Mafuaaga Faaopoopo e Faafetai Ai

SA SILl ONA TELE mafuaaga i tagata Isaraelu anamua e faaalia ai le loto faafetai i Lē na Foafoaina Mea na i lo o isi. Ai se ā ua tatou fai atu ai faapea?

Ia, i le pei o isi tagata uma, sa i ai i tagata Isaraelu se mafuaaga e saga faafetai ai mo mea matagofie uma ma le ofoofogia na foafoaina e le Atua. A e sa i ai sa latou mafuaaga faaopoopo mo le loto faafetai, ona sa filifilia i latou e Lē Ona le Malosi Uma Lava e avea o ona tagata faapitoa ma avatu ai ia i latou le tausiga patino. (Amosa 3:1, 2) Manatu i nisi o a latou mafuaaga mataʻina mo le loto faafetai.

Faalua ona Sao Mai le Oti

Maeu le loto faafetai atonu sa i ai i mātua Isaraelu uma i le po o Nisani 14, 1513 T.L.M.! I lena po lē mafaagaloina, na aumaia ai e le agelu a le Atua le oti i “ulumatua uma lava i le nuu o Aikupito, o tagata atoa ma manu.” A e na ia sopoia fale o Isaraelu ua sausauina o latou pou ma laau faalava i luga

o faitotoa i le toto o manu mo le Paseka. Na faateia le taaligoligoa ona “sa tele foi le tagiaue i Aikupito; auā sa leai lava se fale e aunoa ma le oti.” Peitai, sa i ai pea aiga i uma o Isaraelu a laton ulumatua faapelepele o loo feola ma maloloina.—Esoto 12:12, 21-24, 30.

E leʻi leva mulimuli ane, atonu sa mapuna aʻe i loto o tagata Isaraelu le loto faafetai a o latou molimauina le faalaa ane faavavega o Ieova, a o foliga mai ua puʻea faamanu i ofaga i latou i matafaga o le Sami Ulaula, e le tuliloaga aasa a ʻautau a le Farao o Aikupito. Muamua lava, sa latou vaaia le ao faaniutu lea sa taʻitaʻiina ai i latou ua siitia i o latou tua, ina ia faagesegese ai le tuliloaga. Ona vaaia lea e tagata Isaraelu Mose ua faaloaloa atu lona lima i luga o le sami, ma sa latou vaavaai ma le ofo a o faaagi mai e le Atua le matagi malosi mai sasaʻe e agi i le po atoa, ua vaeluaina ai le vai ma ua liua ai le nofoaga o le sami i se laueleele matutu. Sa manaomia na o sina uunaʻiga faanatinati mo tagata Isaraelu ina ia faatopetope ona ō atu i lenei faitotoa o le sauniuniga tauatua e faasaoina ai.

E ui i lea, ua i ni nei se mafuaaga fou mo le mataʻu faafuasei! Sa nanati atu tagata Aikupito i le ilititai matutu, ma le mautinoa o le a latou manumalo ia Isaraelu. Peitai faauta! Ina ua oo atu tagata Aikupito uma i totonu o le ala ua avea ai le vai ma aupa i le isi itu ma le isi itu, sa amata loa ona toulu ese uili o a latou kariota ma sa leʻi pine lava a e feei ua lē mautonu. I le taimi lena, ua oo saogalemu Isaraelu uma i le isi matafaga, ona toe fetalai atu foi lea o Ieova ia Mose ina ia faaloaloa atu lona lima, “ona foi atu lea o le sami i le vave ao i lona tūga tuai.” O le iʻuga? E leai lava se tasi o le ʻautau sili a Farao faamaualuga na sao mai le malemo, e oo foi i le tupu faamaualuga lava ia e leʻi sao. (Esoto 14:19-28; Salamo 136:15) Pe e mafai ona e manatunatu i le loto faafetai ia Ieova o Isaraelu faasaoina?

Auala Mataʻina e Tau ai le Atua

E ui lava i lo latou faafetai ona o le laveaiina mai Aikupito, ma la latou savaliga lē mafaagaloina i totonu o le Sami Ulaula, a e sa tele mea faigata na oo i tagata Isaraelu a e latou te leʻi taunuu i le Nuu Folafolaina. Peitai, o mea taitasi na oo ia i latou i la latou malaga i le vao mo le 40 tausaga, sa ao ona avea o se mafuaaga faaopoopo e faafetai faapitoa atu ai ia Ieova.

Mulimuli ane, na sopoia e tagata Isaraelu le Vaitafe o le Ioritana ma ua oo i le laueleele na tuu atu e le Atua ia i latou. Sa leʻi pine a e latou molimauina se faaaʻoaʻoga o auala mataʻina e tau ai Ieova mo i latou. Faapefea? Ia, i le puʻea faafuaseʻi ma le faaumatiaga o le uluai aai o Kanana na latou fetaiai—o Ieriko! (Iosua, mataupu e 6) Maeu se mea e lē masani ai o le taʻitaʻiga tomai a le Atua o vaegaau e savavali faataamilo i Ieriko a o ave le atolaau o le feagaiga! E ono aso sa latou savavali faataamilo ai i le pa e faatasi ona taamilo i le aso. I le aso fitu, sa faafitu ona latou savavali faataamilo ai i le pa. Ina ua ili e ositaulaga a latou pu, sa faatumuina e Isaraelu le ea i le “leo tele” i le alaga o le taua, ona “solo ai lea i lalo o le pa!” (Iosua 6 Fuaiupu e 20) Na o le fale o Raava ma le mea sa tu ai e leʻi soloia i lalo. Sa soloia i lalo le pa o lenei aai sa foliga mai e faigata ona aea, e aunoa ma le tau manaomia o Iosua ma lana vaegaau e fana atu se ū e tasi! E mautinoa lava, o lena mea na tupu i Ieriko sa o se mafuaaga mataʻina e faaopoopo atu ai le loto faafetai i le Atua.

I se tasi mea, sa i ai foi se isi faaaliga matilatila o auala mataʻina e tau ai Ieova. Ina ua osia e tagata Kipeona le filemu ma Isaraelu, sa faalauiloa mai e tupu e toalima o sa Amori se taua ma tagata Kipeona. Sa oo mai Iosua e fesoasoani ia i latou, ma sa toe faaalia ai foi le aao faavavega o Ieova i le taimi o le taua. Sa faaatuatuvaleina e le Atua sa Amori, ma a o “sosola i latou i luma o Isaraelu, na i ai i latou i le ifo aʻi o Peteorana, ona lafo ifo lea e Ieova o maa tetele mai le lagi i o latou luga e oo i Aseka, ua oti ai i latou.” E toatele na oti i uatoʻa na i lo o i latou na fasia e le fanauga a Isaraelu i le pelu.—Iosua 10:1-11.

Ona fai atu lea o Iosua ia Ieova i luma o le fanauga a Isaraelu,”: “Le la e, ia tumau oe i luga o Kipeona; ma oe le masina i luga o le vanu o Ailona.” O le iʻuga? Ua fai mai le faamatalaga, “Ona tumau ai lea o le la, sa tu foi le masina, ina seia tauia e le nuu o e ita ia i latou.”—Iosua 10:12, 18.

Maeu ni mea tutupu e ofo ai! Ma maeu ni mafuaaga atili mataʻina mo le loto faafetai i le vaega a tagata o Ieova!

Sa Leʻi Tumau le Loto Faafetai

Pe a uma faaaliga taitasi o le faalaa a Ieova, sa faatumuina Isaraelu i le loto faafetai. Atonu sa manatu ifo tagata taitoatasi o le fanauga a Isaraelu i lona loto faapea o le a lē taitai ona galo i lona loto mea na vaai i ai. Peitai, o lena loto faafetai sa o se mea e leʻi talitonu ai ona sa puupuu lava se taimi na tumau ai. E masani pea ona faaalia e le fanauga a Isaraelu se uiga lē loto faafetai. O lea, na “tuuina atu ai i latou i lima o e na ʻinoʻino ia te i latou.”—Salamo 106:41.

Peitai, sa faaalia e Ieova lona uiga silisili o le agaga faamagalo ina ua oo i tulaga faigata le fanauga a Isaraelu, sa salamō ona o ō latou ala sese ma le lē loto faafetai, ma valaau atu ia te ia mo se fesoasoani. “A ua silasila mai o ia i lo latou puapuaga, ina ua faafofoga i lo latou alalaga. Ona ia manatua lea mo i latou o lana feagaiga, ma ua salamo e tusa ma lona alofa tele.” (Salamo 106:44, 45) I le mavae atu o taimi, na faasaolotoina ai i latou e lo latou Atua faamagalo mai ē na faasauā ia i latou ma toe faafoi atu i latou i lona finagalo lelei.

E ui lava i le onosai o le Atua ma lona aauina mai pea o perofeta ina ia suia o latou mafaufauga, a e sa faamaonia lava le leai o se suiga o le fanauga a Isaraelu. I le iʻuga, na lē toe mafai ai ona onosai Ieova, ma sa ia faatagaina ai loa le malo o Iuta ina ia faatoilaloina e tagata Papelonia i le 607 T.L.M. O ē sa leʻi fasiotia e ʻau a le Tupu o Nepukanesa na ave faatagataotauaina i Papelonia.

Pagā se iʻuga malaia matautia ona o le faia pea o le lē loto faafetai ma le lē faamaoni i le Atua! Ma na tupu lenei mea e ui lava sa anoanoai mafuaaga e ao ai ona loto faafetai.

Atonu e mafai faapefea e Kerisiano i aso nei ona aloese mai le faia o le mea sese lava lea e tasi o le lē taulau ona faaalia o le loto faafetai mo mea uma na faia e Ieova le Atua mo i latou, e sili atu ma e i luga aʻe o ana galuega lelei agaʻi i le fanau a tagata lautele? O le a tuu le fesili lenei mo le talanoaina i le mataupu o sosoo mai.