Faasalalauina Atu i le Kelope o Tala Lelei

UA PULE le Malo o le Atua! O se tala aupito sili ona lelei lenei. O le mea lena na folafola atu ai ma le aasa e Molimau a Ieova e sili atu i le 3,700,000 i le lalolagi atoa i le 1989, le “tala lelei” na valoia e Iesu ma le “tala lelei” na folafola e le agelu i le vaaiga a Ioane. (Mataio 24:14; Faaaliga 14:6) E pei ona taʻua e le aposetolo o Paulo: “Ua oo lo latou leo i le lalolagi uma lava, o a latou upu foi i tuluiga o le atu laulau.” (Roma 10:18) Ma o tagata taitoatasi uma e toetoe lava o nuu uma ma ituaiga ma gagana ma atunuu ua tali mai ma le fiafia i la latou valaau ina ia “matatau i le Atua, ma avatu ia te ia le viiga.”—Faaaliga 14:7.

E Lē Toe Faia ni Inisiua o Soifua

O se tagata faapena o se tamaloa i Egelani o lē na maua mea e ola ai mai i le lē mautonu o le olaga. O Keni o se tagata faatauoloa e fai lona inisiua, ma ina ua ia asiasi atu i le fale o ni Molimau a Ieova, na latou fesili atu ia te ia: “E te fia ola i se lalolagi e lē toe manaomia ai ona faia se inisiua mo soifua?” O le ā le uiga o la latou tala? O lena mea e tusa ai ma le Tusi Paia e faapea, i lalo o le Malo o le Atua, o le tele o mea ua lē mautinoa ai le olaga i le taimi nei, e aofia ai maʻi ma le oti, o le a lē toe iai.

E mafai lena mea? Ioe, ua folafola mai e le Atua lava ia. Mo se faaaʻoaʻoga, ua faapea mai le Tusi Paia: “E ia te i latou [le fanau a tagata] le Atua lava, . . . E sōloiesea foi e le Atua loimata uma i o latou mata; e leai foi se toe oti, po o se faanoanoa, po o se aue, e leai foi se toe puapuaga; auā ua mavae atu mea muamua.” (Faaaliga 21:3, 4) O le ā o le a na aumaia lea suiga? O le Malo o le Atua. E tusa ai ma le Afioga a le Atua, o lenei malo ua lē pine ae ona “tuʻimomomoina ma faaumatia ia malo uma lava [faiga faapolotiki i aso nei], a o ia e tumau lava e faavavau.”—Tanielu 2:44.

O mau o pei o nei na tuuina atu i mafaufau o le faitau selau miliona o tagata e Molimau a Ieova i taimi o a latou tauiviga o le talaʻiga faalekelope. O le toatele, e pei o Keni, na oo ina latou iloa faapea o nei mea ua lē na o ni mafaufauga e manaonao i ai. O faamaoniga e mautinoa. O nei folafolaga tauatua e maufaatuatuaina ma o le a lē pine ae faataunuuina.

Se Suiga Tau Mea Tāua

O i latou o faalogo atu i Molimau a Ieova a o latou faaleoina le faalauiloaga olioli a le agelu ua oo ina latou iloa faapea o le mataʻu i le Atua ma avatu ia te ia le viiga e aafia ai e sili atu na i lo o le na ona talitonu i folafolaga a le Tusi Paia. E suia ai o latou uiga atoa ma mapu ai mai le tele o mea faigata o le olaga.

Na iloa e Lafaele ma lana avā le moni o lenei mea. E nonofo i laua i Anitenitina, ma ina ua uma ona la faaipoipo e sili atu i le 40 tausaga ua mavae, sa avea o lo la sini autū i le olaga le galulue mamafa ma faasao mo se lumanai saogalemu. Ae peitai, i le 21 tausaga mulimuli ane, na pau lava le mea na la faaalia mai mo a la galuega mamafa uma sa o se tamai fale sa manaomia pea lava ona toe faafouina. Sa leʻi iai ia i laua se lagona saogalemu na i lo o le taimi muamua na faatoʻā faaipoipo ai.

Ona la faalogo lea i le tala lelei mai Molimau a Ieova ma aʻoaʻoina e uiga i se oa e sili atu ona lelei ma se saogalemu e sili atu ona lelei. Sa fetalai Iesu e uiga i lenei mea i lana Lauga i luga o le Mauga i lona fetalai mai: “Aua tou te toloʻaʻi oa mo outou i le lalolagi, o i ai le mogamoga ma le ele e faaumatia ai; o i ai foi tagata gaoi e eli atu, ma gaoi ai. A ia outou toloʻaʻi oa mo outou i le lagi, e le o i ai se mogamoga, po o se ele e faaumatia ai; e le o i ai foi tagata gaoi e eli atu, ma gaoi ai.”—Mataio 6:19, 20.

Ona e lē o aʻoaʻoina e le Tusi Paia i tatou ina ia tatou valea e tusa ai ma le faagasologa o le mauaina o le tamaoaiga faitino, ae ua ia uunaia i tatou ina ia lē tuu atu lo tatou faamoemoe i na mea. (Failauga 7:12) Na i lo o lea, e ao ona tatou galulue ina ia mauaina oa faaleagaga e ala i le suesueina o le Tusi Paia, aʻoaʻoina o le finagalo o le Atua, ma avea le faia o lena finagalo o le mea e faamuamua i o tatou olaga. (Mataio 6:33) Na amata e Lafaele ma lana avā ona faatupuina lenei tamaoaiga faaleagaga, ma ua la lagona nei faapea ua mauoa moni i laua, e lē ona o lo la tulaga tau tupe, ae ona o lo la faiā ma le Atua. (Faaaliga 3:17, 18) O le feau o le Malo o le Atua sa avea o se tala ua lelei tele mo i laua.

Se Faaipoipoga ua Toe Faaleleia

E iai le malosi moni i le tala lelei e faataunuuina ai le mea lelei. Mo se faaaʻoaʻoga, o Ioane, e nofo i Egelani, sa leʻi naunau i le Tusi Paia, ae o lana avā ma lana fanau sa naunau i ai. O lea na amata ona latou auai i sauniga a Molimau a Ieova a o alu atu Ioane e inu faatasi ma ana uo. O le iʻuga, sa aafia o ia i le onā, ulaula, ma mulimuli ane, o le faia o amioga lē mamā tau amio. I le iʻuga, na ia tuua ai lana avā ae nonofo ma se isi fafine.

Sa amata ona faia faagasologa mo le tatalaina o le faaipoipoga. Ae sa faateʻia lava Ioane i le vaai atu i lana avā—o lē na aʻoaʻoina amioga faa-Kerisiano mai i lana suesuega o le tala lelei—o loo tumau pea ona magafagafa lelei i le tausiga o ia. Sa lē malamalama Ioane i le mafuaaga. I le tolu vaiaso a o leʻi faia se faaiʻuga o le tatalaina o le faaipoipoga, sa iai ni āuga o le amio faa-Kerisiano a le avā a Ioane. Sa ia faaalia le matuā salamō moni mo lana amio, ma na toe soloia ai taualumaga o le tatalaina o le faaipoipoga. Ua vaavaai nei Ioane i le tala lelei mo ia lava ma suesueina le Tusi Paia faatasi ma Molimau a Ieova. I le taimi nei ua avea ai o ia ma Kerisiano, ma o loo taʻu atu e ia faatasi ma lana avā i isi le tala lelei o le Malo.

I nei aso o le nutililia o le maualuga o amioga faaleaiga, ua manaomia ai e le toatele se fesoasoani lea ua mafai e le tala lelei faavae i le Tusi Paia ona ofoina atu. I le malaga i luga o se vaalele, sa nofo ai se Molimau a Ieova mai Peru i tafatafa o se taʻitaʻi o le vaegāʻau. Sa oo ina faia sa la talanoaga ma na amata loa e le taʻitaʻi ʻau ona sasaa atu faalavelave o lona aiga, e aofia ai le mea moni faapea o lana avā ua fai ma masani le faaaogāina o vailaau faasaina ma ua oo i le tulaga ua toetoe lava tuua ia ona o se isi tane talavou. Sa faaalia ma le tomai e le Molimau ia te ia faapea o loo aumaia e le Tusi Paia ni fautuaga lelei ma le mautū e uiga i mataupu faaleaiga ma faapea o nei fautuaga sa mafai foi ona fesoasoani totino ia te ia e foia faafitauli o lona lava aiga.—Efeso 5:21–6:4.

Sa faafetai atu le ofisa i le Molimau mo ana upu faamafanafana ma faia ai se tusiga mo mekasini o Le Olomatamata ma le Awake! ina ia mafai ai ona ia faalauteleina lona iloa o le tala lelei. Ina ua tuua la e le Molimau le vaalele, sa faatopetope atu se ulugalii talavou i le fia maua o ia ma talosaga atu pe mafai ona seʻi o latou talanoa. Na la faapea atu, “Sa ma nonofo tonu lava i ou lua luma ma na ma faalogo mai ai i la oulua talanoaga ma le tamaloa. Ma te mananao foi la e faia sa ma tusiga mo na mekasini.” Na la mananao foi e aʻoaʻoina le tala lelei lea e mafai ona faaleleia ai olaga.

Se Olaga ua Suia

E lē gata i lea, ua suia e le tala lelei e faavae mai i le Tusi Paia olaga o tagata. E pei ona faapea mai le aposetolo o Paulo: “O loo ola le afioga a le Atua, o loo matuā galue foi.” (Eperu 4:12) Sa moni lenei e tusa ai ma le tulaga o se tamaloa talavou i Maketonia, i Eleni. Sa faateʻia o ia i lona iloa faapea e tusa ai ma le Tusi Paia, o le suafa o le Atua o Ieova. O lea na ia fesili atu ai i se uo ina ia faafesootai atu o ia i Molimau a Ieova i se vave e mafai ai. Na fuafuaina ni talanoaga se lua faatasi ma Molimau, ma o nei talanoaga taitasi sa tusa lo latou uumi pe a ma le fa itula. Sa amata e le tamaloa talavou ona faia se suesuega faale-Tusi Paia i se faavae faifai pea, o le umi o le uluai suesuega na faia seia oo i le ta o le lua i le vaveao!

Mai lena uluai suesuega, na vave lava ona faatatau atu e le tamaloa talavou lona olaga i tapulaa faale-Tusi Paia. Sa auai o ia i sauniga mo le tapuaiga faatasi ma Molimau a Ieova ma oo ina alofa tele i Lē na Foafoaina Mea. Ma sa tauia mai o ia e Ieova i lona faamanuia mai i ai. O le vaiaso muamua o lana suesuega faale-Tusi Paia, na ia ʻoti ai lona lauulu uumi. I le vaiaso lona lua, sa lē toe alu ai o ia i faleʻaiga ma falesiva e saili ai ni aumea e faafiafia ai. O le vaiaso lona tolu, na lafoai ai lana sikaleti mulimuli. Ina ua uma ona suesue mo le lua masina, sa amata loa ona ia auai ma Molimau i le taʻuina atu i isi o le tala lelei o le Malo. Ioe, sa fiafia o ia faapea ua aumaia e Molimau a Ieova le tala lelei i lea vaega o le lalolagi.

Le Tala Lelei i le Fale Puipui

E oo lava i tua o pa o fale puipui sa lē avea o se pa pupuni i le tala lelei. I Sepania sa faafalepuipuiina ai se tamaloa talavou e igoa ia Iose mo se taimi umi ona o ni ana gaoioiga faaauupegaina ma isi gaoioiga solitulafono. Ae peitai, na mafai e Molimau a Ieova ona taʻu atu ia te ia le tala lelei, ma na suia atoatoa e le feau a le Tusi Paia ona uiga. Sa ‘tuuina atu le malosi’ e Ieova ia te ia.—Filipi 4:13.

Fai mai Iose atonu e mafai lava ona faaaluina lona olaga atoa i lenei faiga o mea i tua o pa pupuni ona o ana uluai amioga. Ae ua papatisoina o ia ma ua avea nei o se Kerisiano. O loo mautu pea le lagolagoina o ia e lana avā, ma o loo taumafai o ia e avatu i le la tama tama laitiiti se tausiga faa-Kerisiano. I le taimi nei, o loo tufa atu ai e Iose le tala lelei i isi uso pagota, o tagata na e faigata ona oo atu i ai i latou ia o loo nonofo i tua o pa o le fale puipui. I le taimi nei ua avea foi ma Kerisiano papatisoina lana uo o loo la nonofo i le potu e tasi i le fale puipui.

O ni nai faaaʻoaʻoga itiiti nei e faaalia ai iʻuga o le tauiviga o le talaʻiga a Molimau a Ieova i le kelope aoao. E moni, o le tala lelei o loo folafolaina e agelu lē vaaia ua faaleoina atu e Molimau a Ieova e avea o se ‘tala fiafia ia i latou uma o ē nonofo i le lalolagi ma i atunuu uma ma gagana ma ituaiga ma nuu uma lava.’

O se tala aupito sili ona lelei, ma ua na o lea le faamoemoe o le fanau a tagata. Ua matou uunaia oe ina ia e utagia lea tala lelei. I le pei o Keni ma Ioane i Egelani, i le pei o Lafaele ma lana avā i Anitenitina, i le pei o Iose i Sepania, ma i le pei o le mano ni mano o isi, ua tatou aufaatasi atu i le agelu i le uunaia o tagata uma ina ia “matatau i le Atua, ma avatu ia te ia le viiga, auā ua oo mai le itu aso o lana faamasinoga; ma ia outou ifo i le na faia le lagi, ma le fanua ma le sami, atoa ma puna o vai.”—Faaaliga 14:7.