Tala Lelei mo le Fanau Uma a Tagata!
“NA AʻU iloa foi le tasi agelu ua lele i le taulotoaiga o le lagi, ua ia te ia le tala lelei e faavavau e folafola atu i e nonofo i le lalolagi i atu nuu uma, ma itu aiga, ma gagana eseese, ma nuu.” (Faaaliga 14:6) O upu na, sa faamatala ai e le aposetolo matua o Ioane lana vaaiga faagaeeina faavaloaga, o se vaaiga ua faataunuuina i o tatou lava aso. Maeu se mapusaga i le iloa faapea o loo iai le tala lelei i lenei tupulaga ua faateleina ai le solitulafono, le polusione, faiga taufaamataʻu, taua, ma le salalau atu o le lē mautonu tau i tamaoaiga! Ae o le ā le tala e sili ona lelei lea ua manaomia ai se agelu na te folafolaina atu? O ā tala ua mafai ona lava le faafiafiaina ai e tatau ona folafola atu i atunuu uma ma ituaiga ma gagana ma nuu uma?
E mafai ona tatou taliina lena fesili pe afai tatou te mafaufau i tuā i se isi mea na tupu ina ua folafola totino mai e se agelu le tala lelei. O lenei mea na tupu ina ua latalata atu le senituri muamua T.L.M. i lona faaiʻuga, toetoe lava selau tausaga a o leʻi vaaia e Ioane lana faaaliga. Sa iai leoleo mamoe ma a latou lafu mamoe i le fanua e latalata i Peteleema, ma na faaali mai ai se agelu e folafola le fanau mai o Iesu, i lona faapea mai: “Faauta, ou te au mai ia te outou le tala lelei e olioli tele i le nuu uma; auā o le aso nei ua fanau ai i le aai a Tavita, lo outou Faaola, o le Alii ia o Keriso.”—Luka 2:10, 11.
O le fanau mai o Iesu sa avea moni o se “tala lelei e olioli tele” ai. Sa tupu aʻe o ia e avea o le Keriso ma le Faaola folafolaina, o lē na tuuina atu lona soifuaga lelei atoatoa faaletagata ina ia ola ai i latou o ē e talitonu ma le loto saʻo. E sili atu i lo o lena, sa tatau ona avea o ia ma Tupu o le Malo o le Atua, le “Perenise o le Filemu,” o lē i lalo o lana pulega o le a oo mai ai i le faaiʻuga le faamasinoga tonu ma le filemu i le fanau a tagata. (Isaia 9:6, NW; Luka 1:33) E moni, o lona fanau mai sa o le tala lelei sa onomea ona folafolaina mai e se agelu!
O Iesu o le Tupu
I tuā i le uluai senituri, na faataunuuina ai e Iesu le tele o fuafuaga a le Atua mo ia, ae i le taimi lea e leʻi faanofoaina o ia e avea o le Tupu o le Malo o le Atua. E pei ona masani ai ona faasino atu e lenei mekasini, faapea o lena mea o le a lē tupu seia oo i le 1914. E pei ona faaalia manino mai e le faataunuuga o le valoaga, i lena tausaga na faavaeina ai le Malo o le Atua i le lagi. (Faaaliga 12:10, 12) E ui lava sa iai se tala leaga tele i le 1914—le pasae aʻe o le Taua Muamua a le Lalolagi—ae o le fanau mai o le Malo o le Atua sa avea o se tala aupito sili ona lelei. O le pogai lena na valoia ai e Iesu mo o tatou aso: “E talaʻiina atu foi lenei tala lelei o le malo i le atu laulau uma, e fai ma molimau i nuu uma.”—Mataio 24:14.
Pe ua faataunuuina ea le valoaga a Iesu? O le tali o le ioe! Ma ua faataunuuina foi le vaaiga faavaloaga a Ioane. E moni, e lē mafai ona tatou vaaia le agelu lē vaaia lea na iloa e Ioane. Ae ua matuā vaaia Molimau a Ieova a o latou folafola atu le tala lelei a le agelu “i atu nuu uma, ma itu aiga, ma gagana eseese, ma nuu.” I le 212 atunuu ma atumotu o le sami, ua lagonaina ai o latou leo. Ma ua tali mai le vao o tagata. O mea na tutupu i nisi o i latou nei o le a na ona faaalia ai pe ua faapefea ona lelei moni le tala i le Malo o le Atua.