Le Fafine Talitane Taʻutaʻua i Amioga Leaga—O Lona Faaumatiaga

“Aleluia; ua i le Alii lo tatou Atua le olataga, ma le viiga, ma le faaneeneega, ma le mana; auā e faamaoni, e tonu foi ana faamasinoga; auā ua faasalaina e ia le fafine talitane e sili, o le na faaleagaina le lalolagi i lana faitaaga, ua ia taui atu ia te ia lava le toto o ana auauna.”—FAAALIGA 19:1, 2.

1. Ua faitaaga faapefea le fafine talitane sili ma “tupu o le lalolagi,” ma o le ā ua iu i ai?

O MEA uma ua tatou talanoaina ua lava lona matautia. A e peitai, e tatau ona tatou matauina o loo tautala foi le Faaaliga 17:2 i le faitaaga a le fafine talitane sili ma “tupu o le lalolagi.” E ui ina ua mafatia i se paʻū, a e o loo avea tele pea o ia ma se uo a le lalolagi, ma o loo taumafai o ia e faatogafitia ma le poto taʻitaʻi o le lalolagi, e maua ai lona lava lelei. (Iakopo 4:4) O lenei faiga faafafine talitane faaleagaga, e aofia ai faiā lē faatulafonoina i le va o Papelonia le Aai Tele ma taʻitaʻi faapolotiki, ua iu ai i le maliliu faafuasei o le faitau sefulu miliona o tagata lē sala! Sa lava le leaga o le aafia o le fafine talitane sili i itu uma e lua o le fetauaiga i le Taua Muamua a le Lalolagi. Peitai o ana agasala e tusa ai ma le Taua Lona Lua a le Lalolagi ua mautinoa ona “paʻi atu . . . i le lagi”! (Faaaliga 18:5) Ai se ā tatou te faapea atu ai?

2. (a) Na fesoasoani faapefea Franz von Papen ia Adolf Hitila e avea ma taʻitaʻi o Siamani, ma na faamatalaina faapefea e se taʻitaʻi faalemalo talu ai o Siamani lea fitafita a le pope? (e) I le Maliega i le va o le Setete Nasi ma le Vatikana, o ā vaega e lua na taofia faalilolilo? (Tagai i le faamatalaga i lalo.)

² Ia, i le aumaia o se faaaʻoaʻoga e tasi, na faapefea ona avea Adolf Hitila o le taʻitaʻi o le malo—ma pule tautalatasi—o Siamani? Sa auala i le fesootaiga faalilolilo faapolotiki a se fitafita a le pope o lē na faamatalaina e le taʻitaʻi Siamani talu ai nei, o Kurt von Schleicher, e faapea “o le ituaiga o tagata faalata e sosoo atu i ai Iuta le Sekara, o se tagata paia.” O ia lenei o Franz von Papen, o lē sa faapotopotoina Gaoioiga Katoliko ma taʻitaʻi i faiga faagaosimea e tetee atu i le faakomunisi a e tuufaatasi Siamani i lalo o Hitila. E avea o se vaega o se fetuunaiga taufaasese, sa avea ai von Papen ma sui taʻitaʻi o le malo. Na auina atu ai e Hitila se au usufono e faauluulu ia von Papen i Roma e fetuutuunai se maliega i le va o le Setete Nasi ma le Vatikana. Sa faaalia ai e Pope Pio XI se manatu i ni sui faalemalo o Siamani i lona fiafia ina ua “avea nei ma ulu o le Malo Siamani se tagata e maumaututu e tetee atu i le faakomunisi,” ma ia Iulai 20, 1933, i se sauniga faalauaitele i le Vatikana, na sainia ai loa e Katinale Pasieli (o lē ua latalata ona avea ma Pope Pio XII) le maliega.a

3. (a) O le ā na tusi ai se tusitala o tala faasolopito e faatatau i le Maliega i le va o le Vatikana ma le Setete Nasi? (e) I le vaitaimi o fiafiaga i le Vatikana, o le ā le mamalu sa tuuina atu ia Franz von Papen? (i) O le ā le vaega a Franz von Papen na faia i le faatoilaloina faa-Nasi o Oseteria?

³ Ua tusi se tasi tusitala o tala faasolopito: “O le Maliega [ma le Vatikana] sa o se manumalo tele mo Hitila. Na avatu ai ia te ia le uluai lagolagoina faamalosiau na ia mauaina mai le lalolagi i fafo, ma lenei mai le puna e silisili ona faaeaina.” A o faia fiafiaga i le Vatikana, na tuuina atu e Pasieli ia von Papen le pine maualuga a le pope o le Koluse Sili o le Ituaiga o Pio.b I lana tusi The Gathering Storm, na lomia i le 1948, o loo taʻua ai e Winston Churchill pe sa faaaogāina atili faapefea e von Papen “lona taʻuleleia o se Katoliko lelei” ina ia maua mai ai le lagolagoina e le lotu o le faatoilaloina e le faa-Nasi o Oseteria. I le 1938, mo le faamamaluina o le aso fanau o Hitila, na faatonuina ai e Katinale o Innitzer lotu Oseteria uma e sisiina le fua o loo i ai le faailoga a Siamani (swastika), tatāina a latou logo, ma tatalo mo le taʻitaʻi tautalatasi a Nasi.

4, 5. (a) Ai se ā e paʻū atu ai le nofosala i le toto matautia tele i luga o le Vatikana? (e) Sa avatuina faapefea e epikopo Katoliko i Siamani le lagolagosua faaaliali ia Hitila?

⁴ O lea la, o se totolima tele ua tietie nei i luga o le Vatikana! I le avea o se vaega taʻimua o Papelonia le Aai Tele, sa fesoasoani tele i le avea o Hitila ma taʻitaʻi ma tuuina atu ia te ia le lagolagosua “tau amio.” Na oo atu lava i le mamao ua malilie i ai ma le lē leoa i faiga sauā a Hitila. I le pe tusa o le sefulu o tausaga o faiga faa-Nasi taufaamataʻu, sa fifilemu le pope a Roma a o fetauai le faitau selau afe o fitafita Katoliko ma feoti mo le mamalu o le faigā malo faa-Nasi ma a o fasiotia le faitau miliona o tagata lē sala i potu kasa a Hitila.

⁵ Na oo lava ina avatuina faaaliali e epikopō Katoliko i Siamani le lagolagosua ia Hitila. I le aso lava lena e tasi na faia ai e Iapani, le paga a Siamani i le taimi o le taua i lena vaitaimi, le osofaiga faalilolilo i Pearl Harbor, sa tauaveina e The New York Times lenei lipoti: “O le Fonotaga a Epikopō Katoliko i Siamani lea sa faapotopoto i Fulda sa fautuaina ai le faia o se ʻtatalo faapitoa mo le taua’ lea e tatau ona faitauina i le amataga ma le faaiuga o sauniga tauatua uma. O le tatalo e talosagaina ai ma le faatauanau le Atua e faamanuia meatau a Siamani ma le manumalo, ma tuuina atu le puipuiga i ola ma le soifua maloloina o fitafita uma. Sa faatonuina atili foi e Epikopō taʻitaʻi lotu Katoliko e tausia ma manatuaina i se lauga faapitoa i Aso Sa a lē itiiti mai pe faatasi i le masina fitafita Siamani ‘i luga o le eleele, i luga o le sami ma i le ea.’”

6. Atonu na faasaoina le lalolagi mai le ā le tiga tele ma sauaga faamanu pe ana fai na leai se faitaaga faaleagaga i le va o le Vatikana ma Nasi?

⁶ Ana fai e leai se faifaiga alofa i le va o le Vatikana ma Nasi, atonu e faasaoina le lalolagi mai le tiga tele i le fasiotia o le faitau luasefulu miliona o fitafita ma tagata lautele i le taua, o le ono miliona o tagata Iutaia na fasiotia ona e lē o ni papalagi,—ma ē e silisili ona tautele i le silafaga a Ieova—le faitau afe o ana Molimau, o ē faauuina atoa ma “isi mamoe,” na puapuagatia tele i faiga sauā, faatasi ai ma le toatele o Molimau na feoti i totonu o nofoaga o faasalaga faa-Nasi.—Ioane 10:10, 16.

SeVaaiga Vavalalata o le Fafine Talitane

7. E faapefea ona faamatalaina e le aposetolo o Ioane lana vaaiga vavalalata o le fafine talitane sili?

⁷ Maeu le fetaui o le vaaiga lea e sosoo mai ai lona tatalaina i le valoaga i le Faaaliga! I le sueina i le Faaaliga 17:3-5mataupu e 17, fuaiupu e 3 e oo i le 5, tatou te maua ai Ioane o faapea mai e uiga i le agelu: “Ua ia avea foi aʻu i le vao i le Agaga; ona ou iloa lea o le fafine ua tietie i le manu feai mūmū, ua lilo i igoa faifai, e fitu ona ulu ma ona nifo e sefulu. Ua ofu le fafine i le ie pāuli ma le mūmū, ua teuteu foi i auro, ma maa tāua, ma penina, ua i lona lima le ipu auro, ua tumu i mea e inosia ma le leaga o lana faitaaga; ua tusia foi i lona muaulu le igoa, O le mea lilo, Papelonia le aai tele, o le tina o fafine talitane ma mea e inosia i le lalolagi.”

8. (a) O ā mea o loo tauave e le fafine talitane sili i lana ipu auro, lea o loo faailoaina ai o ia? (e) Ua faapefea ona faaofuina faafaatusa Papelonia le Aai Tele i le “ie pāuli ma le mūmū” ma teuteuina i le “auro, ma maa tāua, ma penina”?

⁸ I inā o loo matauina ai e Ioane Papelonia le Aai Tele i se nofoaga latalata. E i ai moni lava sona vaega i lena vaomatua, faatasi ma manu feai o nonofo ai. O lenei fafine talitane sili ua iloa gofie i mea o loo ia tauaveina i lana ipu, e ui ina taufaasese le foliga tāua mai o fafo. Na te inu i se vai e inosia i le silafaga a le Atua. O ana faauoga ma le lalolagi, o ana aʻoaʻoga sese, o ana faatagana o amioga leaga, o lana faiā alofa faamanamea ma malo faapolotiki—e leai se tasi o nei mea e faatagaina e Ieova, “o lē na te faamasinoina le lalolagi uma.” (Kenese 18:22-26; Faaaliga 18:21, 24) Maeu le matagofie o lona teuteuina o ia! Ua taʻutaʻua o ia i ana malumalu mananaia ma o latou fausaga ofoofogia ona o le tetele ma faamalama tioata felanulanuai, o ona falesa fogafale maualuluga (pagodas ma wats) e teuteuina i maa tāua, o ona falesa faamamaluina ona o le leva ma ona potu i totonu e teuina ai mea paia. I le ōgatasi foi i teuga ua faia e le fafine talitane e sili, ua teuteuina ana faifeau ma monike i ofu talaloa taugata pāuli, ma le violē ma le samasama.—Faaaliga 17:1.

9. O Papelonia le Aai Tele ua i ai le ā le tala faasolopito umi i le nofosala i le toto, ma ua faaiuina faapefea ma le talafeagai ai e Ioane lana faamatalaga o ia?

⁹ A e sili ai ona tuuaʻia i lona naunau e faamasaatoto. Ua ia Ieova se mataupu ua leva e fia faaiuina e tusa ai ma lena mea! Ua lagolagoina e Papelonia le Aai Tele pulega tautalatasi faamasaatoto i ona po nei, ma lona tala faasolopito inosia o le faamasaatoto e oo atu i tuā i senituri ua mavae, e auala i taua faalotu, o Suesuega Faafaamasinoga, o Osofaiga faa-Kerisiano, ioe, e oo atu i tuā lava i le faamaturoina o nisi o aposetolo ma le fasiotia o le Alo lava o le Atua, le Alii o Iesu Keriso, ma i tua atu. (Galuega 3:15; Eperu 11:36, 37) E faaopoopo atu i na mea uma o le fasiotia o Molimau a Ieova i tausaga e sili ona lata mai nei e ala i le tafanaina e fitafita, tasisiina, o agaese, o auupega e vavaeeseina ai ao, o le pelu, ma faiga faamanu i fale puipui ma nofoaga o faasalaga. E lē tioa ona faaiuina e Ioane lana faamatalaga i le faapea mai: “Na ou iloa foi le fafine ua onā i le toto o le au paia ma le toto o e ua molimau ia Iesu”!—Faaaliga 17:6.

ʻO LE UIGA LILO O LE FAFINE MA LE MANU FEAI’

10. (a) Ua faapefea ona sauaina e le fafine talitane sili, Molimau a Ieova e oo mai i nei aso? (e) O le ā le ituaiga o taʻitaʻi e i ai taʻitaʻi lotu a Papelonia le Aai Tele?

¹⁰ Na “matuā ofo tele” Ioane i le mea na ia vaaia. I aso nei, tatou te ofo foi! I vaitaimi o lona 1930 ma lona 1940, sa faaaogāina e le fafine talitane sili Vaegaau Faafitafita Katoliko ma togafiti faalilolilo faapolotiki e sauaina, ma faasaina molimau faamaoni a Ieova. E oo lava i aso nei, i mea na te mafai ona faaaogāina ai atoatoa ana taaʻiga, o loo faaauau pea e Papelonia le Aai Tele ona faalavelave, faasasaina, ma avevaleina le galuega a Molimau a Ieova, o ē o loo faalauiloaina le faamoemoe matagofie o le Malo o le Atua. I le taofia o le faitau selau miliona e faatagataotauaina i faalapotopotoga faalotu a le fafine talitane sili, ua auauna ai ana taʻitaʻi lotu o ni ʻtaʻitaʻi tauaso o isi tauaso,’ o loo taʻitaʻia i latou na i le lua o le faaumatiaga. E lē taitai, lē taitai ona mafai lava ona faapea mai faatasi ma le aposetolo o Paulo lenei fafine talitane taʻutaʻua i amioga leaga: “Ou te taʻutino atu ai . . . ou te mamā aʻu i le toto o tagata uma.”—Mataio 15:7-9, 14; 23:13; Galuega 20:26.

11, 12. O le ā le mea lilo a le “manu feai mūmū” lea o loo tauaveina le fafine talitane taʻuleagaina, ma o le ā le malamalamaga na mauaina e Molimau a Ieova e uiga i lenei mea lilo i le 1942?

¹¹ I le matauina o le ofo tele o Ioane, sa faapea atu ai le agelu ia te ia: “Sea le mea ua e ofo ai? Ou te taʻu atu ia te oe le uiga lilo o le fafine, ma le manu feai ua ia tietie ai, e fitu ona ulu ma ona nifo e sefulu.” (Faaaliga 17:7) O le ā lenei “manu”? I le sili atu i le 600 tausaga muamua atu, na vaaia ai e le perofeta o Tanielu manu feai faafaaaliga, ma sa faamatalaina ia te ia o nei manu latou te faaataina ai “tupu,” po o pulega faapolotiki i inei i le lalolagi. (Tanielu 7:2-8, 17; 8:2-8, 19-22) Ua vaaia i inei e Ioane i le faaaliga se tuufaatasiga o ia pulega—o se “manu feai mūmū.” O le Malo Sosoo lenei sa faia e tagata lea sa aliali aʻe i le vaaiga a le lalolagi i le 1920 peitai na lafoina i se to e lē gata o le lē toe gaoioi ina ua pa le Taua Lona Lua a le Lalolagi i le 1939. A e, o le ā, “le uiga lilo o le fafine, ma le manu feai”?

¹² E ala i le taʻitaʻiga tauatua, sa mauaina ai e Molimau a Ieova le malamalamaga e uiga i lea mea lilo i le 1942. A o sasao faaafi le Taua Lona Lua a le Lalolagi i lena taimi, na manatu ai le toatele o le a faatuputeleina ma faasolo atu ai ia Amaketo. Peitai na ese le finagalo o Ieova! Sa tele pea galuega mo ana Molimau e ao ona faia! I la latou Fonotaga Faatiokarate o le Lalolagi Fou ia Setema 18-20, 1942, i le aai autū i Cleveland, Ohio, sa fesootai ai ma isi nofoaga e 51 i le Iunaite Setete, na faia ai e le peresitene o le Sosaiete o le Olomatamata, o Nathan H. Knorr, le lauga lautele, “Filemu—E Mafai ea ona Tumau?” Na ia autaluina ai i inā le Faaaliga 17:8, o loo taʻua ai le “manu feai mūmū” lea “sa i ai, ua le i ai foi, o le a alu ae foi o ia ai le to e le gata, e alu atu foi o ia i le malaia.” Na ia faaalia ai pe faapefea ona faapea “sa i ai” o Malo Sosoo mai le 1920 seia oo i le 1939. Ona oo lea i le tulaga sa “le i ai foi” ona o le lafotuina o Malo Sosoo. Peitai, a mavae le Taua Lona Lua a le lalolagi, o le a alu aʻe ai lea o lenei tuufaatasiga o atunuu mai le to e lē gata. Pe sa faataunuuina ea lea valoaga e faavae i le Tusi Paia? E moni sa faataunuuina! I le 1945 na aliali aʻe ai le “manu feai” faavaomalo mai lona to e lē gata o le lē toe gaoioi e avea o Malo Aufaatasi.

13. Ua faaauau pea faapefea e Papelonia le Aai Tele ona faia ana auala faafafine talitane ma le “manu feai” a Malo Aufaatasi?

¹³ E ui ina vaivai Papelonia le Aai Tele i lona paʻū, a e ua faaauau pea ona faia ana auala faafafine talitane faatasi ma le “manu feai” o Malo Aufaatasi. Mo se faaaʻoaʻoga, ia Iuni i le 1965, o sui maualuluga mai lala autū e fitu o tapuaiga a le lalolagi, ua taʻua o Kerisiano ma ē e lē ni Kerisiano, na faapea e fai ma sui o le afa o le faitau aofai o le lalolagi, sa faatasitasi i San Francisco e faamanatuina lona 20 tausaga o le aso fanau a Malo Aufaatasi.c I lena lava tausaga, sa faamatalaina ai e Pope Paulo VI le Malo Aufaatasi o le “faamoemoe mulimuli o le autasi ma le filemu,” ma mulimuli ane, na faaalia ai e Pope Ioane Paulo II lona faamoemoe e faapea “o le a tumau pea lava le Malo Aufaatasi o le faapotopotoga silisili o le filemu ma le faamasinotonu.” I le vaitaimi o le 1986, na taʻimua ai le emepaea o faiga lotu sese a le lalolagi i le lagolagoina o le Tausaga o le Filemu Faavaomalo a le Malo Aufaatasi. Peitai pe na oo mai le filemu moni ma le saogalemu e tali mai ai i a latou tatalo faalotu? E mamao lava ma se tulaga faapena! E toatele ma sili atu atunuu o le Malo Aufaatasi o loo faaalia le leai o so latou alofa moni mo le fafine talitane sili.

Le Aveesea o le Fafine Talitane

14. O le ā le galuega faapitoa e tatau ona faia e le “manu” a Malo Aufaatasi, ma ua faamatalaina faapefea lenei mea e le agelu a le Atua?

¹⁴ I le gasologa o taimi, e ao ai ona alu atu le “manu feai mūmū” lava ia i le faaumatiaga. A o leʻi tupu lenei mea, ma a o leʻi oo atu foi i lana osofaiga faamanu mulimuli i luga o tagata o le Atua, o lena manu feai o Malo Aufaatasi e i ai sana galuega faapitoa e ao ona faia. E tuu atu e Ieova ʻona manatu i loto o le manu feai ma ona nifo faafitafita.’ Faatasi ai ma ā iuga? Ua tali mai le agelu a le Atua: “O nifo foi e sefulu na e iloa i le manu feai, latou te ʻinoʻino i le fafine talitane, ma faasaunoa ia te ia, ma to ese ona ofu, latou te aai foi i ona tino, ma susunu ia te ia i le afi.” Sa “mitamita o ia ia te ia, mona ua faafiafia o ia ia te ia,” peitai ua suia nei mea uma. O ona malumalu tetele faaletapuaiga ma fanua e tele o le a lē laveaiina ai o ia. E pei ona faailoa e le agelu: “O le mea lea e oo mai ai i le aso e tasi ona mala, o le oti, ma le faanoanoa, ma le oge; e susunuina foi o ia i le afi; auā e malosi lava le Alii le Atua o lē faasala ia te ia.”—Faaaliga 17:16, 17; 18:7, 8.

15. O le a tali atu faapefea manamea faapolotiki a le fafine talitane, faatasi ai ma taʻitaʻi o faiga faapisinisi tetele mauoa, i lona faaumatiaga?

¹⁵ O le a tagi auē ana manamea faapolotiki i lona faaumatiaga, i le faailoaina mai e faapea: “Aue, aue Papelonia e, le aai tele ma le aai malosi! auā o le itu aso e tasi ua oo mai ai lau sala!” E faapena foi taʻitaʻi o faiga faapisinisi tetele mauoa, o ē faia tupe faasili lē faamaoni faatasi ma ia, o le a “taufaitagi ma faanoanoa, o loo faapea atu, Aue, aue le aai tele, . . . auā o le itu aso e tasi ua faaumatia ai le oloa ua sili ona tele!”—Faaaliga 18:9-17.

16. O le ā le tali atu o le a faia e tagata o le Atua i le faaumatiaga o le fafine talitane sili, ma e faamaonia faapefea e le Faaaliga lenei mea?

¹⁶ A e peitai, o le ā le tali atu o le a faia e tagata lava ia o le Atua? O loo aofia faatasi i latou uma nei i upu a le agelu: “Ia e olioli ona o ia, le lagi e, atoa ma outou aposetolo paia ma perofeta; auā ua faasalaina o ia e le Atua ona o le faasalaina o outou e ia!” Ma se togi masau o le a veloina ai Papelonia le Aai Tele i lalo, e lē taitai ona ia toe faalumaina le suafa paia o Ieova. O le faaumatiaga o le fafine talitane sili o le a faia ai se fiafia ma ni viiga o le manumalo e vivii atu ai ia Ieova. I le avea o se viiga muamua o se faasologa o viiga o aleluia, o le a faaleoina atu ai le tali o se pese ma le olioli: “Aleluia; ua i le Alii [o Ieova] lo tatou Atua le olataga, ma le viiga, ma le faaneeneega, ma le mana; auā e faamaoni, e tonu foi ana faamasinoga; auā ua faasalaina e ia le fafine talitane e sili, o le na faaleagaina le lalolagi i lana faitaaga, ua ia taui atu ia te ia lava le toto o ana auauna.”—Faaaliga 18:20-19:3.

17. Pe a mavae le aveesea o le fafine talitane sili, o le a faapefea ona faaauau atu seia oo ina faaiuina gaoioiga faafaamasinoga a le Atua?

¹⁷ O le a faagasolo vave atu gaoioiga faafaamasinoga a le Atua i ona mutaaga a o soli e “le Tupu o tupu, ma le Alii o alii,” o Keriso Iesu, le “soligāvine o le toasa mamafa o le Atua e ona le malosi uma lava” ia Amaketo. O i inā o le a ia faaumatia ai taʻitaʻi amio leaga o malo ma isi uma o totoe o le faalapotopotoga a Satani i le lalolagi. O le a ʻaiina e manu felelei o latou tino oti. (Faaaliga 16:14, 16; 19:11-21) Maeu le tatau ona tatou fiafia ona ua latalata mai le taimi atofaina a le Atua mo le aveesea mai lo tatou lalolagi matagofie o mea uma e lē paia, eleelea, ma leaga!

18. O le ā le tumutumuga maoaʻe o le tusi o Faaaliga?

¹⁸ O le taualuga ea lena o le tusi o Faaaliga? Leai, e leʻi oo i ai! Auā pe a maʻea ona toe tutū le 144,000 i le lagi, ona faia loa lea o le faaipoipoga a le Tamai Mamoe. O le teuteuina o lana “faatoanofotane” mo lana tane, e faavaeina i le “lagi fou,” ma mai i inā e alu ifo ai o ia, i le uiga faafaatusa, e avea ma fesoasoani i lana Faatoafaiava e faafetauia i le faia o le finagalo o Ieova ia ʻfaia ia fou mea uma lava.’ O le lalelei faaleagaga o le faatoanofotane ua pei o le aai paia, o Ierusalema Fou, lea o loo faamalamalamaina e Ieova le Atua e ona le Malosi Uma Lava i lona mamalu, ma o le Tamai Mamoe o lona lamepa lea. (Faaaliga 21:1-5, 9-11, 23) O lea i inei ua oo atu ai le Faaaliga i lona taualuga sili, ma ua faapaiaina ai le suafa o Ieova, ma le Tamai Mamoe, o Iesu Keriso faatasi ma lana faatoanofotane, o Ierusalema Fou, o loo agaʻi atu e faamanuia le fanau a tagata usiusitai i le ola e faavavau i le Parataiso faalelalolagi.

19. (a) E ese mai ai i le ō ese mai ia Papelonia le Aai Tele, o le ā le isi mea e matuā manaomia mo le faaolataga? (e) O le ā le valaaulia faanatinati o loo tatala pea, ma o le ā la tatou tali atu e ao ona faia?

¹⁹ Pe ua e mataala ea i le taufaasese o faiga lotu sese ma sola ese mai ia Papelonia le Aai Tele? Ma pe ua e faia le laasaga atili e alu atu ia Ieova le Atua, e auala ia Keriso Iesu, i le tuuina atu ma le loto atoa e taʻitaʻiina atu ai i le papatisoga? E matuā manaomia foi lenei mea mo le faaolataga! A o taulata mai le taimi atofaina mo le faaoosala a Ieova o le faamasinoga mulimuli, ua faaleoina atu le valaaulia ma le uunaʻiga malosi faanatinati: “Ua fetalai mai le Agaga ma le faatoanofotane, Ina sau ia.” Tau ina ia tuuina atu e i latou uma o ē utagia lena valaau, o latou ola ia Ieova, ma maelega i le faapea atu “Ina sau ia!” i isi tagata. Ioe, “o lē fia inu, ina sau ia, atoa ma lē manao i ai, ina ave fua ia le vai o le ola.” (Faaaliga 22:17) O loo tatalaina pea le valaaulia. E mautinoa, o le a e fiafia pe a e tumau, ma tausia lena tumau i luma o le nofoalii o le Atua ma le Tamai Mamoe, o se tasi o tagata tuuina atu ma papatisoina o Ieova. O le taimi atofaina ua latalata tele mai na i lo le mea atonu e te mafaufau i ai! Ioe, ua latalata mai le tumutumuga matagofie o le Faaaliga!

I le avea o se faaiuga o le Suesuega o Le Olomatamata i lenei vaiaso, e tatau i le taʻitaʻi ona valaaulia mo le faitauina o le Iuga Fono o loo mulimuli mai ma ia autaluina faatasi ai ma le fesoasoani o fesili ia ua saunia. O le Iuga Fono lenei na tuuina atu i le Tauaofiaga Itumalo a Molimau a Ieova i le lalolagi atoa i le 1988, o le “Faamasinoga Tonu Tauatua,” i le faaiuga o le lauga “Le ʻFafine Talitane’ Taʻuleagaina—Lona Paʻū ma Lona Faaumatiaga.”

[Faaopoopoga i lalo]

[Pusa i le itulau 11]

O LE LĒ GAGANA A LE POPE

I lana tusi Franz von Papen—His Life and Times, na lomia i le 1939, ua faamatala auiliili ai e H. W. Blood-Ryan togafiti taufaasese na aumaia ai, e lena fitafita a le pope, Hitila i le pule ma fetuutuunai ai le maliega a le Vatikana faatasi ma Nasi. E tusa ai ma fasiotiga lē faatuaoia, ia na aofia ai Iutaia, o Molimau a Ieova ma isi, ua taʻua e le tusitala e faapea: “Ai se ā na lē gagana ai Pasieli [Pope Pio XII]? Auā i le fuafuaga a von Papen mo se Emepaea Paia faa-Roma o tagata Siamani i Sisifo, na ia vaaia ai i le lumanai se Lotu Katoliko sili atu ona malosi, faatasi ai ma le toe foi atu o le Vatikana i le nofoa o le pule faalelalolagi. . . . O le Pasieli lava lena e tasi ua umia nei le malosi o pulega faatautalatasi faaleagaga i luga o le faitau miliona o solu, a e peitai sa tau leai se leo na lagona i gaoioiga tetee ma sauaga faa-Hitila. . . . A o oʻu tusia nei upu, ua mavae aso e tolu o fefasiaiga tele ma e leai se tatalo mai le Vatikana mo solu o tagata na auai i le fetauaiga, toetoe o le afa o i latou o Katoliko. O le a matautia le faamasinoga pe a aveesea uma a latou taaʻiga faalelalolagi, ma tutū i luma o lo latou Atua, o Lē o le a fesili atu mo sa latou faamatalaga. O le ā e mafai ona fai ma a latou faamolemolega? E leai se mea!”

[Pusa i le itulau 15]

AAFIA AI LE VATIKANA

Sa lipotia e The New York Times o Mati 6, 1988 e faapea, sa faatalitalia e le Vatikana se aitalafu i a latou teuga tupe e $61.8 miliona mo le 1988. Na taʻua e le nusipepa: “O se tasi tupe faaalu e talitonuina sa aafia ai se folafolaga na faia i le 1984 e totogiina atu toeitiiti e $250 miliona i ē o nofo aitalafu ai o le Banco Ambrosiano. Sa matuā aafia le Vatikana faatasi ma le faletupe i Milan a o leʻi solofa i le 1982.” E mautinoa, ona o le matuā aafia tele i lena faalumaina, sa teena ma le maumauai ai e le Vatikana le tuuina atu o ofisa maualuluga e toatolu a le Vatikana i komisi suesue, e aofia ai se akiepikopo Amerika, e faamasinoina i faamasinoga Italia!

[Ata i le itulau 12]

Ua auai le Vatikana i se nofosala i le toto matautia tele faatasi ma von Papen ma Hitila

[Ē Ana le Ata]

UPI/Bettmann Newsphotos

UPI/Bettmann Newsphotos

[Ata i le itulau 15]

Na i lo le faaauilumaina o le Malo o le Atua, ua faalauiloaina e pope Malo Aufaatasi e avea ʻo le faamoemoe mulimuli o le filemu’

[Ē Ana le Ata]

Insets: UN photos