Pe Tali mai le Atua i Au Tatalo?

“E LĒ taitai iai soʻu lagona faapea ua talia aʻu tatalo,” na fai mai ai se fafine e nofo i Hokkaido i Iapani. E tusa ai ma lenei mea, e lē na o ia o iai lena lagona. E toatele ua lagona faapea e lē o talia mai lava a latou tatalo. O le mea moni foi, atonu o e tau mānatu pe o tali mai le Atua i au tatalo.

E faitau miliona ua fai atu a latou tatalo e lē mafaitaulia i le anoanoai o atua. Aiseā ua foliga mai ai e matuā tele lava tatalo e lē o talia? Ina ia iloa, seʻi o tatou iloiloina muamua ituaiga o tatalo ua ofoina atu.

Mo ā Mea ua Tatalo i ai Nisi?

I le vaitau o le Tausaga Fou, o le lua vaetolu o le faitauaofai o tagata Iapani, po o le toetoe lava 80 miliona tagata, e tatalo i falesa o Shinto po o malumalu o Puta. Latou te avatu tupe siliva e fai ma taulaga, ma tatalo mo le manuia lelei ma le saogalemu o le aiga.

Ia Ianuari ma Fepuari—a o toetoe lava oo i suega sili ona faigata e ulufale ai i kolisi maualuluga—e lolofi atu ai tamaiti aʻoga i falesa e pei o lea e i Tokyo ua lauiloa ona o lona atua tau aʻoaʻoga. Latou te tusi o latou moomooga i luga o laupapa e tusi ai tatalo ona tautau lea i puipui laau i lotoā o ia falesa. A itiiti mai o le 100,000 o nei laupapa e tusia ai o latou moomooga ua teuteuina ai lotoā o se falesa lauiloa i Tokyo i le vaitaimi o suega i le 1990.

O le tele o tatalo e aofia ai tatalo mo le soifua maloloina. I se falesa i Kawasaki, Iapani, e tatalo ai tagata mo le puipuiga mai le AIDS. “O le aogā o le tatalo mo le AIDS,” na faamatala mai ai e se patele o le falesa, “ona o le a mafai ai e tagata ona faamaoni i a latou amio.” Ae pe ona pau ea lena o le mea e mafai ona tatalo ai?

I se isi malumalu, na tatalo ai se isi loomatua ina ia “vave oti.” Aiseā? Ona sa manao o ia e alofia le puapuagatia mai se maʻi faaumiumi ma sa leʻi manao e avea o ia ma avega mamafa i lona aiga.

I se tasi atunuu e faapea mai e Kerisiano, na tatalo ai le kapeteni o se au lakapi ina ia manumalo lana au ma ia puipuia mai le faamanuʻaina. E tatalo tagata Katoliko i Polani mo lo latou lelei totino ma teuteu lo latou atua fafine uliuli i maatāua pe a latou talitonu ua talia a latou tatalo. E toatele tagata e lolofi atu i falesa e pei o le falesa taʻutaʻua i Guadalupe i le Aai o Mekisiko, ma Lourdes, i Falani e aioi atu ai mo ni faamalologa faavavega.

I Sasae po o Sisifo, e ofo atu ai e tagata tatalo mo le tele o mafuaaga totino ma le eseese foi. E manino mai, latou te mananao ina ia faafofogaina ma talia a latou tatalo. Ae peitai, pe o se mea moni le faatalitalia faapea o tatalo uma lava o le a faafofogaina ma le fiafia? Ae faapefea au lava tatalo? Pe o talia ea? O le mea moni, pe e talia ea e le Atua tatalo?