‘E Lē Mā i le Tala Lelei’

“Ou te le mā i le tala lelei . . . ; auā o le mana lava lea o le Atua e ola ai i latou uma o e faatuatua.”—ROMA 1:16.

1. E masani faapefea ona talia se tala lelei, ae o le ā le manatu o tagata lē faatuatua o le lalolagi i le tala lelei o le Malo o le Atua?

O LE mea e foliga mai i le tasi tagata o le tala lelei, e mafai ona manatu i ai le isi tagata e leai. O sē tauaveina se tala lelei, e masani lava ona talia ma le loto fiafia, ma e mafai foi ona liliu atu ia te ia se taliga o naunau e fia faalogo. Ae peitai, na valoia mai e le Tusi Paia faapea o tagata lē faatuatua o le lalolagi o le a latou manatu i le tala lelei o le Malo o le Atua ma lana feau o le faaolataga e lē o se mea e fiafia ai.—Faatusatusa 2 Korinito 2:15, 16.

2. O le ā na fai mai ai le aposetolo o Paulo e uiga i le tala lelei na ia folafola, ma aiseā o le a avea ai pea le feau na ia folafola o se tala lelei i aso nei?

² O le aposetolo o Paulo o se tasi lea na auina atu e talaʻi le tala lelei i le lautele. O le ā na ia lagona ai e uiga i lona tofiga? Na faapea mai o ia: “O le mea lea ou te naunau ai, ia ou folafola le tala lelei ia te outou foi o i Roma. Auā ou te le mā i le tala lelei.” (Roma 1:15, 16) Mo le tala lelei ina ia tumau pea ona lelei i aso nei, toetoe lava 2,000 tausaga ina ua uma ona tusi le aposetolo o Paulo i Kerisiano i tuā i inā i Roma, e tatau ona avea o se tala lelei e tumau. O le mea moni, o lea tala lelei, o le “tala lelei e faavavau.”—Faaaliga 14:6.

3, 4. Aiseā na fai mai ai le aposetolo o Paulo faapea e lē mā o ia i le tala lelei?

³ Aiseā na fai mai ai le aposetolo o Paulo faapea e lē mā o ia i le tala lelei? Aiseā sa mafai ai ona mā o ia i le tala lelei? Auā e lē o se feau tausaafia, auā o lea feau sa faatatau i se tagata o lē na faasatauroina i luga o le laau faaoosala e pei o se tagata solitulafono inosia, i foliga vaaia uma ua tuu ai o ia i se malamalamaga matuā leaga lava. Mo le tolu ma le afa tausaga, sa femaliuai ai lenei tagata i itulagi eseese o Palesitina ma le tala lelei ma na fetaiaʻi ai o ia ma ni teteega matuiā mai tagata Iutaia,ae maise lava taʻitaʻi lotu. Ma i le taimi nei, o Paulo o lē o loo tauaveina le igoa o lena tagata amusia, na fesagaʻi foi ma ni teteega faapena.—Mataio 9:35; Ioane 11:46-48, 53; Galuega 9:15, 20, 23.

⁴ Ona o na teteega, atonu sa manatu ai tagata e uiga ia Paulo ma ona uso a soʻo o Iesu Keriso faapea ua iai se mea e mamā ai i latou. E moni, o loo pipii atu nei Paulo i se mea sa ia muai vaavaai atu i ai faapea o se mea e mā ai. Ua uma ona auai totino o ia i le faafaupue atu o faifaiga i luga o soʻo o Iesu Keriso. (Galuega 26:9-11) Ae ua uma ona taofia e ia lena auala o gaoioiga. O le iʻuga, o ia, faatasi ai ma isi o ē na avea o Kerisiano, na puapuagatia i sauaga mataʻutia.—Galuega 11:26.

5. Na faapefea ona faamatala e Paulo lana tala e uiga i le lē mā i le tala lelei?

⁵ Afai e faatagaina e se tagata ia lava e oo i ai le lagona mā i le avea o se soʻo o Iesu Keriso, ua ia te ia la se vaaiga faaletagata agaʻi i mea. Sa lē faapena le aposetolo o Paulo. Na i lo o lea, i le faamatalaina o lona lē mā i le tala lelei lea sa ia talaʻia, na faapea mai o ia: “O le mea moni, o le mana lava lea o le Atua mo le faaolataga ia i latou uma o ē faatuatua.” (Roma 1:16, NW) O le mana o le Atua e lē o se pogai e masiasi ai pe afai e galue e ala i se soʻo o Iesu mo le faataunuuina o le fuafuaga taʻuaogāina o le mamalu o le Atua o lē na tapuai atu i ai ma viia e Iesu Keriso lava ia.—Faatusatusa 1 Korinito 1:18; 9:22, 23.

Folafola le Tala Lelei i le Lalolagi Aoao

6, 7. (a) O le ā le tiute tauave faatatau i le tala lelei o loo taumafai Molimau a Ieova e ola ai, ma o le ā le iʻuga? (e) E ui lava tatou te lē mananao e taofia i tatou e le fefe mai le tuuina atu o le molimau, ae o le ā atonu e manaomia i nisi taimi? (Tagai i le faamatalaga i lalo.)

⁶ I le pei o Paulo, ua avea ai Molimau a Ieova i aso nei o soʻo o Lona Alo faamamaluina, o Iesu Keriso. I nei Molimau ia te ia, ua tuuina atu i ai e Ieova lenei oa o “le tala lelei mamalu.” (1 Timoteo 1:11, NW) Ua taulau pea ona ola Molimau a Ieova e tusa ai o lenei tiute tauave mamafa, ma ua uunaia i latou ina ia aua neʻi mamā ai. (2 Timoteo 1:8) E matuā tāua le aua lava neʻi faatagaina le mataʻu po o le mā e taofia i tatou mai le tuuina atu o se molimau ma faailoaina atu i tatou o Molimau a Ieova.a

⁷ O lena molimau atu ma le lototele ma le lē mataʻu na iʻu i le faalauiloaina atu o le suafa o le Atua e Silisili ona Maualuga i le lalolagi atoa ma i le talaʻiina o le tala lelei o lona Malo i se fua i le lalolagi aoao. Na fetalai le Alo o le Atua: “E talaʻiina atu foi lenei tala lelei o le malo i le atu laulau uma, e fai ma molimau i nuu uma; ona oo mai ai lea o le gataaga,” ma e lē mafai lava ona faatagaina lana valoaga e oo mai ai se lē taulau. (Mataio 24:14) Ua talaʻiina nei le tala lelei i atunuu e sili atu i le 210, ma o le iʻuga o lenei galuega talaʻi e leʻi oo ina ausia. O le lē mā i le tala lelei ma i le fesagaʻi ma le lumanai faatasi ma le lototele, ua tatou tatalo ai e pei ona faia e uluai soʻo o Iesu Keriso: “O lenei, le Alii e, . . . ia e foai mai i au auauna, ina ia latou matuā tautala i lau afioga ma le faamalosi.”—Galuega 4:29.

8. Aiseā e lē ao ai ona loto vaivai Molimau a Ieova ona o teteega mai atunuu uma lava o le lalolagi?

⁸ Ona e moni faapea o Molimau a Ieova e inosia ma tetee i ai atunuu uma lava o le lalolagi, o lenei mea ua faataunuuina ai le mea na valoia e fai ma faailoga e mataulia ai tagata tapuai faamaoni o le Atua soifua moni e toatasi. (Ioane 15:20, 21; 2 Timoteo 3:12) O lea na i lo o le palaai ma loto vaivai ona o lenei mea, ua faamautinoa atu ai i ē folafola o le tala lelei faapea ua ia te i latou le faamaoniga tauatua ma o i latou e ou le faalapotopotoga ua faamaonia a le Pule Silisili Ese Aoao, o Ieova.

9. Aiseā e lē afaina ai pe a faasagatau mai le lalolagi atoa ia i tatou?

⁹ Aua lava neʻi faagaloina: Ua ia i tatou le lagolagoina a le Atua Silisili ona Maualuga i le vateatea uma. O lea, o le ā le afaina pe a faasagatau mai ia i tatou le lalolagi ma ana ituaiga eseese uma o lotu ma vaega faapolotiki? Sa faapena foi le Alo e toatasi o le Atua sa faasagatau ia te ia le lalolagi uma, ma tatou te lē mamā e maua i tatou i lea lava tulaga. E pei ona ia fetalai i ona aposetolo: “Afai e ʻinoʻino mai le lalolagi ia te outou, ia outou iloa ua muamua ona ʻinoʻino mai ia te au, i lona ʻinoʻino ia te outou. Afai a ni tagata o le lalolagi outou, po ua alofa mai le lalolagi i ona tagata; a e le ni o le lalolagi outou, a ua ou filifilia outou nai le lalolagi, o le mea lea e ʻinoʻino ai le lalolagi ia te outou.”—Ioane 15:18, 19.

10. Mai le ā le puna e sau ai le tele o sauaga i Molimau, ma aiseā latou te lē mamā ai ona o lea?

¹⁰ Ua faapena foi ona onosaʻia e Molimau a Ieova sauaga i le lalolagi atoa ae aupito sili lava ona lauiloa i atunuu na o loo faia aʻe ai le mea ua taʻua o Kerisinetoma. O na sauaga mai Kerisinetoma e lē o faamaonia ai faapea o Molimau e lē o ni Kerisiano. Na i lo o lea, ua matuā faamaonia ma lagolagoina ai lo latou taʻua faapea o i latou o Kerisiano moni, o Molimau a le Atua ma le Tamā o Iesu Keriso, o lona suafa, o Ieova. Ona o i latou o Molimau a le Atua, ua lē mamā ai i latou pe a puapuagatia i latou i sauaga ona o na faiga faalotu. O le mea lea, o le apoapoaiga a le aposetolo o Paulo i Kerisiano o le uluai senituri ina ia aua neʻi mamā ua faatatauina moni lava i Molimau a Ieova i aso nei.—Tagai i le Filipi 1:27-29.

Le Tala Aupito Sili ona Lelei e Mafai ona Folafola Atu

11. E ala i le tauaveina o le igoa o Molimau a Ieova, aiseā e lē tatau ai ona tatou taofia le avea o soʻo o Iesu Keriso?

¹¹ Ua talia ma le lototele e Molimau a Ieova lo latou igoa i le faataunuuina o le folafolaga a Ieova i ona tagata o le feagaiga i le Isaia 43:10. Ae peitai, e lē o le uiga o lenei mea, faapea ua latou lē o toe mulimuli ia Iesu Keriso. O Iesu o lo latou Taʻitaʻi, o lē o lana faaaʻoaʻo lea o loo latou mulimuli ai. O ia lava o se molimau a Ieova. O le mea moni, o ia o le Molimau taʻitaʻi a Ieova.—1 Timoteo 6:13; Faaaliga 1:5.

12. O le ā le ituaiga o tala o loo talaʻia e Molimau a Ieova i le lalolagi aoao, ma aiseā?

¹² O le feau o loo talaʻia e nei Molimau a Ieova i le lalolagi aoao o le tala aupito sili lea ona lelei e leʻi faapea ona folafolaina. E leai se malo e mafai ona sili atu ona lelei mo le fanau a tagata na i lo o le Malo faa-Mesia lena na faavaeina e Ieova ina ia pule i luga o le lalolagi o le fanau a tagata, ina ia togiolaina i latou na ia auina mai ai lona Alo pele e toatasi. (Isaia 9:6, 7) O i latou o loo ʻaināina le lalolagi o ē o loo talaʻiina atu i ai le tala lelei o le Malo, ua tuuina atu nei i ai le avanoa e talia ai ma faamaonia ai ua aogā i ai le meaalofa o le ola e faavavau i le tulaga lelei atoatoa faaletagata i luga o le lalolagi parataiso.

13. Aiseā e mafai ai ona tatou mautinoa faapea o le Malo faa-Mesia o le pulega lea o le a aupito sili ona lelei, ma o le ā ua fautuaina ma le lē mamā e Molimau?

¹³ E moni, afai sa finagalo malie Iesu e oo i ai le maliu tiga ina ia togiolaina i latou o ē o le a avea ma ona tagatanuu, o le a mautinoa foi la lona tuuina atu ia i latou e leai lava se isi pulega na i lo o le mea aupito sili ona lelei. Ua tatou fautuaina mea faiola uma faaletagata i le lalolagi: Ia avea o se tagatanuu faamaoni, usiusitai o lena malo. Tatou te lē mamā i le malo lea ua tatou fautuaina atu ma le faamaoni i le fanau uma a tagata. Tatou te lē solomuli mai le talaʻiina o le Malo, e ui lava o lenei auala e mafai ona aumaia ai sauaga ia i tatou. E pei o le aposetolo o Paulo, e mafai e i tatou taitoatasi ona fai atu: “Ou te le mā i le tala lelei.”

14. E tusa ai o fetalaiga a Iesu, o le ā le lautele o le a talaʻiina atu i ai le tala lelei o le Malo i o tatou aso?

¹⁴ Na valoia e Iesu faapea o le talaʻiina o le tala lelei o le Malo o le a faia i le lalolagi atoa, ma o lenei valoaga lautele ua aofia ai le lalolagi atoa, sa tatau mo sea feau. (Mareko 13:10) Sa leʻi faatalatu o ia e valoia le talaʻiina o le Malo o Ieova i se tulaga aupito sili ona mamao—ioe, i tuluʻiga uma o le lalolagi. (Galuega 1:8) Sa silafia e Iesu faapea so o se mea lava e maua i ai tagata, o le a faia ai e ona soʻo faamaoni se taumafaiga moni ina ia oo atu ai ia i latou ma le tala lelei o le Malo.

15, 16. (a) O ai ua tatau ona oo atu i ai le tala lelei? (e) Aiseā o le a faataunuuina ai le galuega talaʻi e ui i sauaga mai le faalapotopotoga a le Tiapolo?

¹⁵ O tagata o loo ʻaināina le lalolagi i aso nei ua oo atu lona faitau aofai i le faitau afe miliona ma ua salalau atu i konitineta uma ma motu tetele o vasa. Peitai, e leai lava se tuluʻiga o le lalolagi ua mamao tele mo Molimau a Ieova e faia ai ni taumafaiga ina ia oo atu i ai ma le tala lelei. O le lalolagi ʻainā uma o le tulaga aao faafaatusa o Ieova le Atua. (Isaia 66:1) O mea faiola uma faaletagata o loo ʻaināina so o se vaega o ona tulaga aao ua tatau ona ausia e lenei feau o le faaolataga.

¹⁶ O le tala lelei i aso nei o se tala e faafiafiaina ai e uiga i le pulega tautupu ua uma ona faavaeina i aao o le Mesia. Sa silafia e Iesu faapea e ui lava i sauaga sili ona ogoogo mai i le faalapotopotoga a le Tiapolo, ae sa uunaia e le agaga o le Atua soʻo moni o le Mesia ina ia ō atu i tuluʻiga uma ina ia talaʻiina atu “lenei tala lelei o le malo” o se mea moni ua faavaeina e tatau ona . . . “i le atu laulau uma.”—Mataio 24:14.

E Lē Mā ia Iesu Keriso ma Ieova

17. (a) O le ā e lē mamā ai tagata tapuai moni? (e) O le ā le tulafono na faatu atu e Iesu i le Mareko 8:38, ma o le ā lona uiga?

¹⁷ Sa leʻi faatalatū le Atua Aupito Sili ona Maualuga i le tuuina atu o se suafa mo ia lava, o Ieova; e lē ao foi i ona tagata tapuai faamaoni ona mamā ona o lena suafa. E fiafia tagata tapuai moni e faalauiloa ma iloa i latou o ni ē e tuuina atu le tapuaiga lē vaevaeina ma usiusitai ia te ia. E faatatau ia te ia lava, na faatu atu ai e Iesu i luma le tulafono, po o le mataupu silisili, i le Mareko 8:38: “Auā ai sē mā ia te au, ma aʻu upu i lenei tupulaga mulilulua ma le agasala, e mā foi le Atalii o le tagata ia te ia, pe a sau o ia faatasi ma ana agelu paia i le mamalu o lona Tamā.” E faapena foi, so o se tasi o le a mā ona o le Atua ma le Tamā o le Alii o Iesu Keriso, o le a mā ma le tonu foi Ieova ona o tagata faapena. Ma so o se mea faiola o lē o le a mā ai Ieova ona o gaoioiga o ona ala lē faamaoni o le a lē tatau ona olioli o ia i le ola ai i so o se vaega o le nofoaga faalelagi pe i le lalolagi a le Atua.—Luka 9:26.

18. (a) Aiseā e ao ai ona mauaa upu a Iesu i le Mataio 10:32, 33 i o tatou loto ma mafaufau? (e) O le ā e tupu ia i latou o ē faafitia Iesu ma Ieova ona o le fefefe i tagata? (Aumai faaaʻoaʻoga e faavae i le faamatalaga i lalo.)

¹⁸ Seʻi mauaa i o tatou loto ma mafaufau upu o loo mulimuli mai a Iesu Keriso: “O lenei, ai se na te taʻutaʻu aʻu i luma o tagata, o aʻu foi ou te taʻutaʻuina o ia i luma o loʻu Tamā o i le lagi. Ai se faafiti foi ia te au i luma o tagata, ou te faafitia foi o ia i luma o loʻu Tamā o i le lagi.” (Mataio 10:32, 33; Luka 12:8, 9) I luga o lea lava faavae, so o se tasi o le a na faafitia le Atua ma o le Tamā o le Alii o Iesu Keriso o le a faafitia foi e Ia. O le a lē faitauina o ia e aogā e avea o se sui o le aiga ua avea ai Iesu Keriso o le Atalii matua. O le mea lea, o le a faaumatia ai o ia i le taimi atofaina a le Atua.b

19, 20. (a) Aiseā o le a leai se mea e mamā ai i latou o ē na tatalo ina ia faapaiaina le suafa o Ieova? (e) O le ā ua faataunuuina e tagata folafola lē matataʻu o le Malo, ma faatasi ai ma le ā le lagolagosua?

¹⁹ O le tatalo faaaʻoaʻo na aʻoaʻo e Iesu i ona soʻo o le a taliina ai: “Lo matou Tamā e, o i le lagi, ia paia lou suafa. Ia oo mai lou malo. Ia faia lou finagalo i le lalolagi, e pei ona faia i le lagi.” (Mataio 6:9, 10) Pe a tupu lena mea, o le a leai se mea e mamā ai soʻo alolofa o Iesu. O le a faamamaluina le suafa o Ieova, faapaiaina, e lē gata e le faitau miliona o loo ola nei o ē o le a lē manaomia ona oti, ae faapea foi ma le faitau afe miliona o le fanau a tagata o ē o le a ia toe valaauina mai i o latou tuugamau i le vaitaimi o le afe tausaga o le pulega a le Malo. O le a latou maua le avanoa e ola ai e faavavau i luga o le lalolagi parataiso.

²⁰ E aunoa ma le mā, ua mafai ai e nei tagata lē fefefe o ē folafola le tala lelei o le Malo ona faataunuuina se molimau faalekelope e ui lava i teteega mai le lalolagi ona o loo i o latou tua se malosi sili e lē mai tagata—le lagolagoina a agelu faalelagi. O lea, o Molimau a Ieova ua “matatau i le Atua, ma avatu ia te ia le viiga.”—Faaaliga 14:6, 7.

E Lē Mamā e Matataʻu i le Atua ma Avatu ia te Ia le Viiga

21. O le ā e lē o mamā Molimau a Ieova e faia, ma o le ā le iʻuga?

²¹ Ua faamaonia e Molimau a Ieova i latou lava e lē mamā e matataʻu i le Atua ma avatu ia te ia le viiga, e oo lava i le faaaogāina o lona suafa totino, o Ieova. O lenei mea ua iʻu ai i faamanuiaga lē mataʻua mo i latou. O nei faamanuiaga e o mai mai le faataunuuina faamaoni o folafolaga a le Atua Aupito Sili ona Maualuga. Maeu se faapaiaina ai o ia i lenei mea e avea o le Atua soifua moni e toatasi, le Pule Silisili o le Vateatea!

22. Aiseā o le a fesagaʻi ai Molimau a Ieova ma sauaga matuitui, ae o le ā le olioli o le a avea mo i latou?

²² I le lumanai o loo sau, o le a liliu ai malo faaletagata faasaga i pulega faalotu ma o le a tafiesea i latou uma lava—e aofia ai Kerisinetoma—mai le toe iai. (Faaaliga 17:16, 17) I le iʻuga, o le a fesagaʻi ai Molimau a Ieova ma se vaitaimi matuitui o sauaga mai elemeni faalelalolagi. O le a lē mafai ona tumau ma faasaoina i latou pe afai o le a lē faatasi ma i latou le Atua o le faavavau. Peitai o loo faatasi o ia ma i latou, ma o lea o le a olioli ai i latou e vaai atu i na fili tetee i le faa-Kerisiano, tetee ia Ieova ua soloiesea e lē toe iai e le Atua, o lē o loo tapuaʻi atu i ai Molimau ma le lē fefoifoiaʻi. Latou te lē toe puapuagatia i le mā ona o le faaalialia ma faaumatia e avea o ni fili o le pulega faatiokarate moni, ae o le a latou tofo i le olioli lē mataʻua i le vivii atu ia Ieova: “O le Atua oe mai le vavau e oo i le faavavau.”—Salamo 90:2.

23. Aiseā o le a leai ai se mea e mamā ai Molimau a Ieova, ma o le ā o le a iʻu i ai?

²³ O le a latou tuuina atu le mamalu i le Atua, le Tamā o Iesu Keriso, o lē ua ala ai ia te ia ona togiolaina le aiga faaletagata ina ia olioli i le ola e faavavau i le tulaga lelei atoatoa faaletagata ma le fiafia i se lalolagi parataiso. Maeu se Atua mamana ua faaali ai e Ieova o ia lava e ala ia Keriso Iesu! Maeu le matagofie ua faaalia ai e Ieova ia lava e avea o sē e faaaogā ma le atamai ma le alofa, a e lē o sē e faaaogāseseina lona mana malosi uma lava! Ua talafeagai ai lava, ona leai se mea e tatau ai ona tatou mamā ia te ia po o lona Alo pele e toatasi, o Iesu Keriso. Tatou te lē mamā e avea o ni ē folafola o le tala lelei faamamaluina, lea ua na tuuina mai i luma le mana manumalo uma lava o Ieova le Atua e ala ia Keriso Iesu, o lē na fetalai i itula mulimuli o lona soifuaga faalelalolagi: “Ia outou loto tetele, ua ou manumalo i le lalolagi.” (Ioane 16:33) I le uia o lenei auala, seʻi o tatou mulimuli uma i le faaaʻoaʻoga a le aposetolo o Paulo, o lē sa leʻi mā lava i le tala lelei. Afai tatou te faia lena mea, o le a lē mā foi le Atua e Ona le Malosi Uma lava ia i tatou.

[Faaopoopoga i lalo]

Fesili mo le Autaluga

◻ I le pei o le aposetolo o Paulo, o le ā le faalogona e ao ona ia i tatou e tusa ai ma le folafolaina atu o le tala lelei, ma aiseā?

◻ Aiseā ua avea ai le feau o loo folafola e Molimau a Ieova o le tala e sili ona lelei sa leʻi faapea ona iai?

◻ O le ā le lapataiga na tuuina atu e Iesu e uiga i so o se tasi o lē o le a mā ona o ia pe a afio mai i le mamalu o le Malo?

◻ O le ā e tupu ia i latou o ē faafitia Iesu ma Ieova?

◻ O le ā ua mafai ona faataunuuina e ē folafola le tala lelei e aunoa ma le mamā, ma aiseā?