O se Mea Lilo—O Ai le Fafine Talitane Papelonia le Aai Tele?

O SE FAFINE, o se fafine talitane e taʻutaʻua i le amioleaga, o lē ua taaʻina olaga o le faitau piliona o tagata, ua fasiotia ma faasalaina. A e peitai e lē o se faasalaga e pei ona masani ai. O le ā ua ese ai? O lē na te faaoo le faasalaga o se manu, o se manu feai na te faatelenoa ia te ia, ʻaiina lona tino, ona tuua lea o ona toega e faaumatia i le afi. O ai lenei fafine tumu i taaʻiga? Ai se ā e osofaia ai o ia e se manu feai? O le ā ua ia faia, ua tatau ai lenei iʻuga sauā?a—Faaaliga 17:16, 17.

E mafai ona avea lenei ma faavae mo se tala lilo faaoso fiailoa—vagana ai e lē o se faiga mo se talafatu. O se mea moni faatalafaasolopito lea o loo faasolo ina faataunuuina. Ma e tāua ia te oe auā o lenei fafine talitane taʻutaʻua i le amioleaga atonu o taaʻina ai lou olaga i le taimi tonu lava lenei. A e lē gata i lea, pe e te faatasi pea ma ia pe vavaeese mai, o lona uiga o le a iloa ai le eseesega i le va o le ola ma le oti. O lea o ai o ia?

O Paaga a le Fafine Lilo

O lenei femme fatale (tamaitai matautia), o lenei fafine taufaasese e aunoa ma se mā, o loo faamatalaina e Ioane i le tusi faavaloaga o le Tusi Paia o le Faaaliga, ua tatou faitau i ai: “Ua ia [o le agelu] avea foi aʻu i le vao i le Agaga; ona ou iloa lea o le fafine ua tietie i le manu feai mūmū, ua lilo i igoa faifai, e fitu ona ulu ma ona nifo e sefulu. Ua ofu le fafine i le ie pāuli ma le mūmū, ua teuteu foi i auro, ma maa tāua, ma penina, ua i lona lima le ipu auro ua tumu i mea inosia ma le leaga o lana faitaaga; ua tusia foi i lona muaulu le igoa, e lilo lona uiga: ‘Papelonia le aai tele, o le tina o fafine talitane ma mea e inosia i le lalolagi.’”—Faaaliga 17:3-5, Lomiga 1969.

O lenei “Papelonia le Aai Tele” e tatau lava o se fafine e mataʻu tele ai, auā ua fai mai le tala i le Faaaliga 17 fuaiupu 1 e faapea o loo ia “tietie i vai e tele.” O le ā le uiga o lena mea? Na faamatala e le agelu a le Atua ia Ioane: “O vai na e iloa, o loo tietie ai le fafine talitane, o nuu ia, ma motu o tagata, ma atu nuu, ma gagana eseese.” (Faaaliga 17:15) E aunoa ma se masalosalo o se fafine talitane lenei e i ai ni ana taaʻiga i le lalolagi aoao. Peitai e lē o se fafine talitane e taatele. O ia o le “tina o fafine talitane,” o le tamaitai pule i le fale o faiga talitane. Pe a oo mai i le faia o le faitaaga, na te avatua faatonuga. Peitai e i ai foi ni ona paaga faapitoa.

Ua faaalia e le agelu pe o ai nei paaga faapelepele a le fafine talitane sili. E faapefea ona ia faailoaina i latou? Ua fai mai o ia o Papelonia le Aai Tele “ua faitaaga ma ia o tupu o le lalolagi, ua onā foi e o nonofo i le lalolagi i le uaina o lana faitaaga.” (Faaaliga 17:2) Ua avea lenei fafine o se fafine talitane e faatosina faatasi ma ni sootaga lelei e mafai ai ona tosina mai taʻitaʻi faapolotiki o le lalolagi, o “tupu o le lalolagi”! O lea o ai o ia?

Ua fai mai le agelu e i ai sona igoa, se igoa lilo, o “Papelonia le Aai Tele.” O ni taʻiala nei se lua e iloa ai po o ai o ia—o le tasi, o paaga na te faapelepele i ai, ma o le isi, o lona igoa, Papelonia le Aai Tele. O le ā le faaiʻuga ua taʻitaʻiina atu i ai e na taʻiala?

[Faaopoopoga i lalo]