Fesili mai le Au Faitau

◼ I le Mataio 10:21, pe sa lapataia ai ea e Iesu i tatou faapea e toatele uso i le faapotopotoga o le a toe faasagatau atu i o latou lava uso faaleagaga?

E leai, e lē o le autū lena o le lapataiga a Iesu, lea ua faitauina faapea: “E tuuina atu le uso e le uso ia oti, e tuuina atu foi le fanau e le tamā; e tutū atu foi le fanau i o latou matua ina ia fasiotia i latou.”—Mataio 10:21.

Ua faaalia i le aotelega o lenei mataupu faapea o le fetalaiga lenei a Iesu i le au aposetolo e 12 a o ia aauina atu i latou i se malaga talaʻi faataamilo i Isaraelu. O le tele lava o lana fetalaiga sa faaautū tonu i le au aposetolo. Mo se faaaʻoaʻoga, na ia fetalai faapea o le a maua e i latou le mana e faia ai faamalōlōga faavavega, tutuli temoni, ma e oo foi i le faatutuina o ē ua oti. (Mataio 10:1, 8; 11:1) Ua faamaonia i le talafaasolopito sa leʻi mauaina e Kerisiano uma na mana faavavega, ua faamautinoa ai la sa fetalai Iesu i inā i se aofia patino—o ona aposetolo.

E ui i lea, e iai nisi vaega o le fetalaiga a Iesu na faalauaitele e sili atu na i lo le malaga talaʻi faataamilo a le au aposetolo. Na ia fetalai ia i latou: “Ia outou ma tagata; . . . E taʻitaʻiina atu foi outou i luma o alii ma tupu ona o aʻu, e fai ma molimau ia te i latou atoa ma [nuu].” (Mataio 10:17, 18) I lena malaga faataamilo, e foliga mai na fesagaʻi ai le 12 ma teteega, ae leai se faamaoniga faapea na tuuina atu i latou “i luma o alii ma tupu” ina ia avatu ai se molimau i “nuu.”a I tausaga mulimuli ane, na tutū atu ai le au aposetolo i luma o tupu, e pei o le Tupu o Herota Akeripa I ma le II, Sekio Paulo, Kaliona, e oo lava i le Emeperoa o Neru. (Galuega 12:1, 2; 13:6, 7; 18:12; 25:8-12, 21; 26:1-3) Na iai la se isi faatatauga o fetalaiga a Iesu i se taimi mulimuli ane.

Na faaauau le fautuaga a Iesu i le lapataiga: “E tuuina atu le uso e le uso ia oti.” Sa leʻi faatatauina ana upu i uso faaleagaga e lē pei ona ia fetalai atu i tamā po o fanau faaleagaga i ana upu o loo sosoo ai i le Mataio 10 fuaiupu e 21: “E tuuina atu foi le fanau e le tamā; e tutū atu foi le fanau i o latou matua ina ia fasiotia i latou.” O le uiga o fetalaiga a Iesu e faapea e ono faatalitalia e le au aposetolo le feita mai po o teteega e oo foi lava i auaiga.—Mataio 10:35, 36.

Sa manaomia ona tumau ma le onosai le au aposetolo i lena malaga talaʻi faataamilo. Na faaauau Iesu: “E inosia foi outou e tagata uma ona o loʻu igoa; a o lē tumau seia oo atu i le gataaga, e faaolaina o ia.”—Mataio 10:22.

O nisi o vala o fetalaiga a Iesu i lena faatasiga ua tāua foi mo i tatou o Molimau a Ieova i aso nei. O loo faamamafaina e la tatou talaʻiga le Malo. Ua faia e aunoa ma se totogi la tatou faiva, ma tulimataʻia tagata o ē naunau i le feau po o ē ua tatau i ai. E talafeagai foi ona faaeteete. Ua anoanoai tagata e tetee mai. O nisi taimi e faapogaia ai e tauaiga, tuaoi, po o uo i galuega ni faafitauli matuitui, ae maise lava ia i latou o ē faamaoni ua amata ona tuliloaina le ala o le Faa-Kerisiano moni. Na toe faaleo mai e Iesu le lapataiga e faatatau i na teteega ina ua ia faamatalaina “le faailoga” o lona faatasi mai. (Mataio 24:3, 9, 10; Luka 21:16, 17) Na ia toe taʻua foi le manaomia ona tatou ‘tumau seia oo i le iʻuga ina ia faaolaina ai.’ Ioe, e manaomia ona tatou tumau seia oo i le iʻuga o lo tatou olaga o iai nei, pe seia oo ina faaiʻu lenei faiga o mea ma mafai ai ona tatou ulu atu i le lalolagi fou.—Mataio 24:13.

[Faaopoopoga i lalo]