“Ina Tofotofo ia Outou ia te Outou po ua Outou i le Faatuatua”
Mea Tāua mai le Tusi e Lua ia Korinito
SA MANATU mamafa le aposetolo o Paulo e uiga i Kerisiano i Korinito. O le ā so latou manatu i le fautuaga na tuuina atu i lana uluai tusi ia i latou? Sa iai o ia i Maketonia ina ua taunuu Tito ma se lipoti fiafia faapea o le tusi sa faanoanoa ai tagata Korinito ma oo ina salamō. Maeu le faaolioliina ai o Paulo ona o lena mea!—2 Korinito 7:8-13.
Na tusi e Paulo le Lua Korinito mai Maketonia, pe atonu ina ua mavae le ogatotonu o le tausaga i le 55 T.A. I lenei tusi, sa ia talanoaina ai laasaga e faia ina ia tausia ai le mamā o le faapotopotoga, atiina aʻe ai se faanaunauga ina ia foai atu ni meaalofa i tagata talitonu o iai le manaoga i Iutaia, ma puipuia lona tulaga faaaposetolo. O le tele o mea na fai atu ai Paulo ua mafai ona fesoasoani ia i tatou e ‘tofotofoina ai pea pe o tatou i le faatuatua.’ (13:5) O lea, o le ā e mafai ona tatou aoaoina mai lenei tusi?
Le Faifeau mo le Atua o Faamafanafanaga
Na faaalia e le aposetolo o Paulo faapea a o faamafanafanaina i tatou e le Atua i o tatou puapuaga uma, e ao ai ona tatou faamafanafana atu i isi ma tatalo mo i latou. (1:1–2:11) E ui lava sa iai Paulo ma ana aumea i lalo o omiga matuā sili, ae na laveaiina i latou e le Atua. Peitai, sa mafai ona fesoasoani tagata Korinito faatasi ai ma tatalo e fai ma sui o i latou, e pei foi ona ao ona tatou tatalo mo isi o ē o talia fiafia le faatuatuaga moni. Peitai ae faapefea e uiga i le tagata amioleaga o loo taʻua i le 1 Korinito mataupu 5? E manino mai sa faateʻaina o ia ae na salamō. Maeu le tatau ona faamafanafanaina o ia ina ua faalautele atu e tagata Korinito le faamagaloga ma toe faafoisia ai ma le alofa o ia ia te i latou.
Ua mafai e upu a Paulo ona faateleina lo tatou talisapaia mo le faiva faa-Kerisiano, o lea ua faamalosia ai lo tatou tulaga mo le faatuatuaga moni. (2:12–6:10) Ioe, o faifeau o le feagaiga fou ua faaeaina e auai i le “solo manumalo” faatasi ma le Atua o loo taʻimua! Sa maua e Paulo ma ona uso galulue le oloa o le faiva ona o le alofa tunoa na faaalia ia i latou. I le pei o i latou, ua maua ai foi e i latou faauuina i aso nei le faiva o le leleiga. Peitai, ua faaoaina e Molimau a Ieova isi uma e ala i la latou faiva.
Ia Faaatoatoaina i le Faapaiaina ma ia Matamau
Ua faaalia e Paulo ia i tatou faapea o faifeau Kerisiano e tatau ona atoatoa i le faapaiaina i le mataʻu ia Ieova. (6:11–7:16) Afai e manaomia ona tatou tutumau i le faatuatua, e tatau ona tatou alofia le amo faalegatasi ma ē lē talitonu ma e manaomia ona faamamāina i tatou mai mea e leaga ai i le itu faaletino ma i le itu faaleagaga. Sa faia e tagata Korinito se gaoioiga o le faamamāina e ala i le faateʻaeseina o le tagata fai mea sese lē mamā, ma sa olioli Paulo faapea o lana uluai tusi sa faanoanoa ai i latou ma iʻu ai i le salamō mo le faaolataga.
Ua tatou aʻoaʻoina foi faapea o faifeau matataʻu i le Atua ua tauia mo lo latou lima foai. (8:1–9:15) E faatatau i meaalofa tauofo mo “tagata paia” o ē ua matitiva, na siitia mai ai e Paulo se faaaʻoaʻoga lelei a tagata Maketonia. Sa lima foai i latou i tala atu o mea sa latou maua, ma sa ia faamoemoe e vaaia lea lava ituaiga lima foai i le vaega a tagata Korinito. O a latou foai—ma a tatou foi—e tatau ona sau mai le loto, auā “e alofa le Atua i e foai ma le loto malie” ma ua faaoaina ai ona tagata mo so o se ituaiga o foai.
O Paulo—O se Aposetolo e Manatu Mamafa
Pe a tatou faataunuuina so o se mea i le auaunaga ia Ieova i le avea ma faifeau, seʻi o tatou mitamita ona o ia, ae lē ona o i tatou. (10:1– 12:13) I lo mea uma lava, e na o auupega faaleagaga e “faamalosia e le Atua” e mafai ona liliuina ai mafaufauga sese. E lē taitai ona mafai ona faatusaina “aposetolo silisili” mitamita i totonu o tagata Korinito i faamaumauga o le tumau o Paulo i le avea o se faifeau a Keriso. Peitai, ina neʻi matuā faamaualuga o ia, o lea sa lē aveesea ai e le Atua “le mea matuitui i le tino” sa ia te ia—atonu po ua lē lelei lana vaai po o na aposetolo pepelo. Sa sili ia Paulo ona mitamita i lona vaivai ina ia tumau ai pea “le mana o le Atua” i ona luga e pei o se faleie. I le avea o se tagata o lē na tumau i le faatuatua, sa leʻi faamaonia e ia lona itiiti ifo i aposetolo silisili pepelo. Sa iloa e tagata Korinito faamaoniga o le tulaga faaaposetolo o Paulo na tuuina atu ia i latou “e ala i faailoga ma vavega ma mea mamana.”
I le avea o se faifeau ma o se aposetolo, sa teu i le loto o Paulo faanaunauga faaleagaga o uso talitonu, e pei foi ona tatau ona ia i tatou. (12:14–13:14) O le a ‘sili ona fiafia o ia e faauma ana mea ona o o latou solu.’ Peitai sa fefe Paulo ona i lona taunuu atu i Korinito, o le a ia maua ai nisi o ē o le a lē salamō i galuega o le tino. I lea, na ia apoapoai atu ai ia i latou uma ina ia tumau pea ona tofotofoina i latou pe o iai i le faatuatua ma tatalo faapea latou te “le o faia se mea leaga.” I le faaiʻuga, na ia uunaia ai i latou ina ia olioli, ia suia ma ia faamafanafanaina, ina ia tonu le manatu, ma ia nonofo fifilemu. Maeu se fautuaga lelei mo i tatou foi!
Ia Tofotofo Pea!
I le tusi lona lua a Paulo i Kerisiano i Korinito o lea ua fautuaina ai auala eseese e tofotofoina ai pea pe o tatou iai i le faatuatua. O ana upu e mautinoa lava e ao ona uunaia ai i tatou e faamafanafana atu i isi, e pei lava ona faamafanafanaina i tatou e le Atua i o tatou puapuaga uma. O le mea na fai mai ai le aposetolo o Paulo e uiga i le faiva faa-Kerisiano e ao ona uunaia ai i tatou e faia ma le faamaoni a o faaatoatoaina lo tatou faapaiaina i le mataʻu ia Ieova.
O le faatatauina o le fautuaga a Paulo ua lelei mo i tatou ona sili atu ai ona lima foai ma fesoasoani. Peitai, o ana upu e ao ona uunaia ai i tatou e mitamita ia Ieova, ae lē o i tatou lava. E ao ona latou faamaualugaina lo tatou alofa ma le manatu mamafa mo o tatou uso talitonu. Ma e mautinoa lava o nei mea ma isi foi manatu i le tusi lona Lua a Korinito ua mafai ona fesoasoani ia i tatou e ‘tofotofoina ai pea pe o tatou iai i le faatuatua.’
[Pusa/Ata i le itulau 26]
FAAATAGIA LE MAMALU O IEOVA: Ina ua alu ifo Mose nai le Mauga o Sinai ma papa maa o le Tulafono, sa pupula mai le paʻu o ona fofoga, ona sa fetalai le Atua ma ia. (Esoto 34:29, 30) Na taʻua e Paulo lenei mea ma faapea mai: “A o i tatou uma, o loo vaavaai i tatou i le pupula o le Alii e peiseai o i se faata, ma o tatou mata e lē ufitia, na liua ai i tatou ua foliga i ai nai le pupula e oo i le pupula, faapei ona mai le Alii [Ieova] le agaga.” (2 Korinito 3:7-18) O faata e ʻuʻu i lima anamua sa faia i ni metala e pei o le apamemea po o le kopa ma sa matuā polesiina faaiila ina ia lelei ona maua ai se ata. I le pei o faata, ua faaatagia ai e i latou uma faauuina le mamalu o le Atua lena ua susulu atu ia i latou mai ia Iesu Keriso, ua agaʻi atu ai ina ‘faaliliuina i latou ia foliga i ai’ na maua mai i le Alo o Ieova e faaatagia ai le mamalu. (2 Korinito 4:6; Efeso 5:1) E ala i le agaga paia ma tusi, ua faia ai e le Atua i totonu o i latou “se tagata fou,” e atagia mai ai ona lava uiga. (Efeso 4:24; Kolose 3:10) Tusa lava pe o lo tatou faamoemoe e faalelagi pe faalelalolagi, ae seʻi o tatou faaalia lena uiga ma ia faapelepele i le faaeaga o le faaatagia o le mamalu o le Atua i la tatou faiva.
[Pusa/Ata i le itulau 27]
“AUUPEGA O LE AMIOTONU”: O le tasi o auala na fautuaina ai e Paulo ma ana aumea i latou lava i le avea ma faifeau a le Atua sa “ala i auupega o le amiotonu i le lima taumatau ma le lima tauagavale.” (2 Korinito 6:3-7, NW) O le lima taumatau sa faaaogā e liai ai le pelu, ma o le lima tauagavale e taofia ai le talitā. E ui lava sa osofaia mai i itu uma, ae sa faaauupegaina Paulo ma ona uso galulue e sii atu se taua faaleagaga. Sa siitaua atu faasaga i aʻoaʻo ma “aposetolo silisili” pepelo ina ia lē taʻitaʻieseina ai le faapotopotoga Kerisiano mai le tuutoina ia Keriso. Sa leʻi faaaogāina e Paulo auupega o le tino agasala,—le faaʻoleʻole, taufaasese, po o le faitogafiti. (2 Korinito 10:8-10; 11:3, 12-14; 12:11, 16) Na i lo o lea, “o auupega” sa faaaogāina o le amiotonu, po o le faamasinotonu, o lona uiga e mo le faalauteleina atu o le auala o le tapuaiga moni faasaga i osofaiga uma. Ua faaaogā ai nei e Molimau a Ieova na “auupega o le amiotonu” mo lea lava fuafuaga.