Filemu—O ā ni Avanoa?

E UI lava i ulutala i nusipepa, ae o le mea moni e faapea, e pei ona iloa e le toatele o i tatou, o loo matuā mamao lava le fanau a tagata mai le filemu moni. O le aveesea o ʻautau a atunuu mai Afekanisitana sa leʻi aumaia ai le filemu i lena atunuu. Ma o loo iai pea feteenaiga a lea ituaiga ma le isi ituaiga i Filipaina, Sutana, Isaraelu, Aialani i Matu, Lepanona, ma Sri Lanka, ua na o ni nai nuu na ua taʻua.

Ona o le toatele o tagata e lelei mafaufau latou te mananao i le filemu na i lo taua, aiseā la ua soona faigata ai ona maua le filemu? Ua tele senituri o taumafai le au fai polotiki i auala eseese ina ia aumaia le filemu, ae e lē o taulau pea a latou taumafaiga. Aiseā? Seʻi o tatou vaai i ni nai faaaʻoaʻoga ma iloa ai.

Filemu e Ala i le Lotu ma le Tulafono

Ua manatu nisi i le Emepaea o Roma e avea o se taumafaiga manuia i le faia o le filemu. I lalo o lea Emepaea, sa faavaeina ai ni tulafono eseese, se pulega lautele, ʻautau malolosi, atoa foi ma auala fuafuaina lelei na sa mafai ai ona tausia se tulaga mautu faavaomalo sa lauiloa o le Pax Romana (Filemu a Roma) i luga o vaega tetele o Asia i Sisifo, Aferika, ma Europa. Peitai, mulimuli ane, na lolo atu ai le Emepaea o Roma i le iʻuvale i totonu o le atunuu ma osofaiga mai fafo, ma na malepe ai i lalo le Filemu o Roma.

Ua faataʻitaʻia ai i lenei mea se upu moni faanoanoa e uiga i taumafaiga faaletagata. Ina ua mavae se uluai amataga faamoemoeina, e masani lava ona latou oo i se tulaga leaga. Na fetalai le Atua lava ia: ‘O manatu o loto o tagata ua leaga e afua mai ina o tamaiti,’ ma o lenei manatu leaga e masani lava ona manumalo i le faagasologa o taimi. (Kenese 8:21) E lē gata i lea, na faapea mai foi le perofeta o Ieremia: “E sili le faaʻoleʻole o le loto i mea uma, ma ua matuā leaga lava; po o ai na te mafaia ona iloa?” (Ieremia 17:9) E lē mailoa tagata. O faanaunauga lelei i se tasi tagata e mafai ona faaliliuina ona o le loto leaga po o faanaunauga fiasili manatu faapito o isi. Po o se pule e maualuga le pulea e mataupu silisili, e mafai ona oo ina iʻuvale o ia lava. I le manatu atu i lenei tulaga, e mafai faapefea la e tagata ona aumaia le filemu?

I le senituri lona tolu T.L.M., na lipotia mai se taumafaiga mataʻina i le faia o le filemu mai le atunuu toetoe lava pei se konetineta, o Initia. I inā, na faatuina ai e le tupu malosi e igoa ia Aśoka se emepaea matuā tele lava e ala i taua ma le toto masaa. E tusa ai ma le faamaumauga, ona faaliliuina ai lea o ia i aʻoaʻoga faa-Puta. I le lafoaia o taua, na ia faatutuina ai ni faatagata faamanatu tetele i lona malo atoa, na vaneina ai upu ina ia fesoasoani ai i tagatanuu o lona malo ia ola i ni olaga lelei. Ma sa foliga mai e mautinoa lava le filemu ma le talaulau o lona emepaea.

Pe o le auala a Aśoka o le ala lea i le filemu? E faanoanoa lava, ona e leai. Ina ua maliu le emeperoa, na uma faatasi atu ai lava ma lana filemu, ma na nutililia lona emepaea. Ua faaalia ai i lenei mea faapea, e oo lava i taumafaiga a se pule mafaufau lelei ma le tomai, e iʻu lava ina faaleaogāina auā e tatau ona oti o ia. Na taʻua e le tusitala o le Failauga lenei faafitauli ina ua ia tusi: “Na ou ʻinoʻino foi i aʻu galuega uma ua ou tiga ai . . . auā ou te tuuina ia mo le tagata e nofo mai pe a mavae atu aʻu; o ai foi se na te iloa po o se tagata poto, po o se vale ia? a e pule o ia i aʻu galuega uma ua ou tiga ai, ma ou faia i loʻu poto i lalo o le la. O le mea faatauvaa foi lea.”—Failauga 2:18, 19.

Ioe, o le oti o le tagata, o se toʻatugā sili lea ua lē agavaa ai i lona aumaia o le filemu tumau. Ua mautinoa ai lava le poto o le fautuaga a le faisalamo e tusa ai ma lenei mea: “Aua tou te faatuatua i alii, po o le fanau a tagata, e le o i ai se olataga. E alu ese lona agaga, e foi atu i le eleele na i ai o ia; e faaumatia i lea lava aso ona manatunatu.”—Salamo 146:3, 4.

Taumafaiga Atili i le Filemu

Ua faapena ona faataʻitaʻia i isi taumafaiga a le tagata le pogai ua lē taulau ai i ana taumafaiga e aumaia le filemu. Mo se faaaʻoaʻoga, i lona sefulu o senituri, na mafua mai ai i Europa se gaoioiga na taʻua o le Filemu o le Atua. Na fuafuaina ina ia puipuia mea totino a le lotu, na tuputupu aʻe i se ituaiga o maliega ua lē toe manao e fai ni taua, o lea, i le ogatotonu o lona 12 o senituri, na salalau atu ai i le tele o vaega o Europa.

O se isi manatu fou ua faaupuina o le “paleni o le malosi.” I le mulimuli ai i lenei aiaiga, o faiga faalenuu a atunuu—e pei o Europa—ua faalotovaivaia ai taua e ala i le tausisia o le vaevaeina, pe tele pe itiiti le tulaga paleni o le malosi i ona setete. Pe afai e faamataʻuina e se malo malosi se malo vaivai, ona faia lea e se malo malosi se faauoga ma lea malo vaivai mo se taimi lē tumau ina ia faavaivaia ai le agaga fia fai taua o le a iai. O lenei aiaiga na taʻitaʻiina ai fesootaiga a Europa mai le iʻuga o Taua faa-Napoleone seia oo atu i le pasae aʻe o le taua muamua a le lalolagi i le 1914.

Ina ua mavae lena taua, na faatuina ai Malo Sosoo e avea o se fono o i inā o le a mafai ai e malo ona talanoaina o latou eseesega na i lo o le fetauai ai. Sa taofia le galueaiina o le Sootaga lea ina ua pa le taua e lua a le lalolagi, ae ina ua uma le taua, sa toe olaola lona agaga i Malo Aufaatasi, lea o loo iai pea.

Ae peitai, ua lē taulau nei taumafaiga uma i le aumaia o le filemu moni po o le filemu tumau. A o faia pea gaoioiga o le Filemu o le Atua i Europa, sa tau ai tagata Europa ma Mosalemi i Taua Paia faamasaa toto. Ma a o taumafai tagata faipolotiki e faasaoina le filemu i Europa e ala i le faapaleniina o le malosi, sa latou sii atu taua ma fausia emepaea i atunuu i fafo atu o Europa. Sa lē mafai e Malo Sosoo ona taofia le taua lona lua a le lalolagi, ma sa leʻi mafai e Malo Aufaatasi ona taofia fasiotiga mataʻutia o tagata i Kamupesia po o fefaloaiga i nofoaga e pei o Korea, Nikeria, Vietiname, ma Sāʻia.

Ioe, e oo mai i le taimi nei, ua matuā lē taulau taumafaiga aupito sili ona lelei a le au faipolotiki mo le faia o le filemu. Ua na o le lē iloa e taʻitaʻi pe faapefea ona faia se filemu tumau, ua taofia lava i latou e pei ona iai ona o le oti ma o latou lava lē taulau faaletagata faapea foi ma isi. E tusa lava pe afai sa lē o lena le mafuaaga, ae ui i lea, e lē mafai lava e le au faipolotiki ona aumaia le filemu. Aiseā e lē mafai ai? Ona o se isi toʻatugā e matuā faigata moni lava.

Se Malosi Natia o loo Taofia le Filemu

Ua tautala le Tusi Paia i lenei toʻatugā ina ua ia faapea mai: “O le lalolagi uma o loo nofo toilalo i loo leaga.” (1 Ioane 5:19) O lē loo leaga o Satani le Tiapolo, o se meafaiola agaga e sili atu lona malosi i tagata, e sili mamao atu lona malosi na i lo o i tatou. Mai lava i le amataga, ua aafia ai Satani i le fouvalega, pepelo, ma le fasioti tagata. (Kenese 3:1-6; Ioane 8:44) O ana taaʻiga malolosi i mataupufai a le lalolagi, e ui ina natia, ae ua faamaonia mai e ala i faamatalaga faagaeeina. Na taʻua o ia e Paulo o le “atua o le lalolagi nei,” “le taʻitaʻi o le au faipule i le va nimonimo.” (2 Korinito 4:4; Efeso 2:2) E sili atu i le faatasi ona taʻua o ia e Iesu o “le alii o lenei lalolagi.”—Ioane 12:31; 14:30; 16:11.

Talu ai o loo nofo toilalo le lalolagi i le mana o Satani, e matuā leai ai lava se faamoemoe faapea o le a aumaia e tagata faipolotiki se filemu tumau. Pe o le uiga ea o le a lē oo mai lava le filemu? Pe mafai e so o se tasi ona taʻitaʻiina atu le fanau a tagata i le filemu?

[Faamatalaga faaopoopo i le itulau 5]

Po o le ā lava le atamai po o le maualuga o mataupu silisili a se taʻitaʻi, ae e iʻu lava ina maliu o ia, ma e masani lava ona suia e isi tagata e leai se tomai ma e lē pulea e ni mataupu silisili

[Faamatalaga faaopoopo i le itulau 6]

O le toʻatugā aupito sili e tasi i le filemu, o Satani le Tiapolo

[Ē Ana le Ata i le itulau 5]

Le ata a le U.S. National Archives