Faasaoina le Lalolagi mai le Faaleagaina

E FAATASI lava i aso ua mavae i le talafaasolopito o le tagata, na faasaoina ai e le Atua le lalolagi mai le faaleagaina i lima o tagata. Na ia faia faapea e ala i se lolo faalekelope i aso o Noa. E leai se faamaumauga o ia i tatou faapea na faaleagaina e tagata le siosiomaga faitino i tuā i inā. Ae sa faaleagaina le lalolagi i se isi auala i se tele na oo ai loa ina finagalo le Atua e manaomia ona gaoioi i se tulaga aupito sili e mafai ai.

Ua lipotia mai e le Tusi Paia: “Ua leaga lava le lalolagi i luma o le Atua, ma ua tumu le lalolagi i le saua. Ua silasila mai le Atua i le lalolagi, faauta foi, ua leaga lava; auā o tagata uma ua leaga ia i latou a latou amio i le lalolagi.” (Kenese 6:4, 11, 12) Ioe, i aso o Noa na silasila ai le Atua ua faaleagaina le lalolagi ona o le sauā ma le amio leaga a le fanau a tagata.

E faapena foi, ina ua amata ona nonofo tagata o Isaraelu anamua i le Nuu o le Folafolaga, na lapatai atu le Atua: “Aua neʻi leaga ia te outou le laueleele tou te i ai; auā o le toto o le mea lava lea e leaga ai le laueleele; . . . Aua neʻi leaga ia te outou le laueleele.” (Numera 35:33, 34) O lea, na faaleagaina ai Kanana ona ua nofosala i le toto tagata na ʻaināina. O se faaaʻoaʻoga sili ona leaga o lenei mea o lo latou faataulagaina o a latou fanau iti i o latou atua.

Sa matuā lē mamā foi tagata Kanana i a latou amio, ma o lenei foi mea na aafia ai le silafaga a le Atua i le laueleele. Na ia lapataia Isaraelu: “Aua lava neʻi leaga outou ia te outou i se tasi mea o ia mea [faiga o amioga lē mamā]; auā o mea uma lava ia ua leaga ai nuu ou te tulia i o outou luma. Ua leaga ai foi le laueleele; . . . e luai mai lava e le laueleele i e o nonofo ai.” (Levitiko 18:24, 25) O le lē mamā tau amio ma le faamasaatoto na faaleagaina ai Kanana i le tele, na oo ai loa ina faaumatia e le Atua nuu o Kanana.

Le Faaleagaina o le Lalolagi

Ae faapefea i aso nei? Pe ua tatou lē o ola ea foi i se tupulaga o le lē pulea o le sauā, faamasaatoto, ma le lē mamā tau amio? E ui lava i mea ua faia e le tagata e taumafai ai e faaleleia mea na ia faaleagaina o le lalolagi faitino, ae na te lē toe mafai lava ona faafoisia i le ola le faatatau e tusa ma le selau miliona o ē na maliliu i ana taua i lenei senituri; e lē mafai foi ona ia toe faafoi maia le faitau miliona na fasiotia e tagata fasioti tagata po o le lē mafaitaulia o tagata faanoanoa o ē na maliliu i le fia taumamafa. E mautinoa, e lē mafai ona ia toe faafoisia le faatatau e tusa ma le 40 i le 60 miliona pepe e leʻi fananau mai o ē na faamutaina o latou ola ona o le faapaʻū tama i tausaga taitasi. Pe tatou te faaletonu i le manatu faapea i le silafaga a le Atua, ua faaleagaina le lalolagi ona o na mea—ae lē o taʻua ai le lē mamā tau amio ua salalau atu i aso nei?

Ua taʻu mai e le mafuaaga ia i tatou le tatau ona vave gaoioi le Atua ina ia faasaoina le lalolagi mai gaoioiga a le tagata ua faaleagaina ai, ma ua faamautinoa mai e le valoaga a le Tusi Paia lenei mea. Ae o le ā o le a ia faia? Ua faapea mai le Tusi Paia o le a ia faia ina ia “fano ai foi i latou o e na fano ai le lalolagi.” (Faaaliga 11:18; faatusatusa Mataio 24:3-14.) E pei ona teena e se tagata e ona se fale mautotogi se tagata mautotogi o lē e faaleagaina le fale, o le a faapena foi i le Atua ona “teena” i latou o ē faaleagaina lana foafoaga matagofie, le lalolagi.

Ua taʻua e le Tusi Paia: “A e vavaeeseina o e amio leaga ai le laueleele, e liaiina ai foi o e amio pepelo.” (Faataoto 2:22) O lenei gaoioiga tauatua o loo sau ua taʻua e le Tusi Paia o Amaketo. (Faaaliga 16:16) Na taʻua foi e Iesu lea mea o le “puapuaga tele, e leai sona tusa talu le amataga o le lalolagi, ua oo lava i ona po nei; e le toe faapea foi amuli.” (Mataio 24:21) O le a sili atu ona telē na i lo o le Lolo.

Pe o se faaiʻuga soonafai pe ua lē tonu lenei? E leai, o le Atua, i le avea o Lē na Foafoaina le lalolagi, ua ia te ia le aiā e filifili ai po o ai o le a ʻaināina. Ua ia te ia foi le aiā e tuuaʻia ai le tagata mo ana gaoioiga. E lē gata i lea, afai e faataga e le Atua le tagata e faaauau pea ana gaoioiga e aunoa ma le siakiina, o le a faaleaga la le lalolagi mo tagata uma lava, ma o le a faafaigata ai ona maua le ola. I le isi itu, e ala i le ‘faafanoina o i latou ua fano ai le lalolagi,’ ua faasaoina ai e le Atua lo tatou tofi faalelalolagi mo ē latou te talisapaia. Ua folafola mai e le Tusi Paia: “Auā o e amio saʻo, latou te mau i le nuu; ma e ua sao a latou amio, e faatotoeina ai i latou.”—Faataoto 2:21.

Faatasi ai ma le fesoasoani a le Atua, ua maua ai e le faitau miliona le malosi e faaalia ai i latou lava e lē ponā ona latou te mananao e faatotoeina i latou ina ia olioli i le foafoaga a le Atua. Ua latou mulimuli foi i tulaga sili ona maualuluga tau amio a le Atua ma alofia ai le sauā ma le nofosala i le toto e oo lava i ni tulaga lē tuusaʻo. O lea, ua lē avea ai i latou o ni ē fano ai le lalolagi i lenei uiga tāua.

Se Lalolagi ua Faasaoina mai le Faaleagaina

Ua iai nei ia i latou na se faamoemoe olioli o le vaai ua faaliliuina le lalolagi mai lona tulaga faaleagaina o loo iai i le taimi nei i se parataiso malōlōina. Ioe, e oo lava i o latou tino o le a faamamāina, faia ina ia lē filogia i āuga e faaleagaina ai o le agasala. Ua faamatalaina e le tusi mulimuli o le Tusi Paia le sauniuniga a le Atua mo le faia ina ia maua nei mea uma i le avea o se “vaitafe manino o le vai o le ola” faafaatusa. I itu taitasi o lenei vaitafe, o loo iai “laau o le ola, o loo fua mai i fuata e sefulu ma le lua, e taitasi le masina ma fua mai ai lona fuata; o lau foi o le laau e faamalolo ai nuu.”—Faaaliga 22:1, 2.

O lenei vaaiga faagaeeina o se faamaoniga faapea o le a faasaoina e le Atua le lalolagi ma le fanau a tagata o iai mai le faaleagaina. Ua aumaia e isi valoaga se vaaiga puupuu auiluma o lena lalolagi toe faafoisia. Mo se faaaʻoaʻoga, seʻi manatu i le uluai vaaiga mo le lumanai na fatu faasolo e Isaia: “E olioli ona o i latou le vao lafulafua, ma le nuu naumati; e fiafia le toafa, ma fua mai e pei o le aute. E fua tele mai lava ia, e fiafia foi ma le fiafia tele, ma le alaga.” (Isaia 35:1, 2) I lena taimi o le a leai ni sami ua polusioneina, se eleele ua faaleagaina, po o se atemosifia ua faaoonaina.

E sili ona tāua, ona o le a lē faaleagaina le lalolagi i le sauā, le faamasaatoto, po o amioga lē mamā. E na o i latou o ē faaaloalo i le Atua, ana tapulaa, ma lana foafoaga o le a iai i inā. (Faaaliga 21:7, 8) Seʻi faalogo nei i iʻuga mamalu o nei mea uma: “E sōloiesea foi e le Atua loimata uma i o latou mata; e leai foi se toe oti, po o se faanoanoa, po o se aue, e leai foi se toe puapuaga; auā ua mavae atu mea muamua. . . . Faauta, ou te faia ia fou mea uma lava.”—Faaaliga 21:4, 5.

Maeu se iʻuga fiafia! Maeu so tatou fiafia ona e lē o toe umi ae faia e le Atua ina ia “fano ai foi i latou o e na fano ai le lalolagi”! Ma maeu le tele ua uunaia ai i tatou e nei folafolaga faagaeeina ina ia mananao e auauna i le Atua, o lē o le a na faasaoina le lalolagi mai le faaleagaina ma faia o se aiga parataiso mo le fanau a tagata loto faamaoni!

[Faamatalaga faaopoopo i le itulau 6]

Ua faapea mai le Tusi Paia o le a faia e le Atua ina ia “fano ai foi i latou o e na fano ai le lalolagi.”—Faaaliga 11:18