Lotu Sese—Ua Faia le Vaega a le Fafine Talitane
1. Ua faapefea ona vaai le toatele i faiga faatalitane?
E UIGA i le fafine talitane,—ua taʻua e nisi o se galuega ua sili ona leva. I lona faaaogāina masani, ua faasino lea i se fafine e faia amioga lē mamā o lē na te faatauina atu le faaaogāina o lona tino i tane. Peitai, sa i ai se taimi na manatu ai i lenei mea faapea o se galuega po o se valaau faamamaluina!
2, 3. Na faapefea ona faaeseese le vaega na faia e faitaulaga fafine i Papelonia anamua ma le tulafono a Ieova ia Isaraelu e faatatau i tane ma fafine talitane?
2 Pe a tautala e uiga i le tofi faaositaulaga i Papelonia anamua, na taʻua ai e Polofesa S. H. Hooke, o lē sa pule i suesuega tau i le eleele o mea faale-Tusi Paia: “Sa lē na o tane na tuuina atu i ai le tofiga faaositaulaga, a e sa faia foi e fafine ni vaega o le au faigaluega i malumalu sili. Sa manatu i ai o se faamamaluina le i ai o se tasi i lalo o le faatonutonuga a ositaulaga fafine, ma ua tatou faalogo e uiga i nisi tupu o ē na tuuina atu o latou afafine i le valaau faaositaulaga. . . . O la latou galuega aupito sili ona tāua, o le auauna lea e avea ma fafine talitane paia i vaitaimi o tausamiga sili. . . . O le malumalu o Eseta (Ishtar) [le atua fafine o le fanautama ma taua], e masani lava ona i ai se au faigaluega tele o nei fafine.”
3 Sa matuā eseese mamao lava lenei ma le tapuaiga sa tatau ona tuuina atu ia Ieova le Atua e le nuu o Isaraelu. Na taʻua manino mai lava e le Tulafono: “Aua neʻi i ai se fafine talitane o le malumalu i afafine o Isaraelu; aua foi neʻi i ai se tane faasotoma [o ē faia le tauatane] o atalii o Isaraelu i le malumalu. Aua neʻi e avatu i le fale o Ieova lou Atua le totogi o le fafine talitane, po o le tau o se ulī e fai ma mea e tauto ai, auā e inosia nei mea e Ieova lou Atua.” (Teuteronome 23:17, 18, NW) O lea o le totogi o se fafine talitane sa lē talia e fai ma meaalofa i le malumalu o le Atua. E oo lava i faiga faatalitane e aunoa ma so o se fesootaiga faalotu sa taʻuvalea. Sa poloaiina Isaraelu: “Aua e te faaleaga i lou afafine e fai ma fafine talitane; ina neʻi masani le nuu ma faiga faatalitane, ona tumu ai lea o le nuu i le amioga le mamā.” O tulafono faasaga i le talitane ma le tauatane, lea o loo faamatalaina “o le mea inosia lava,” sa avea o se puipuiga mo le nuu, i le faaleagaga ma le faaletino.—Levitiko 19:29; 20:13, NW.
E Sili atu ona Leaga le Talitane Faaleagaga
4. O le ā le ituaiga o talitane e sili ona leaga?
4 A e peitai, e tusa ai ma le silafaga a le Atua, o loo i ai se faiga faatalitane e sili atu ona leaga—o le talitane faaleagaga, po o le faapea mai e tapuai i le Atua moni a e o le mea moni o loo tapuai atu ma mafana atu faalogona alofa i isi atua. Sa matuā mamao le laa atu a Ierusalema anamua i ana faiga faatalitane. Sa ia avatu meaalofa i nuu na sa faitaaga faaleagaga ma ia, ua faaoonaina ai le tapuaiga moni.—Esekielu 16:34.
5, 6. O ai o faia le faitaaga faaleagaga i lenei luasefulu senituri, ma o ā fesili ua lagā ai?
5 E oo lava foi i lenei 20 senituri, o loo taatele ai faiga faatalitane i faiga o mea faalotu i le lalolagi. O le vaega aupito sili ona lauiloa i lena faiga o mea o Kerisinetoma—le faiga o mea ua taʻua e le Tusi Paia o “Papelonia le Aai Tele, o le tinā o fafine talitane ma mea inosia i le lalolagi.”—Faaaliga 17:5.
6 A e peitai o le ā le taunuuga faaiu o Papelonia le Aai Tele? Ma o le a faapefea i le oo mai o lena iuga faaiu ona aafia ai oe ma ē pele ia te oe? Afai sa tetee e le Atua i lana faamasinoga fafine talitane ia Isaraelu anamua, o le ā la o le a ia faia e uiga i faiga talitane faaleagaga i aso nei? O le a iloiloina i mataupu o loo mulimuli mai na fesili ma isi o loo fesootai atu i ai.