O le Soifuaga o Iesu ma Lana Faiva

Ua Faalogoina Faatolu le Siufofoga o le Atua

AO IAI i le malumalu, ua ātu le loto o Iesu ona o le maliu lea e tatau ona toeitiiti la faafesagaʻi. O lona popolega autū pe o le a faapefea ona aafia le talaaga o lona Tamā, o lea na ia tatalo ai: “Loʻu Tamā e, ia e tuuina atu le mamalu i lou suafa.”

I lena mea, na oo mai ai se leo malosi mai le lagi, e faalauiloa mai: “Ua ou tuuina atu le mamalu, ou te toe tuuina atu ai foi i ai le mamalu.”

Ua vevesia le motu o tagata na tutū latalata ane. “Ua fetalai se agelu ia te ia,” ua amata ona fai mai ai nisi. Ua faapea mai nisi o ni faititili. Ae, o le mea moni, o Ieova le Atua lea na fetalai! Ae peitai, e lē o le taimi muamua lenei na faalogoina ai le siufofoga o le Atua i le fesootai atu ma Iesu.

I le papatisoga o Iesu, i le tolu ma le afa tausaga muamua atu, na faalogo ai Ioane le Papatiso i le Atua o fetalai mai e uiga ia Iesu: “O loʻu atalii pele lenā, ua ou fiafia lava ia te ia.” Ona oo lea, i se vaitaimi ina ua mavae le Paseka muamua, ina ua faaliliuina Iesu i o latou luma, na faalogo ai Iakopo, Ioane ma Peteru i le siufofoga o le Atua o folafola mai: “O loʻu Atalii pele lena, ou te fiafia ia te ia; ia outou faalogo ia te ia.” Ma i le taimi nei, mo le faatolu o taimi, ia Nisani 10, i aso e fa a o leʻi maliu Iesu, ua toe faalogoina ai foi le siufofoga o le Atua e tagata. Ae i le taimi lenei ua fetalai Ieova ina ia mafai e le vao o tagata e toatele ona faalogo i ai!

Ua faamatala e Iesu: “E lei oo mai lenei siufofoga ona o aʻu, a ona o outou.” Ua saunia ai e lea mea le faamoniga faapea o Iesu o le Alo moni o le Atua, o le Mesia folafolaina. “O loo faasalaina nei lenei lalolagi,” ua faaauau atu ai Iesu, “e tulia nei le alii o lenei lalolagi.” O le uiga, o le auala o le soifuaga faamaoni o Iesu, ua faamautinoa ai faapea o Satani le Tiapolo, o lē o loo pule i le lalolagi, ua tatau i ai ona “tulia,” faaoosalaina.

I le faasino atu i iʻuga o lona maliu ua latalata mai, ua fetalai atu Iesu: “O aʻu foi, afai e siitia au ai le eleele, ou te tosina uma mai tagata ia te au.” O lona maliu ua lē o se toilalo lea i so o se uiga, auā e auala i lea, o le a tosina atu ai isi tagata ia te ia lava ina ia latou olioli foi i le ola e faavavau.

Ae ua tetee le motu o tagata: “Ua matou faalogo i le tulafono, e tumau pea le Keriso e faavavau; pe faapefea foi ona e fai mai, E tatau ona siitia i luga o le Atalii o le tagata? O ai ea lenei Atalii o le tagata?”

E ui lava i faamaoniga uma, e aofia ai ma le faalogoina o le siufofoga o le Atua lava ia, ae e toatele sa lē talitonu faapea o Iesu o le Atalii moni o le tagata, le Mesia folafolaina. Peitai, e pei ona sa ia faia i le ono masina muamua atu i le Tausamiga o Fale Apitaga, ua toe fetalai ai foi Iesu e uiga ia te ia lava o “le malamalama” ma faalaeiau atu ai i lana au faalogologo: “Ia outou talia le malamalama, manū o ia te outou le malamalama, ina ia avea o outou ma fanau a le malamalama.” Ina ua uma ona ia fetalai i nei mea, ona maliu ese lea o Iesu ua lafi mai ia i latou, e mautinoa lava ona ua lamatia lona soifua.

O le leai o se faatuatua o tagata Iutaia ia Iesu ua faataunuuina ai upu a Isaia e uiga i ‘le faatauasoina o mata o tagata ma le faamaaaina o o latou loto ina neʻi liliu i latou ma faamaloloina.’ Na vaaia e Isaia i se faaaliga lotoā faalelagi o Ieova, e aofia ai ma Iesu i lona mamalu faalelagi sa muai iai a o leʻi avea ma tagata o loo i tafatafa o Ieova. Peitai, i le faataunuuina o le mea na tusia e Isaia, ua tetee ai ma le ua maaa tagata Iutaia i le faamaoniga faapea o Ia lenei o lo latou Faaola folafolaina.

I le isi itu, o le toatele e oo lava i pule (e iloatino lava o sui o le faamasinoga maualuga a Iutaia, le au Saneterini) na latou tuu moni lo latou faatuatua ia Iesu. O Nikotemo ma Iosefa le Arimataia o le toalua o nei pule. Ae o pule, i le taimi nei, ua lē taulau ona latou folafola atu lo latou faatuatua, ona o le fefefe ina neʻi faateʻaeseina mai o latou tulaga i sunako. Pagā le tele o mea ua misia ai e i latou na!

Ua faaauau ona matauina e Iesu faapea: “O lē faatuatua mai ia te au, e le faatuatua mai o ia ia te au, a e ia te ia ua auina mai aʻu; O lē vaai mai foi ia te au, e vaai atu o ia ia te ia ua auina mai aʻu. . . . Afai foi e faalogologo se tasi i aʻu upu, a e lē talitonu i ai, ou te lē faasala ia te ia; auā ou te leʻi sau e faasala i le lalolagi, a ia ou faaolaina le lalolagi. . . . O le upu ua ou tautala atu ai, e faasala lea ia te ia i le aso gataaga.”

O le alofa o Ieova mo le lalolagi o le fanau a tagata na uunaia ai o ia e auina mai Iesu ina ia faaolaina i latou uma o ē faatuatua ia te ia. O le faasaoina o tagata o le a filifilia e auala pe latou te usiusitai i mea na faatonu e le Atua ia Iesu e fetalai mai ai. O le faamasinoga o le a faia “i le aso gataaga,” i le taimi o le Pulega a Iesu i le Afe o Tausaga.

Ua faaiʻu e Iesu i lona fetalai mai: “Ou te le tautala fua na o aʻu, a o le Tamā ua auina mai aʻu, na ia tuu mai le poloaiga ia te au i mea ou te fai atu ai, ma mea ou te tautala atu ai. Ua ou iloa foi o lana poloaiga o le ola faavavau lea. O lenei, o mea ou te tautala atu ai, faapei ona fetalai mai ai le Tamā ia te au, e faapea ona ou tautala atu ai.” Ioane 12:28-50; 19:38, 39; Mataio 3:17; 17:5; Isaia 6:1, 8-10.

◆ O ā taimi e tolu na faalogoina ai le siufofoga o Ieova e faatatau ia Iesu?

◆ Na faapefea ona vaaia e le perofeta o Isaia le mamalu o Iesu?

◆ O ai pule na tuu atu lo latou faatuatua ia Iesu, ae aiseā na latou lē taʻutino ai ia te ia?

◆ O le ā “le aso gataaga,” ma o le ā le auala o le a faamasinoina ai tagata i lea taimi?