Papelonia le Aai Tele—Lona Faasalaga Oti

“Ua tusia foi i lona muaulu le igoa, O le mea lilo, Papelonia le Aai Tele, o le Tinā o fafine talitane ma mea e inosia i le lalolagi.” “O le mea lea e oo mai ai i le aso e tasi ona mala, o le oti, ma le faanoanoa, ma le oge; e susunuina foi o ia i le afi; auā e malosi lava le Alii le Atua o lē faasala ia te ia.”—Faaaliga 17:5; 18:8.

UA IA i tatou se aiā tatau e maofa ai e uiga i na upu na tusia e le aposetolo o Ioane i le uluai senituri T.A. O ai lenei ‘tinā o fafine talitane’? Ua faapefea ona ia matuā faatiga i le Atua lea ua tatau ai ona ia matuā faamasinoina o ia? E leai se masalosalo e faapea o faamasinoga a le Atua faasaga i le fafine talitane lilo o Papelonia le Aai Tele o ni faatamaʻiaga. Ma e mautinoa i lenei mea ona aumaia ia i tatou se mafuaaga e iloilo ai po o ai lenei fafine talitane ma pe o le a aafia faapefea i tatou i lona iuga.—Faaaliga 18:21.

O ai po o le ā e faaatagia e Papelonia le Aai Tele? Ua faapea mai le Tusi Paia ua faitaaga taʻitaʻi o le lalolagi ma ia ma ua ia fefaatauaʻi ma le aufaatauʻoa. (Faaaliga 18:3) O le mea lea, e lē mafai ai ona ia faaataina faiga faapolotiki po o faiga faapisinisi tetele. Peitai ua tuua ai lea na o le vaega lona tolu pito sili ona malosi i le lalolagi e avea ma vaega tauvā mo le igoa ‘tinā o fafine talitane.’ Ua leai se isi, ua na o le emepaea o lotu sese o le lalolagi a Satani!a

Ua tumau ai nei, nei fesili: Ai se ā, e faapefea, ma o afea o le a faaoo ai le sala ia Papelonia le Aai Tele? Pe a tuu mataupu i o latou tulaga moni: Ai se ā, e faapefea, ma o afea o le a mou ese ai lotu sese mai lenei lalolagi?

Le Faamaumauga Lē Faa-Kerisiano a Kerisinetoma

Pe a tatou iloiloina le faamaumauga o lotu sese, atonu e faamanatu mai ai ia i tatou upu faavaloaga anamua: “Na latou luluina le matagi, o le mea lea latou te selesele mai ai le afā.” (Hosea 8:7) Ua ioe lenei mea i le mataupu silisili na faaalia e le aposetolo Kerisiano o Paulo: “Aua neʻi faaseseina outou, e le ulagia le Atua auā o le mea e luluina e le tagata, o le mea lava lea e seleseleina mai ai e ia.” (Kalatia 6:7) O lea, o le ā ua luluina e lotu sese e tusa ai i le lalolagi aoao? Ma o le ā o le a ia seleseleina?

Sa aʻoaʻo e Iesu Keriso e faapea e tatau i ona soʻo ona alolofa e lē na o o latou tuaoi a e faapea foi o latou fili. (Mataio 5:43, 44) I le siiina mai i Tusitusiga Eperu, sa taʻua ai e Paulo le tatau faapefea i Kerisiano ona feagai ai ma o latou fili. Sa faapea mai o ia: “O lenei, a matelaina le ua ita mai ia te oe, fafaga ia te ia; a fia inu ia, avatu ia te ia e inu ai; auā o le amio faapea e faafaupue ai malala ola i luga o lona ulu. Aua le faatoilaloina oe i le leaga, a ia e faatoilaloina le leaga i le lelei.”—Roma 12:20, 21.

A e peitai ane, o le tala faasolopito o lotu Kerisinetoma o se tala o le feitagai ma le faamasaatoto. O faiga taua faalotu a Kerisinetoma i aso anamua ma ona po nei e aafia ai le vetea o mea, le tosoteine ma le maliu ua faamanuiaina ma faatagaina. Mo se faataʻitaʻiga, o le faaleagaina o Abyssinia e le au Fascist a Italia (1935) ma le “taua faalotu” a Franco i le Taua Sivili Sepania (1936-39) na faamanuiaina e taʻitaʻi i tulaga maualuluga o le Lotu Katoliko.

Na foia eseesega o aʻoaʻoga faalotu e ala lea i le susunuina o tagata i le laau. Sa titinaina William Tyndale o se tasi na faaliliua le Tusi Paia a o tautau i le laau ma susunuina lona tino i le 1536, ina ua uma ona ia lomiaina lana faaliliuga o le “Feagaiga Fou” i le faa-Peretania. A e muamua atu i lena, ona o le faatonuga a Pope Martin V, na eliina ai e taʻitaʻi lotu, ona o le taʻitaʻiina e le agaga o le fia taui ma sui, ponaivi o Wycliffe, o se tasi na faaliliuina le Tusi Paia, i le 44 tausaga talu ona mavae lona maliu ina ia faafiafiaina i latou i le susunuina o ona ponaivi. I le vaitaimi o le Sailiiliga Faalelotu Katoliko, e faitau afe tagata Siu ma “i latou na talitonu i talitonuga e tetee faasaga i aʻoaʻoga a le lotu” na aveesea uma a latou mea totino, faataugaina, ma susunuina i le laau—o na mea uma na faia ona faapea o le suafa o Keriso! Sa susunuina i le laau i luga o faatonuga a John Calvin o le Lotu Porotesano se tagata suesue i le Atua ma aʻoaʻoga faalotu Sepania o Michael Servetus, o lē sa sauaina e Katoliko Roma faapena foi ma Porotesano. I taua e lua a le lalolagi o lenei senituri, ua faapaiaina ai vaegaau e taʻitaʻi lotu “Kerisiano,” ma ua uunaia ai fitafita e a latou faifeau lotonuu ina ia o atu ma fasioti.

Maeu le eseesega o lea i le Faa-Kerisiano moni! Sa tusi le aposetolo o Paulo: “O lenei, ia oofu outou i le alofa mutimuti vale, ma le agalelei, ma le loto maulalo, ma le agamalu, ma le onosai, faapei o e ua filifilia e le Atua, o e ua paia ma ua alofaina; ia fefaapalepaleai, ma ia fefaamagaloai outou, pe afai ua agaleagaina se tasi e se tasi; faapei ona faamagalo mai Keriso ia te outou, ia faapea foi outou. A o le alofa, e lautua lea i nei mea uma, o le fusi lea e atoatoa ona lelei ai.”—Kolose 3:12-14.

Sa tusi Paulo i Kerisiano i Roma: “Aua le taui atu le leaga i le leaga i se tasi; ia sauniuni mea e tusa i luma o tagata uma lava. Afai e mafaia ia te outou, ia outou nofo lelei ma tagata uma lava. Le au pele e, aua le taui atu ma sui, a ia outou tuu atu i le toasa; auā ua tusia, Ua faapea mai le Alii, O ia te au le taui ma sui, ou te taui atu.” (Roma 12:17-19) O lea la, ua lē taulau ai Kerisinetoma, e tusa ai ma le malamalamaga o mataupu silisili faa-Kerisiano. Ua ia luluina le feitagai ma le amio pepelo ma o le a seleseleina le faaumatiaga.

Lotu Lē Faa-Kerisiano—O la Latou Faamaumauga

Peitai ua faia aʻe Papelonia le Aai Tele i mea e sili atu na i lo lotu a Kerisinetoma. O lotu tetele uma o lenei lalolagi ua auai i lea nofosala i le toto a le fafine talitane taʻutaʻua i amio leaga. Mo se faaaʻoaʻoga, e ao ona tauaveina e le lotu Shinto a Iapani se vaega o le tuuaiga mo le soona maelega valea ma faiga sauā o le mafaufau ma le malosi e pei ona faaalia e vaegaau a Iapani i le Taua e Lua a le Lalolagi. Ua taofi le tusitala o tala faasolopito o Paul Johnson e faapea “ina ia faamalosia i latou lava i totonu o se lalolagi tauva, ma le sauā” o loo pulea e tulaga tau amioga faa-Europa, sa latou iloa ai le manaomia ona faia o “se lotu faalesetete ma se taʻitaʻiga tau amioga, ua taʻua o le Shinto ma le bushido [o le “ala o le toa”]. . . . Sa faavaeina le tapuaiga e lē aunoa i le emeperoa, a e maise lava i vaegaau faaaupegaina, ma mai le 1920 faasolo mai ai sa aʻoaʻoina ai ni tulafono faavaomalo tau i amioga, kokumin dotoku, i totonu o aʻoga uma.” O le ā sa iu i ai? I le 1941, ina ua pomuina e Iapani le Pearl Harbor ma faapea ona ulu atu ai i le Taua Lona Lua a le Lalolagi, “Sa suia ai Shinto . . . mai se lotu faaletapuaiga tau amata, sa lē toe faaaogāina ma e itiiti, e avea o le lotu o se setete faatautalatasi i ona po nei ua faamaonia, ma o lea e ala i se mea ese na tupu e sili ona inosia, sa faaaogāina ai ia lotu sa tatau ona teena faamataʻuga e lē faalelotu o lena vaitaimi, ina ia faapaiaina ia mea.”

E tusa ai ma le vaeluaina o Initia i le 1947, lea na avea ai eseesega faalotu o se mea galue, ua faapea mai le tusitala o tala faasolopito o Johnson: “Sa fetaufetuliai pe a ma le 5 i le 6 miliona o tagata mo o latou ola i so o se itulagi. . . . O se faatatau o ē na maliliu i lea taimi e mai le 1 i le 2 miliona. O nisi faatatau faaonaponei e mai le 200,000 i le 600,000.” E oo mai i le aso lenei, ua uunaia faalotu ai fasiotiga ma le faalumaina i totonu o le sosaiete Hinitu. E masani lava o Harijans, po o i latou na tutuliese sa taʻua muamua o tagata pito sili ona maulalo, o i latou ia na lavevea fua ona o fasiotigā tagata a kegi na taupulepulea e i latou e ana fanua ma laueleele e maumea.

Ua fusia faatasi le Lotu Hinitu ma faiga faaagaga. (Faaaliga 18:23) Sa tautala le tusitala Initia o Sudhir Kakar e uiga i “le faaaloalo ma le tosina fiafia o le toatele o tagata Hinitu i faiga faataulaitu ma i latou latou te faia ia mea” ma faaopoopo mai: “O tagata iite i fetu, o ē vavalo i mea o le a tutupu i le lumanai, o ē vaai i mea o le a tutupu ua taʻua foi o sadhus [o tane “paia” faasaunoa], o ē matitiva ma aisi [o ē faia gaoioiga faamaneta] ma isi tagata—atua o loo faaaaloalogia loloto auā ua latou manatu o tagata faapea o loo fesootai ma le mafana ma lē e moni ma maualuga.”—India Today, Aperila 30, 1988.

E faaopoopo i ai o loo i ai pea feteenaiga faifaipea i le va o Hinitu, Sikhs, ma isi lotu i atunuu i Sasae. Ua faaopoopo atu e lotu taitasi i nei feteenaiga lana lava vaega o le feitagai, fefinauai, ma le fasioti tagata. Ua na o le isi lea vala o fua o Papelonia le Aai Tele.

E lē gata i lea, e itiiti se upu a le tala faasolopito faaonaponei o taua, fasiotigā tagata ma taofiofiga e vivii ai i faiga faa-Iutaia. O faiga sauā ua faaalia i nisi taimi e tagata o le ituaiga a le Hasidic o faiga faa-Iutaia, faasaga i ē tausisi atu i isi ituaiga faa-Iutaia ma lotu e lē ni Iutaia, e lē o se viiga i luma o le silafaga a le Atua.

Pe a tatou suesue le tala faasolopito o le emepaea o lotu i le lalolagi aoao, e faigofie ai ona mafai ona tatou vaaia le pogai o le i ai o se faavae a le Faamasino Sili mo le faasalaga oti o Papelonia le Aai Tele. Ioe “ua iloa foi ia te oe le toto o perofeta ma le au paia, ma i latou uma ua fasiotia i le lalolagi.” (Faaaliga 18:24) O le fuifuilua ma lotu sese i taua a le lalolagi ma taua i vaega tetele o le lalolagi ua avea ai o ia ma sē e nofosala i luma o fofoga o le Atua ona o le toto o “i latou uma ua fasiotia i le lalolagi.”

E tusa ai ma le moliaga faale-Tusi Paia, ua ono ma tatau le faamasinoina o Papelonia le Aai Tele i le faaumatiaga ona o ana faamaumauga faatala faasolopito o le faitaaga faaleagaga ma taʻitaʻi o le lalolagi, o lona nofosala i le toto i taua, ma ana faiga faaagaga. O le mea lea, ua fuafua ai faafaamasinoga e Ieova le Atua faapea ua tatau ona faagataina le emepaea o lotu sese o le lalolagi a Satani.—Faaaliga 18:3, 23, 24.

Le Auala o le a Fano ai Lotu Sese

I se gagana matuā faafaatusa, ua faamatalaina ai e le tusi o Faaaliga le faaumatiaga o Papelonia le Aai Tele. I le Faaaliga 17:16 ua tatou faitau i ai: “O nifo foi e sefulu na e iloa i le manu feai, latou te ʻinoʻino i le fafine talitane, ma faasaunoa ia te ia, ma to ese ona ofu, latou te aai foi i lona tino, ma susunu ia te ia i le afi.” “O nifo foi e sefulu” ua faaataina ai malosi uma faapolotiki o loo i ai nei i le lalolagi ma o loo lagolagoina Malo Aufaatasi, o le “manu feai mūmū,” o ia lava o le faatusa o le faiga o mea faapolotiki a le Tiapolo ua pisipisia i le toto.—Faaaliga 16:2; 17:3.b

E tusa ai ma valoaga a le Tusi Paia, o pulega faapolotiki o loo miomio faatasi ma le Malo Aufaatasi o le a tetee faasaga i le emepaea o le lalolagi o lotu sese ma faaumatia ia te ia. O le a aafia ai faiga lotu sese uma. Ua uma ona faaalia e nisi faiga faapolotiki lo latou lē lavā onosaia le aiā fua o faiga lotu sese i polotiki ma tulaga faavafealoai. Ua au atu nisi atunuu faa-Sosalisi i le talitonuga faapea e leai se Atua ma ua faaitiitia faiga lotu i se tulaga toetoe a lē toe i ai pei ona i ai i Albania, po o le avea e pei o se auauna fafine e lolo atu, e pei ona i ai i Rusia ma Saina. I isi nofoaga, ua faaalia ai e taʻitaʻi faapolotiki le teena malosi i le aʻoaʻoga faalotu o le faasaolotoga o nisi o patele Katoliko i atunuu matitiva. Peitai o isi ua latou faasaina lotu o loo aafia i mataupu faailogalanu. E oo lava i atunuu ua taʻua o atunuu saoloto, o nisi au faipolotiki latou te tetee ma le ita i taʻitaʻi lotu e aiā fua i polotiki ma mataupu faavafealoai.

O loo tumau pea le tatau ona vaaia po o ā isi finauga atili o le a faagaeeina ai vaega faapolotiki i le lalolagi aoao e gaoioi faasaga i lotu sese. Peitai e tasi le mea ua mautinoa—o le faasalaga oti o Papelonia le Aai Tele e nei vaega o le a lē gata o lo latou manao peitai o le finagalo foi lea o le Atua. Ua taʻua i le Faaaliga 17:17: “Auā ua tuuina atu e le Atua i o latou loto ia faia lona finagalo, latou te loto gatasi foi e avatu lo latou malo mo le manu feai, seia taunuu afioga a le Atua.”—Faatusatusa le Ieremia 51:12, 13.

Aua neʻi faaseseina. O le faasalaga oti o Papelonia le Aai Tele o le a lē na o se faaaliga o le toʻatamai faapolotiki faasaga i le faamaualuga ma le aiā fua faalotu. O le a avea taʻitaʻi faapolotiki ma meafaigaluega a le Atua e aunoa ma le loto i ai mo le faaumatiaga o tapuaiga sese i le lalolagi aoao. Ioe, “ua paʻi atu ana agasala i le lagi, ua manatua foi e le Atua ana amioleaga.”—Faaaliga 18:5.

Ua poloaiina e Ieova faapea e ao i lotu sese faamaualuga ona faamaulaloina. Ua taʻua e le valoaga e faapea: “E pei ona mitamita o ia ia te ia, mona ua faafiafia o ia ia te ia, ia faapea ona outou tuuina atu ia te ia o le puapuaga ma le faanoanoa. Auā ua faapea ifo i lona loto, Ou te nofo nei o le tupu fafine, ou te le se fafine ua oti lana tane, ou te le iloa lava se faanoanoa; o le mea lea e oo mai ai i le aso e tasi ona mala, o le oti, ma le faanoanoa, ma le oge; e susunuina foi o ia i le afi; auā e malosi lava le Alii le Atua o lē faasala ia te ia.”—Faaaliga 18:7, 8.

Faasalaga Oti o Afea?

O lena “aso e tasi,” po o le taimi puupuu o le faasalaga oti faanatinati, ua latalata nei. O le mea moni, o le faaumatiaga o Papelonia le Aai Tele e taʻitaʻiina atu ai i “le aso e taui ai ma sui e lo tatou Atua.” (Isaia 61:2) Ona mulimuli ane ai lea, o le a oo mai i o tatou luga le taua tonu a le Atua o Amaketo. O faamaoniga uma o mea tutupu a le lalolagi talu mai le 1914 ua faaalia ai faapea ua puupuu le taimi totoe mo le faiga o mea a Satani. O le mea lea, ua latalata le pule o le Malo o le Atua.—Luka 21:32-36; Faaaliga 16:14-16.

O le a tali atu faapefea tagata tapuai moni i le faaumatiaga o Papelonia le Aai Tele? Ua faapea mai le Faaaliga: “Ia e olioli ona o ia, le lagi e, atoa ma outou aposetolo paia ma perofeta; auā ua faasalaina o ia e le Atua ona o le faasalaina o outou e ia.” (Faaaliga 18:20) O le a i ai se oliolisaga faalevateatea a o faataunuuina le fuafuaga a Ieova ma le faapaiaina ai o lona suafa. Ua taʻua e le valoaga e faapea: “Ua mavae nei mea, ona ou faalogo lea e peiseai o le leo tele o le motu o tagata e toatele o i le lagi, ua faapea atu, Aleluia; ua i le Alii lo tatou Atua le olataga, ma le viiga, ma le faaneeneega, ma le mana; auā e faamaoni, e tonu foi ana faamasinoga; auā ua faasalaina e ia le fafine talitane e sili, o le na faaleagaina le lalolagi i lana faitaaga, ua ia taui atu ia te ia lava le toto o ana auauna.”—Faaaliga 19:1, 2.

O le faatamaʻiaga o Papelonia le Aai Tele, mulimuli mai ai ma le faasalaga oti o vaega o loo totoe o le faiga o mea a Satani e le Atua, o le a uiga i faamanuiaga e lē uma mo tagata tapuai moni o le Atua, e aofia ai le toatele o ē o le a toe faatutuina i luga i inei i le lalolagi. E pei ona folafolaina e Iesu i ē uma e faapea: “Afai tou te tumau pea i laʻu mataupu, o oʻu soo moni outou. E iloa foi e outou le mea moni, e tuu saʻoloto foi outou e le upu moni.”—Ioane 8:31, 32; Faaaliga 19:11-21.

Ua uma ona saʻoloto tagata tapuai moni mai aʻoaʻoga a lotu sese ia ua upu leaga i le Atua i le gasologa mai o taimi. I le lalolagi fou o le amiotonu na folafolaina, o le a saʻoloto i latou e ola e aunoa ma le mataʻu i le oti, auā “e ia te i latou le Atua lava, o lo latou Atua ia. E sōloiesea foi e le Atua loimata uma i o latou mata; e leai foi se toe oti, po o se faanoanoa, po o se aue, e leai foi se toe puapuaga; auā ua mavae atu mea muamua.” (Faaaliga 21:3, 4) O mea muamua o le a mavae atu o le a aofia ai Papelonia le Aai Tele, le emepaea o lotu sese o le lalolagi a Satani.

[Faaopoopoga i lalo]

[Faamatalaga faaopoopo i le itulau 5]

“E ala i se mea ese na tupu e sili ona inosia, sa faaaogāina ai ia lotu sa tatau ona teena faamataʻuga e lē faalelotu o lena vaitaimi, ina ia faapaiaina ia mea”

[Ata i le itulau 4]

Sa sauāina Wycliffe ma Tyndale ona o le faaliliuina o le Tusi Paia

[Ē Ana le Ata]

From an old engraving in the Bibliothèque Nationale