave lona faagasologa. Peitai o le lē faaaluina o se taimi e mafaufau loloto ai pe manatu ai foi i faamanuiaga ma pogai e saga faafetai ai, e masani pea ona avea o se tasi o vaivaiga o le fanau a tagata lē lelei atoatoa.

I le isi itu, i lalo o faagaeega, sa masani pea ona faailoa e le faisalamo o Tavita le loto faafetai i pese. O upu nei sa fai atu agaʻi i le Atua i se tasi o fatuga a Tavita ma o se faaaʻoaʻoga sili o le loto faafetai:

“A ou vaai atu i lou lagi, o le galuega a ou tamatamai lima,

O le masina atoa ma fetu, na e faia;

Se a ea le tagata e te manatu mai ai ia te ia;

Ma le atalii o le tagata e te asiasi mai ai ia te ia?

Ua e foaiina ia te ia le pule i galuega a ou aao;

Ua e tuuina mea uma i lalo o ona vae;

O lafu mamoe ma povi uma lava,

Atoa ma manu vaefa o le vao;

O manu felelei, ma iʻa o le sami,

Ua tataa i ala o le sami.

Ieova e, lo matou Alii, e silisili lava lou suafa i le lalolagi uma lava.”—Salamo 8:3, 4, 6-9.

O le Loto Faafetai e Mafai ona Faatoilaloina le Loto Faanoanoa

O le loto faafetai o le faisalamo mo mea matagofie sa fesoasoani e faapaleniina ai so o se loto faanoanoa na aumaia i vaaiga lē lelei po o tulaga faigata. E mafai foi ona oo ia te oe lea lava mea. Faapefea? E ala i le tauivi e talisapaia le tele o mea matagofie o loo siomia ai i tatou. I lenei auala, e mafai ai ona faateleina lou fiafia atoa foi ma le fiafia o i latou o loo siomia oe.

O lea, ai se ā e le tuu atu ai i mea matagofie e te vaaia i aso uma ma mea ofoofogia e uunaʻia ai le faafetai tele mai le loto i Lē na Foafoaina i tatou e agalelei? Ia mafaufau nei i nisi o pogai faaopoopo e faafetai ai.