O le Aso Lenei o le Faaolataga!

“Faauta, o lenei le tausaga e talileleia mai ai; faauta, o lenei le aso e faaolaina ai.”—2 KORINITO 6:2.

1. O le ā e manaomia mo se tulaga faamaonia ma le Atua ma Keriso?

UA FAATULAGA e Ieova le aso mo le faamasinoga o le fanau a tagata. (Galuega 17:31) Afai o lena aso o le faaolataga lea mo i tatou, e manaomia la ona iai so tatou tulaga faamaonia ma ia ma lana Faamasino tofia, o Iesu Keriso. (Ioane 5:22) O lena tulaga e moomia ai le amioai e ogatusa ma le Afioga a le Atua ma se faatuatua e uunaia ai i tatou e fesoasoani atu i isi ina ia avea ma soo moni o Iesu.

2. Aisea ua faaesea ai le lalolagi o tagata mai le Atua?

² Ona o le agasala tuufaasolo, ua faaesea ai le lalolagi o tagata mai le Atua. (Roma 5:12; Efeso 4:17, 18) O lea, o i latou o loo tatou talaʻi atu i ai e faatoʻā mafai ona latou maua le faaolataga pe a iai sa latou leleiga ma ia. Sa faamanino mai e le aposetolo o Paulo lenei manatu ina ua ia tusi atu i Kerisiano i Korinito. Seʻi o tatou iloiloina le 2 Korinito 5:10–6:10 ina ia vaai po o ā upu a Paulo e faatatau i le faamasinoga, le leleiga ma le Atua, ma le faaolataga.

‘Ua Tatou Pulunaunau Atu Pea i Tagata’

3. Aisea sa ‘pulunaunau atu ai pea [Paulo] i tagata,’ ma aisea e tatau ai ona tatou faia lenei mea i aso nei?

³ Na faafesootai e Paulo le faamasinoga ma le talaʻiga ina ua ia tusi mai: “Tatou te tutū atu uma lava i luma o le nofoa faamasino o Keriso, ina ia taitasi ma talia le mea e tatau ai e tusa ma lana amio na faia i le tino, pe lelei pe leaga. O lenei, ona ua matou iloa le mataʻu i le Alii, ua matou pulunaunau atu ai i tagata.” (2 Korinito 5:10, 11) Sa ‘pulunaunau atu pea le aposetolo i tagata’ e ala i le talaʻia o le tala lelei. Ae faapefea i tatou? Talu ai ua tatou tulata atu i le iuga o lenei faiga amioleaga o mea, e tatau ai ona tatou faia le mea sili tatou te mafai e uunaia ai isi e uia laasaga manaomia ina ia maua ai se iuga lelei faafaamasinoga mai ia Iesu ma le finagalo malie o le Puna o le olataga, o Ieova le Atua.

4, 5. (a) Aisea e lē tatau ai ona tatou mitamitavale i ni mea ua mafai ona tatou ausia i le auaunaga a Ieova? (e) Na faapefea ona mitamita Paulo “ona o le Atua”?

⁴ Peitai, afai ua faamanuia e le Atua la tatou faiva, e lē tatau la ona tatou mitamitavale. I Korinito sa iai nisi sa faalialiavale ia i latou lava pe i nisi tagata, ma faapogaia ai fevaevaeaiga i le faapotopotoga. (1 Korinito 1:10-13; 3:3, 4) I le tau faaātaāta atu o se manatu i lenei mataupu, na tusi atu ai Paulo: “Auā e le toe taʻuleleia matou e i matou ia te outou, a ua matou avatu ia te outou se mea tou te mitamita ai ona o i matou, ina ia ia te outou se mea e fai atu ai i e o mitamita i mea e vaaia, a e le o le loto. Auā pe afai ua matou vālea, ona o le Atua lea; pe afai ua matou atamamai, ona o outou lea.” (2 Korinito 5:12, 13) Sa lē fia lagolagoina e i latou na faafefeteina, le autasi ma le lelei faaleagaga o le faapotopotoga. Sa latou mananao e mitai atu mea e vaaia na i lo le fesoasoani i uso talitonu e ati ae ni loto lelei i luma o le Atua. O lea, na aoaia ai e Paulo le faapotopotoga ma faapea atu mulimuli ane: “O lē mitamita, ia mitamita o ia i le Alii.”—2 Korinito 10:17.

⁵ Pe na lei mitamita ea Paulo? Atonu o le manatu lena o nisi ona o mea sa ia taʻua e faatatau i lona avea o se aposetolo. Ae sa ia mitamita “ona o le Atua.” Sa ia mitamita i ona tofiga o se aposetolo, ina ia taofia ai uso i Korinito i le liliu ese mai ia Ieova. Sa faia faapea e Paulo ina ia toe taʻitaʻiina mai ai i latou i le Atua, talu ai sa taitaiseseina i latou e aposetolo pepelo. (2 Korinito 11:16-21; 12:11, 12, 19-21; 13:10) Peitai, sa lei fai ma masani a Paulo lona taumafai e faaofo tagata uma i mea na mafai ona ia ausia.—Faataoto 21:4.

Po o Uunaia Oe e le Alofa o Keriso?

6. E tatau faapefea ona aafia i tatou i le alofa o Keriso?

⁶ I le avea ma se aposetolo moni, sa aʻoaʻo ai e Paulo isi e faatatau i le taulaga togiola a Iesu. Sa iai se uunaiga tele i le olaga o Paulo, auā na ia tusi mai: “Ua pulunaunauina i matou i le alofa o Keriso; o loo manatu faapea i matou, na maliu le toatasi mo tagata uma, o lea ua oti ai tagata uma; na maliu foi o ia ona o tagata uma, ina ia le usiusitai pea o e ola ia te i latou lava, a o ia o le na maliu ma toe tu mai mo i latou.” (2 Korinito 5:14, 15) Maeu se alofa na faaalia e Iesu ina ua foai mai lona soifua mo i tatou! Ma le mautinoa e tatau ona avea lena ma uunaiga malosi i o tatou olaga. O le loto faafetai ia Iesu ona o le foai mai o lona soifua mo i tatou e ao ona uunaia ai i tatou e faia galuega maelega i le folafolaina atu o le tala lelei o le faaolataga ua saunia e Ieova e ala mai i lona Alo pele. (Ioane 3:16; faatusatusa i le Salamo 96:2.) Po ua uunaia ea oe e “le alofa o Keriso” ina ia faia se sao maelega i le galuega talaʻi o le Malo ma le faia o soo?—Mataio 28:19, 20.

7. O le ā le uiga o le ‘lē toe iloa o se tasi i la le tino’?

⁷ E ala i le faaaogā o o latou olaga i se auala e faaalia ai le loto faafetai ona o le mea na faia e Keriso mo i latou, ua ‘lē toe ola ai ē faauuina mo i latou lava, ae mo ia.’ Na faapea atu Paulo: “O lenei, e amata i nei ona po ona matou le toe iloa se tasi i la le tino; e ui lava ina iloa e i matou o Keriso i la le tino, a o lenei, matou te le toe iloa.” (2 Korinito 5:16) E lē tatau i Kerisiano ona vaai i tagata i se vaaiga faaletino, atonu e faaʻauʻau i tagata Iutaia na i lo tagata o Nuu Ese, pe faaʻauʻau i tagata mauoa na i lo ē matitiva. ‘E lē iloa e ē faauuina se tasi i la le tino,’ auā e tāua ia i latou la latou faiā faaleagaga ma o latou uso talitonu. O i latou na ‘iloa Keriso i la le tino’ sa lē na o ni tagata na vaaitino ia Iesu a o iai i le lalolagi. E oo lava i nisi na faamoemoe i le Mesia o ē na vāai muamua ia Keriso i lona tulaga o se tagata, sa lē tatau ona faaauau pea ona latou vaai faapena ia te ia. Sa ia foaiina lona tino e fai ma togiola ma toe faatuina aʻe ai o se agaga foai ola. O isi ua faatutuina aʻe i le ola faalelagi o le a faamatuu atu o latou tino faaletino e aunoa lava ma so latou vaai atu ia Iesu Keriso i le tino.—1 Korinito 15:45, 50; 2 Korinito 5:1-5.

8. Ua faapefea ona iai tagata taitoatasi “ia Keriso”?

⁸ I le sagai atu pea i ē faauuina, ua faapea atu atili Paulo: “Afai o ia Keriso se tasi, o le tagata [“foafoaga,” NW] fou ia; ua mavae le ola tuai, faauta, ua oo mai le ola fou.” (2 Korinito 5:17) O le ‘iai ia Keriso’ o lona uiga ia olioli i le autasi ma ia. (Ioane 17:21) Ua maua e le tagata lenei faiā pe a oo ina tataʻi atu o ia e Ieova i lona Alo ma faauuina ai lena tagata i le agaga paia. I le avea ma atalii faauuagagaina o le Atua, e avea ai o ia ma “foafoaga fou” ma se faamoemoe o le auai faatasi ma Keriso i le Malo faalelagi. (Ioane 3:3-8; 6:44; Kalatia 4:6, 7) Ua avatu ai i na Kerisiano faauuina se faaeaga sili o le auaunaga.

‘Ia Lelei ma le Atua’

9. O le ā ua faia e le Atua ina ia mafai ai ona maua se leleiga?

⁹ Maeu le faafiafiaina o Ieova i le “foafoaga fou”! Ua faapea mai Paulo: “O mea uma foi mai le Atua ia, ua uma ona faaleleia e ia o i tatou ia te ia e ala ia Iesu Keriso, ua tuuina mai foi ia te i matou le galuega o le leleiga. O lenei, sa ia Keriso le Atua, ua faaleleia e ia le lalolagi ia te ia, ua le taʻua a latou agasala ia te i latou; ua ia tuuina mai foi ia te i matou le upu o le leleiga.” (2 Korinito 5:18, 19) Ua faaesea tagata mai le Atua talu lava ona agasala Atamu. Peitai sa tausolomua ma le alofa Ieova i le tatalaina o le ala mo se leleiga e ala i le taulaga a Iesu.—Roma 5:6-12.

10. O ai na tuuina atu i ai e Ieova le galuega o le leleiga, ma o le ā ua latou faia ina ia faataunuuina ai?

¹⁰ Ua tuuina atu e Ieova le galuega o le leleiga i le au faauuina, o lea na mafai ai e Paulo ona faapea mai: “O lenei, o sāvali i matou a Keriso, peiseai ua aioi mai le Atua ia te outou e ala ia i matou; matou te ole atu, o sui i matou o Keriso, ia outou lelei ma le Atua.” (2 Korinito 5:20) I taimi anamua, sa tele ina auina atu sāvali i vaitaimi o feeseeseaiga aasa ina ia vaai pe mafai ona alofia le ono tupu o se taua. (Luka 14:31, 32) Talu ai ua faaesea le lalolagi agasala o tagata mai le Atua, ua ia aauina atu ai ana sāvali faauuina ina ia faailoa i tagata ana tuutuuga o mea e ao ona fai mo se leleiga. I lo latou avea ma sui o Keriso, ua aioi mai ai ē faauuina: “Ia outou lelei ma le Atua.” O lenei aioiga o se olega alofa ina ia saili le filemu ma le Atua ma talia le faaolataga ua ia faia e ala mai ia Keriso.

11. E ala i le faatuatua i le togiola, o ai ua mautinoa o le a mauaina se tulaga taʻuamiotonuina i luma o le Atua?

¹¹ O tagata uma o ē faaalia le faatuatua i le togiola e mafai ona lelei ma le Atua. (Ioane 3:36) Ua faapea mai Paulo: “Auā o [Iesu] na le iloa le agasala, na faia o ia e le Atua ma agasala, mo i tatou; ina ia avea i tatou ma amiotonu a le Atua ia te ia.” (2 Korinito 5:21) O le tagata lelei atoatoa o Iesu sa avea ma taulaga e ofoina mo agasala a le fanau uma a Atamu o ē ua laveaiina mai le agasala tuufaasolo. Ua avea i latou ma “amiotonu a le Atua” e ala ia Iesu. O lenei amiotonu, po o se tulaga taʻuamiotonuina i luma o le Atua, e maua muamua e le 144,000 o suli faatasi ma Keriso. I le taimi o lana Pulega o le Afe Tausaga, o le a maua ai se tulaga taʻuamiotonuina o ni tagata lelei atoatoa, e le fanau faalelalolagi a le Tamā o le faavavau, o Iesu Keriso. O le a ia siitia i latou i se tulaga taʻuamiotonuina i le lelei atoatoa ina ia mafai ona faamaonia lo latou faatuatua i le Atua ma maua ai le meaalofa o le ola e faavavau.—Isaia 9:6; Faaaliga 14:1; 20:4-6, 11-15.

“Le Tausaga e Talileleia Mai Ai”

12. O le ā le faiva tāua ua tauaveina atu e sāvali ma avefeau a Ieova?

¹² Ina ia maua le faaolataga, e ao ona tatou gaoioi ia ogatasi ma upu a Paulo: “O lenei foi, o i matou o faigaluega faatasi ma [Ieova], ua matou aioi atu ia te outou, ina neʻi talia fua e outou le alofa tunoa o le Atua. Auā ua faapea mai o ia, O le tausaga e talia ai na ou faalogo ai ia te oe, o le aso foi e faaolaina ai na ou fesoasoani ai ia te oe. Faauta, o lenei le tausaga e talileleia mai ai; faauta, o lenei le aso e faaolaina ai.” (2 Korinito 6:1, 2) E lē talia fua e sāvali faauuina a Ieova ma ana avefeau, o “isi mamoe,” le alofa tunoa o lo latou Tamā faalelagi. (Ioane 10:16) E ala i a latou amio saʻo ma lo latou maelega i le faiva i lenei “tausaga e talileleia mai ai,” ua latou sailia ai le finagalo malie tauatua ma faailoa atu i ē o loo aināina le lalolagi faapea o le ‘aso lenei e faaolaina ai.’

13. O le ā le uiga o le Isaia 49:8, ma na faapefea ona uluai faataunuuina?

¹³ Ua sii mai e Paulo upu o le Isaia 49:8, o loo faitauina faapea: “O loo faapea ona fetalai mai o Ieova, O ona po o le alofa ua ou tali atu ai ia te oe; o le aso e faaolaina ai ua ou fesoasoani ai ia te oe; ou te leoleo foi ia te oe, ma aʻu avatua oe e fai ma feagaiga a le nuu; ina ia faaeaina le lalolagi, ia faia nuu ua faatafunaina mo latou tofi.” Na uluai faataunuuina lenei valoaga ina ua faasaoloto tagata Isaraelu mai le faatagataotauaina i Papelonia ma mulimuli ane toe foi atu i lo latou nuu moni.—Isaia 49:3, 9.

14. Na faapefea ona faataunuuina le Isaia 49:8 i le tulaga o Iesu?

¹⁴ I se faataunuuga atili o le valoaga a Isaia, na foai mai ai e Ieova lana “auauna” o Iesu e fai ma “malamalama o nuu ese, e fai [ma le Atua le] faaolataga ia oo i tuluiga o le lalolagi.” (Isaia 49:6, 8; faatusatusa i le Isaia 42:1-4, 6, 7; Mataio 12:18-21.) O “ona po o le alofa,” po o le “tausaga e talileleia mai ai,” e manino mai sa faatatau atu ia Iesu a o iai i le lalolagi. Sa ia tatalo, ma na “tali” mai le Atua ia te ia. Sa avea lena o “le aso e faaolaina ai” mo Iesu auā sa ia tausisia se faamaoni atoatoa ma ‘avea ai ma tupuga o le faaolataga e faavavau ia i latou uma o ē usiusitai ia te ia.’—Eperu 5:7, 9; Ioane 12:27, 28.

15. Talu mai anafea sa tatau ai i Isaraelu faaleagaga ona taumafai malosi e faamaonia atu le tatau ma onomea o i latou mo le alofa tunoa o le Atua, faatasi ai ma le ā le sini?

¹⁵ Ua faatatau atu e Paulo le Isaia 49:8 i Kerisiano faauuina, i le aioi atu ia i latou ina ia ‘lē talia fua le alofa tunoa o le Atua’ e ala i le lē taulau ona latou sailia lona finagalo malie i “tausaga e talileleia mai ai” ma le “aso e faaolaina ai” ua ia saunia mai. Ua toe faapea mai Paulo: “Faauta, o lenei le tausaga e talileleia mai ai; faauta, o lenei le aso e faaolaina ai.” (2 Korinito 6:2) Talu mai le Penetekoso e 33 T.A., sa tatau ai i Isaraelu faaleagaga ona taumafai malosi e faamaonia atu le tatau ma onomea o i latou mo le alofa tunoa o le Atua, ina ia avea le “tausaga e talileleia mai ai” o se “aso e faaolaina ai” i latou.

‘Le Faailoa Atu o i Tatou Lava o Auauna a le Atua’

16. I lalo o ā tulaga faigata na faailoa atu ai e Paulo o ia lava o le auauna a le Atua?

¹⁶ O nisi tagata sa aufaatasi ma le faapotopotoga i Korinito sa lei faamaonia le onomea ia i latou o le alofa tunoa o le Atua. Sa latou faia tala taufaaleaga e faatatau ia Paulo i le taumafai e faaleaga lana pule faaaposetolo, e ui lava ina alofia e Paulo le ‘tuuina atu o se mea e tasi e tausuai ai.’ E mautinoa lona faailoa atu o ia lava o le auauna a le Atua “i le onosai tele, i puapuaga, i malaia, i atuatuvale, i le matelaina, i tuuina i fale puipui, i faaletaupulea, i galuega, i mataala, i anapopogi.” (2 Korinito 6:3-5) Mulimuli ane, na faapea atu Paulo, pe afai o ē na tetee ia te ia o ni auauna foi i latou, sa “sili” atu lava o ia, auā na sili atu ona tele le faapuapuagatiaina o ia i le falepuipui, le sasaina, o lamatiaga matautia, ma lona lē maua o mea talafeagai mo le tausia o ia.—2 Korinito 11:23-27.

17. (a) E ala i le faaalia o ā uiga e mafai ai ona tatou faailoa atu i tatou lava o auauna a le Atua? (e) O ā “auupega o le amiotonu”?

¹⁷ I le pei o Paulo ma ana aumea, e mafai foi ona tatou faailoa atu i tatou lava o auauna a le Atua. E faapefea? “I le amio mamā,” po o le lē ponā, ma e ala i le gaoioi e ogatusa ma le poto saʻo o le Tusi Paia. E mafai ona tatou faailoa atu i tatou lava “i le faapalepale,” le tumau e onosaia mea sese po o faiga faatiga, ma “i le agalelei” a o tatou faia mea e fesoasoani ai i isi. E lē gata i lea, e mafai ona tatou faailoa atu i tatou lava o ni auauna a le Atua e ala i le talia o taiala mai lona agaga, le faaalia o le “alofa moni,” i le tautala faamaoni, ma faalagolago atu ia te ia mo le mana e faataunuu ai le faiva. O le mea mataina, sa faamaonia mai foi e Paulo lona tulaga o se auauna i “auupega o le amiotonu i le itu taumatau atoa ma le itu tauagavale.” I taua anamua, o le lima taumatau sa masani ona sasau atu ai le pelu a o le lima agavale e uu ai le talita. I le tauina o le taua faaleagaga e tetee atu i aʻoaʻo pepelo, sa lei faaaogaina ai e Paulo auupega o le tino agasala—le matauʻa, le faaʻoleʻole, le faitogafiti. (2 Korinito 6:6, 7; 11:12-14; Faataoto 3:32) Sa ia faaaogā “auupega” amiotonu po o ala amiotonu, mo le faalauteleina o le tapuaiga moni. E tatau foi ona faapena i tatou.

18. Pe afai o i tatou o auauna a le Atua, o le a faapefea ona tatou amioai?

¹⁸ Pe afai o i tatou o auauna a le Atua, o le a tatou amioai ai i amioga tatau e pei ona sa faia e Paulo ma ē na latou galulue faatasi. O le a tatou gaoioi e pei o Kerisiano e tusa lava pe faaaloalogia i tatou pe leai. O le a lē avea lipoti leaga e faatatau ia i tatou, e taofia ai fua la tatou galuega talaʻi, o le a tatou lē faamaualuluga foi pe a faia ni lipoti lelei e uiga ia i tatou. O le a tatou tautala faamaoni ma atonu e amanaiaina ai i tatou ona o a tatou galuega faale-Atua. Pe a fetaiai ma mala matautia i osofaiga mai fili, o le a tatou faatuatua atu ia Ieova. Ma o le a tatou taliaina aoaiga ma le loto faafetai.—2 Korinito 6:8, 9.

19. E mafai faapefea ona “faatamaoaigaina nisi e toatele” i le itu faaleagaga?

¹⁹ I le faaiuina o lana talanoaga e faatatau i le galuega o le leleiga, sa taʻua ai e Paulo ia lava ma ana aumea e faapea e “peiseai o faanoanoa, a o loo olioli pea; peiseai o matitiva, a ua matou faatamaoaigaina nisi e toatele; peiseai e leai sina mea o ia te i matou, a o loo ia te i matou mea uma.” (2 Korinito 6:10) E ui sa iai i na auauna se mafuaaga e faanoanoa ai ona o o latou puapuaga, ae sa olioli o latou loto. Sa matitiva i latou i le itu faaletino, ae sa latou “faatamaoaigaina nisi e toatele” i le itu faaleagaga. O le mea moni, na ia i latou “mea uma” auā o lo latou faatuatua na latou maua ai oa faaleagaga—e oo lava i le faamoemoe o le avea ma atalii faalelagi o le Atua. Ma sa ia i latou se ola tamaoaiga ma le fiafia o ni auauna Kerisiano. (Galuega 20:35) I le pei o i latou, e mafai ona tatou “faatamaoaigaina nisi e toatele” e ala i le auai i le galuega o le leleiga i le taimi nei lava—i lenei aso o le faaolataga.

Ia Faatuatua i le Faaolataga Mai ia Ieova

20. (a) O le ā le manaoga naunautai sa iai ia Paulo, ma aisea sa faatapulaa ai le taimi? (e) O le ā e faailogaina ai le aso o le faaolataga lea o loo tatou ola ai nei?

²⁰ Ina ua tusi atu e Paulo lana tusi lona lua i Kerisiano i Korinito i le tusa o le 55 T.A., e tusa lena pe toe 15 tausaga o loo totoe mo le faiga o mea faa-Iutaia. Sa naunautai atu le manao o le aposetolo i tagata Iutaia ma Nuu Ese ina ia latou lelei ma le Atua e ala ia Keriso. O le aso lena o le faaolataga, ma sa faatapulaa lena taimi. Ia, ua talitutusa lena ma lo tatou iai i le faaiuiuga o le faiga o mea talu mai le 1914. O le galuega aoao o le talaʻia o le Malo o loo faagasolo nei, e faailogaina ai lenei aso e avea ma aso o le faaolataga.

21. (a) O le ā le mau o le tausaga ua filifilia mo le 1999? (e) O le ā e tatau ona tatou faia i lenei aso o le faaolataga?

²¹ E mananao tagata o nuu uma e faalogo atu i le sauniuniga a le Atua mo le faaolataga e ala ia Iesu Keriso. E lē toe iai se taimi e faatuai ai. Na tusi mai Paulo: “Faauta, o lenei le aso e faaolaina ai.” O upu na o le 2 Korinito 6:2 o le a avea ma mau o le tausaga e 1999 a Molimau a Ieova. Maeu le talafeagai, auā o loo tatou sagai nei ma se mea e sili atu ona matautia na i lo le faaumatiaga o Ierusalema ma lona malumalu! Ua i faitotoa lava le iuga o lenei faiga aoao o mea, o loo aofia ai tagata taitoatasi o le lalolagi. I le taimi nei—e lē o taeao—o le taimi e gaoioi ai. Pe afai tatou te talitonu o loo ia Ieova le faaolataga, pe afai tatou te alolofa ia te ia, ma pe afai e tāua ia i tatou le ola e faavavau, o le a tatou lē talia fua la le alofa tunoa o le Atua. I se faanaunauga mai le loto ia viia Ieova, o le a tatou faamaonia atu ai i upu ma gaoioiga e faapea, e uigā moni lava la tatou alalaga atu: “Faauta, o lenei le aso e faaolaina ai.”

E Faapefea Ona E Tali?

◻ Aisea e matuā tāua ai se leleiga ma le Atua?

◻ O ai sāvali ma avefeau o loo auai i le galuega o le leleiga?

◻ E mafai faapefea ona tatou faailoa atu i tatou lava o auauna a le Atua?

◻ O le ā le uiga ia te oe o le mau o le tausaga e 1999 a Molimau a Ieova?

[Ata i le itulau 17]

I le pei o Paulo, po o e maelega ea e talaʻi atu ma fesoasoani i isi ina ia latou lelei ma le Atua?

Iunaite Setete

Falani

Côte d’Ivoire

[Ata i le itulau 18]

I lenei aso o le faaolataga, po o e iai ea faatasi ma le vao o tagata e toatele o loo taumafai ina ia lelei ma Ieova le Atua?